دا انا ضحكت ضحك
ماشية في الشارع
في حتة المفترض انها منطقة بنت ناس
في المهندسين يا جماعه
مش هي لسه برضوا بنت ناس وكدا يعني زي ما بنسمع
وانا بقى ماشية باشا انا ومرات اخويا نازلين من عند دكتورة المودموزيل آيس
آيس دي بقى قطة شيرازي بيضاء كالثلج فعلا عمرها شهرين بس قمرة
طول الامتحانات بتذاكر معايا
هي ماسكة محاضرة وانا محاضرة
ودايما عايزة الورق اللي في ايدي
مجرمة اوي
وانا بقى اضرب بالمذاكرة عرض الحائط واقعد العب معاها
وكام خطوة في الشارع وموتوسيكل معدوم الصوت يحمل 3 افراد من ذوي الاحجام المقروضة
وما حدش يقولي 3؟؟؟؟ !!! علشان كل ما نقول لحد 3 على موتوسيكل يستغرب
المهم الشباب تكرموا ولطشوا مني الشنطة من ايدي الشمال يظهروا لاحظوا انها تقيلة على
هم جايين من ورانا
قال وانا اعتقدت انها شبطت كدا في الموتوسيكل ومنتظرة انهم يقفوا يرجعوها
ومرات اخويا شافتها في ايديهم بعد ما عدوا
ولسه بتبص لي تسالني شنطتك دي
لقتني بكل هدوء بقولها دول خدوا الشنطة
قالتلي صوتي
وجات هي مطلقة السرينة
حرااااااااااااااااااااامي خطفوا الشنطة حرااااااااااااااااااااااااااامي
يادهوتي يا ويا ويا
ولا حياة لمن تنادي
والشارع مليان ناس
وكان ممكن جدا يوقفوهم
لانه عربيات راكنة على الصفين
وناس مشاة في النص
يعني الموتوسيكل كان ممكن يقف
ماعلينا
هي بقى فضلت تشتم في البلد والشهامة اللي اندثرت
والرجالة اللي ماتت في الحرب
انا مش فاهمة يعني واحد ربنا اكرمه وماماتش في الحرب
عايزاه يموت بغزة مطوة من ايد واحد مبرشم ولا ضارب بانجو
علشان خاطر الشنطة
قلت لها يا ستي الناس من حقها تخاف على نفسها
ورحنا عملنا محضر في القسم
ودمتم
طبعا دا الموجز بتاع الموقف
لو عايزين التفاصيل
ابقوا قولولي
65 comments:
حمدالله على السلامه
اهم حاجه انك بخير
فداكي الشنطة بما فيها
_______________________
من الواضح ان الايام دي الشهامة اندثرت فعلا واصبحت من الاشياء
نادرة الوجود
في مواقف كتير ممكن تحصل على مرأى ومسمع
من الناس اللي في الشارع
لكن السلبية هي السمة الغالبه على معظمهم.
مودموزيل ما علينا
=================
و الله مش عارف اضحك و لا ازعل, بس بالطريقة اللي انتي قلتيها دي مينفعش غير اني اتقلب على ضهري من كتر الضحك
و بعدين ايه الطيبة و البراءة اللي انتي فيها دي كلها؟؟
افتكرتي الشنطة علقت في الموتسكل و مستنياهم يقفوا, انا في ثانية لقيتني متخيل الموقف و شايف اللي بيحصل, هنا بقى الحتة اللي انا اتقلبت فيها
_________________________________
---------------------------------
يا رب بس ميكونش في حاجة مهمة في الشنطة وربنا يعوض عليكي, و طالما انك زي الفل و جسمك متسرقش منه حاجة و لا اتخررم يبقى فداكي اي حاجة تانية
==================================
وبعدين ايه الفضايح اللي انتي عملتيها دي يا مدمنة الشاي,
انا حسيت انك بتاخديه حقن او بتطحني الشاي و بتشميه
او بتحطيه في سيجارة محشية, تعرفي بقى اني مبشربوش خالص؟
عموما يا قمر انا عينيا ليكي, تأمري و انا انفذ و زي ما كتبيتي هعمل
--------------------------------
على هامش التعليق:
بناء على طلبك
رحت بليل عند واحد بتاع عصير قصب, و لميتلك شوية نشارة خشب من ارضية المحل انما ايه من اللي متنقي فرز اول خشب زان اصلي شوفي بقى عايزاه فاتح و لا غامق عشان ابقى اصبغه
---------------------------------
و ابقي اكتبيلي تفاصيل الحادثة بقى و اللي ما بين السطور
و بعدين انا كدة اااااااااخر من يعلم؟؟
انتي و فتات الجنة قاعدين تقسموا عليا و انا ولا دريان و عمال اتكلم ببراءة
كدة؟؟؟
عموما وصل التوضيح و بعدين مين فيكو الاول و مين فيكو الاصلي؟؟ يعني انا هنا عند التقليد و لا الاصلي و لا ده مضروب ده و لا ايه؟؟
وسلام مؤقت يا سكر
انا عايز ابقى استلف مودموزيل "ايس" عايز اعملها اسبوع عسل كدة مع اش
اش متقلقيش حاجة تشرف و ترفع الراس
طولت قوي كدة
ده تقريبا اطول كومنت اكتبه من ساعة الافتتاح
هو هو نفس الموقف اتكرر مع ماما واحد زميلي بحازفيره
استمتع بالسئ فالاسواء قادم
**mlame7**
الله يسلمك يا ملامح
والحمد لله على كل شيء
وانا عند كلمتي ان الناس معذورة
وطبيعي جدا انهم يخافوا
محمود علي
وكان معاها آيس برضوا يا محمود
بس مش يمكن الاجمل قادم
خصوصا واننا معانا مدونة اسمها الاجمل قادم
بس انت تؤمر انا مستمتعة بالاسوأ حاليا
S H A H
جاي برضوا من غير الشاي
انا قلت بعد السياح اللي عملته عندك
هاتيجي ومعاك نص كيلو شاي ولا حاجة
ومن ناحية الادمان
دا انا قديمة اوي مع الشاي
من اول ما كان بيتباع بالقرش
مرورا بمرحلة البرشام والحقن
والبودرة
بس مش بيور
شوية ليبتون على شوية تموين
شوية كدا ونعمله طوابع
السجاير مش كويسة اصلي ضد التدخين
وبالنسبة بقى يا سيدي لموضوع السرقة
اللي انا كنت فيه مش طيبة ولا براءة
انا ما اعرفش سكتهم اصلا الطيبة والبراءة دول
انت بتقول حاجات غريبة اوي
انا كنت مزبهلة
انت بتقول مش عارف تضحك ولا تزعل
تضحك طبعا
لاني من بعد ما فقت من الازبهلال انتابتني كريزة ضحك
حتى وانا في نقطة الشرطة
اللي طالع على اضحك ومرات اخويا متعفرتة
وتقولي بتضحكي ليه
سبحان الله طيب اعيط يعني
ما خلاص الشنطة باللي فيها
راحت لاصحاب نصيبها
وماكانش فيها غير
بطاقة الرقم القومي وكارنيه الجامعة وانا طبعا في امتحانات
وموبايلي
وشريحة موبينيل زيادة
ومجموعة اقلام قيمة جدا
واله حاسبة
وسلسلتين مفاتيح مهمين جدا
ومجموعة اوراق مهمة
وماكانش فيها فلوس كتير
هم 160 جنيه وشوية فكة
الحمد لله
وعلى فكرة بقى
انا ما قسمتش ولا حاجة
انا بس قرات استفهامك على تعليقها ولقيت اسمس
فرحت بقى قرات تعليقاتها
وعرفت قصدها لاني كنت اكتشفت موضوع وجود 2 ماعلينا غيري
وللامانة هم اقدم مني
بس انا اكتشفت وجودهم بعد ما عملت مدونتي بفترة
ويا باشا انت تطول براحتك
انا عندي براح هنا في المدونة
وعاملة مشروع استصلاح منطقة التعليقات
شاي بقى المرة الجاية ماشي
وحلو من المعصرة ومالوا
المهم الصبغة
وآيس لسه قاصر يا عم
وهي مش بتتعالج من الاكتئاب
دي كان عندها التهاب في معدتها
لانها اكلت حتة لحمة سمينة شوية
ومرات اخويا حاليا بتاكلها سيريلاك وفراخ بلدي
ياعيني عليك يا شعب مصر
اولا الف مبروك على المدونة ولو انها جت متأخرة شوية
ثانيا حما لله على سلامتك وسلامة مرات اخوك وسلامة مس اْيس
ثالثا لو سالتينى عن رايى هاقول ان نت اللى غلطانة لان انت اللى استفزيتى الشباب البرىء الامور ده لما خرجت بالشنطة فى الشارع
هى الشنطة للخروج ولا للزينة فى البيت
!حرام عليك يا شيخة
حمدالله على السلامة...طبيعى بس
فى ناس كتير بيخافو ودة حقهم بج
طيب فاكرة ايام احداث الاعتدائات الى كانت فى نص البلد لما اتدخلت علشان ادافع عن واحدة وكنت بزعق وكدة...طلعلى واحد من وسط الناس وفى اصحاب محلات ساعدونا...صحيح كنت هاموت بس الحمد لله..المهم حمدالهل على سلامتك ...
أبو سويلم
جايز يا ابا محمد
واديني اخدت عقابي
ربنا يسامحني بقى
وعموما انا خلاص هابطل
خصوصا وان دي تاني مرة اتسرق فيكي يا قاهرة
المرة اللي قبل دي
كانت في ميت عقبة
بس نشل من غير ما احسر ولا اشعر
يظهر حاطة يافطة
اتفضل واسرق براحتك
ويا سيدي مبروك مش متاخرة ولا حاجة
اهي لو مش على المدونة تبقى عل الحادثة
.:.-=- ELGaZaLy-=-.:.
الغزالي عندي
انت اللي حمدا لله على السلامة يا استاذي
اخبارك ايه
ان شاء الله تكون بخير
وكويس والله انك طلعت لنا سليم من احداث وسط البلد
طيب مش كنت تحضرني في احداث شارع الحجاز في المهندسين
عموما ما علينا
والناس معذورة والله
كل واحد وراه هم متلتل
بيفكر الف مرة قبل ما يقدم على حركة كدا ولا كدا
يللا الحمد لله
قدر الله وما شاء فعل
طيب يا جميله فى ميت عقبه والمهندسين انت مركزه فى قطاع مهم جدا ومناطق قريبه من بعض
ده يظهر ان كل الحراميه دول من بيت واحد وبيستنوك مخصوص عموما ربنا يعوض عليك
عاجبنى قوى تعبي
اضرب بالمذاكره عرض الحائط
اصرارك على الفصحى فى احلك الظروف
تحياتى
العاشره مساء
دى منى الشاذلى
واحده وحشه كده بتيجى فى التلفزيون
اسف انى كتبت حاجه بعيده عن الموضوع بس نفسى اكتب تعليق طويل زى
shah
انا اول مرة اعلقلك
مش عارف اهنيكى ولا اقولك حمد الله ع السلامة
ماعلينا
شفتى الناس مكسلة تجرى ورا الحرامى
عموما بعد كده لو القطة تعبت ابقى هاتهالى
ومتخافيش صوتى انت بس وهتلاقى 50 واحد مسكوا الحرامى
جبتلك يا ستي الشاي الطوابع و مسجل مستعجل كمان لا و ايه بعلم الوصول
و جاري استصلاح قطعة ارض عشان ازرعلك الشاي و تشربيه طازة كمان
و بعدين انا ملاحظ ان انتي و لا اتسرقتي و لا حاجة ده كان فاضل ياخدك انتي كمان و خلاص كدة
و حبينا نسلم
واجمل سلام مؤقت
لا حول و لا قوة إلا بالله
ربنا يعوضك خير
:(
و الناس بجد موقفها ايه دا
زعلت فعلا
:(((
حمد الله علي السلامه يا قمر
ياستى رزقهم خليهم يهيصوا
بس فعلا ظاهرة وحشة اوى حكاية الرجالة اللى ماتوا فى الحرب دول مبقاش ليهم اى لزمة
يلا يابنتى ربنا يعوض عليكى
صحيح مش عايزة عريس للمودموزيل ؟
فكرتيني لما اتسرقت أنا كمان
هههههههههههههههههههههه
بس انا اتسرقت في مسجد الكلية
كان حتة موقف؟ حرقلي دمي والله
دخلت أصلي في أمان الله وخلصت مالقيتش الشنطة
كان فيها الموبايل وفلوس والنضارة والمحفظة
وكتاب لصلاح عبد الصبور
والشنطة كانت جديدة كمان
أنا بقي سيبت كل البلاوي اللي في الشنطة وقعدت أعيط ع الكتاب
:))
عبيطة قوي أنا
المهم لقيت الشنطة رموهالي في كلية آداب
الله يكرمهم وسابولي فيها النضارة صعبت عليهم أمشي من غيرها والكتاب والمحفظة اللي فيها البطاقة
بس خدوا كل حاجة تانية الحمد لله
المهم أنك كويسة الحمد لله
وهي فعلا مابقاش في شهامة في البلد دي
سيادة ظابط حرس الجامعة قاللي كدة بصريح العبارة وأنا أعملك ايه ابقوا خلوا بالكوا من حاجتكوا
واقترح عليا أشتغل مخبر بعد الضهر وأراقب اللي داخل واللي خارج من المسجد وأمسك الحرامي
:))
بس أنا ماخاليتلوش اختك ماتتوصاش يعني في المواقف دي
:))
والراجل يقوللي ده أنا ظابط أهو ومرة جزمتي اتسرقت من المسجد وروحت حافي
:))
بالذمة كنت أرد أقوله ايه؟
:))))
يالللا يابنتي فداكي
ركزي في الامتحانات بس عشان تبقي فاشلة وتنجحي في ظل نظام فاشل علي رأي محمود
:))
تحياتي
يعنى ايس لازم تتعالج فى المهندسين؟؟
مالها ارض اللواء
اهى قصادها ع طول
e7na
انت بقى ماتتاسفش خالص هنا
لان دي مدونتك وتكتب فيها اللي انت عايزه ويخطر على بالك سواء له علاقة ولا مالوش
وبذمتك منى الشاذلي وحشة كدا
دي وحشة خالص
وبالنسبة للغة العربية
انا لولا مش عايزة يبقى الجو تقيل
ما كنتش كتبت غير بيها
انا اصلي اعشق الفصحى جدا
بنت الضاد ليس اجمل منها في كل اللغات
ولعلمك بقى انا رحت الشارع اللي اتسرقت فيه تاني
بعدها باسبوع
بس كنت مركزة اوي
علشان لما ييجوا اقدمها لهم
بكل ذوق
انا اصلي نفسي اتعرف عليهم
دي معرفة الناس كنوز
واقترح على كدا منطقة جديدة
لازم كل مناطق مصر يستنفعوا مني
ولا ايه رايك
دكتور كسلان
هو فين الكسل دا
اللي يخليك تيجي لحد عندي وتشرفني
وكمان تعلق
مستحيل تكون كسلان
ظالمينك وانت ظالم نفسك
وافرض بقى جبت لك ايس
وانت كسلت تكشف عليها
سعيدة جدا بتشريفك مدونتي يا دكتور
S H A H
اخيرا جبت الشاي
وكويس اني هاجربه طوابع على ايديك
انا خايفة لاتكون من مباحث مكافحة المخدرات
وجاي تعمل شغل في الغرزة قصدي المدونة بتاعتي
واستصلح زي ما انت عايز يا باشا
وبعد ما تزرع وتظبط ابقى انا استولي عليها
بلطجة بقى
يعني افهم
هو انت كنت عايزني اطلع
بضربة سكينة ولا بشلة
علشان يبقى دليل على اني اتسرقت
ربنا يسهلهم
انا يعجبني الشباب اللي زيهم كدا بيكافح ويتعب علشان يقدر يوفر تمن البانجو
مفيش حاجة بالساهل خالص
على فكرة
جبنا صديق لآيس
لسه النهارده
وسميناه بيرسي
علشان يتربوا مع بعض
احنا مش بنجوز قططنا برا
سلام يا باشا
و القادم....أجمل
الله يسلمك يا جميل
يا جماعة الناس معذورة والله
والشنطة راحت لاصحاب نصيبها
دي ارزاق
ومتقسمة
علاقتي معاها انتهت لحد كدا
سلام يا دكتورة
ركزي انت بس وذاكري
انا منتظرة السيبر
اللي هاتفتحيه
fanan fa2eer
ازيك يا دكتورة
وحشاني جدا
ويابختك
رمولك الشنطة واوراقك وكتابك
لكن انا لا
يظهر عندي اوراق مهمة
ناويين يبتزوني بيها سياسيا
واذا كان الظبوط اتسرق
هانعمل ايه احنا
عوضنا على الله
نورتيني يا فنانة الدكاترة
أميرة ويلز
الله ينور عليكي
هو رزقهم والله انا باقول كدا
خليهم يهيصوا
والعوض على الله
وآيس خلاص
جبنا لها عريس تربيه على ايديها
نورتيني يا سمو الاميرة
تخاريف دكتور
ما هي بتعدي مزلقان ارض اللواء
وتروح المهندسين كنوع من التغيير
والله لسه بنعالجها
وبعدين صحيح دا انا عايزة اتخانق معاك
لما الاقيك بس
يااااا خبر
دا كنت معدي أشوف الأخبار
ألاقي سرقة و شنطة وموتوسكل ولا جيمس بوند
.
أولا... ألف سلامة و فدااااك الشنطة
ثانيا ... لازم تسجلي الموضوع ده في الشهر العقاري أحسن حد يعمله فيلم سينمائي مقتبس عن قصة حقيقيةو يروح عليكي حق القصة
ألف سلالالالالالالالالالامة
تعيشي و تخدي غيرها
أنونيمس
منور يا دكتور
طيب ايه رايك
اديك لقيت اخبار ولا اخبار الحوادث
والله يسلمك
وحقي في القصة انا مسجلاه من زمان
ما تقلقش
اصلها مش اول مرة
يعني دعوتك اني اعيش واخد غيرها
مستجابة مقدما
سعيدة جدا بمرورك يا دكتور
وتعليقك
السلام عليكم
المهم ان البطاقة تكون مش فى الشنطة
علشان ما تدوخيش وانتى بتعمليها
اما عادا ذلك بيروح ويجى
مش أحسن ما الاحلام تتسرق ولا حد يحط ايده ينزع قلبك من بين ضلوعك وطبعا معاه حق علشان يموت جواك المشاعر
كلها مصلحة
ربنا يبدلك خيرا منها ان شاء الله
تحياتى
تعليق على التدوينة السابقة
ايضا لفاروق جويده كتب من فترة بعيدة
لم يبق شىء لنا من بعد ما سقطت كل القلاع تساوى السفح والجبل
لم يبق شىء لنا من بعد ما غربت شمس الرجل تساوى اللص والبطل
تحياتى
رسالة الى الامة العربية
=====================
الى جميع المدونين و المدونات في العالم العربي , فاليشهد العالم انني قد حضرت الى هذه المدونة الرقيقة للانسة ماعلينا صاحبة الاحساس الاكثر رقة و قدا أتيت هنا ومعي باكو شاي فرط مش فتلة و من النوع الفاخر و باكتيت بانجو و قرش حشيش و مع عدد 2 طابع لزوم التعلية و4 باكو شوكولاتة لزوم الاوفر دوس
مقدمه لسيادتم
شاه - من كليلة و دمنة
عداني انا العيب كدة يا قمر؟
ليكي حاجة عندي بقى؟
يلا جهزي الليلة على بال ماجيلك
و اجمل سلام مؤقت
مش عايزين بقى سياح تاني في المنطقة
و الزيارة الجاية ليكي حاولي تبيني للزوار ان انا اتغيرت و بقيت واحد تاني و بسقيكي شاي
سلام يا سكر
وياترى الشنطه كان فيها كان فيها كام ؟؟ انتين جنيه وربع ؟؟ وكمان انتى مش قد الاماكن الراقيه بتروحيها ليه ؟؟ بتتلزقوا فى الناس ليه ؟؟
والله مش عارف أرد ليكي أقولك إيه بس الحكاية دي بقى من زمان أوي والناس برده مكبرة دماغها
طيب والي خايف هيخاف من إيه الي يريده ربنا هيكون واللي ليه نصيب في حاجة هيشوفها هيشفوها لا محالة
عموماً فداكي الشنطة باللي فيها وألف حمد الله على سلامتك
تحياتي
انتي فين يا ما عالينا؟؟
ضربتي الطوابع كلها و لا ايه؟
بقولكم حضريهم مش تسفيهم
فاهمين الكيف غلط
المفروض انك خلصتى امتحانات
انتى فين؟؟
ولا المرة دى اتخطفتى مش اتسرقتى؟؟
هه؟؟
ربنا يعوضك ان شاء الله :)
الحمدلله علي كل شئ
بس موضوع الشهامة ده ممكن مش للدرجة اللي انت شايفاها
الناس فعلاً تبلدت نوعاً
بس الشهامة موجودة
المهم القطة عاملة أيه
طمنيني على امتحناتك؟؟ ايه الاخبار
والغش سهل و لا ايه؟ يسهلهالك يا رب
الطائر الحزين
للاسف الشنطة كان فيها البطاقة وكارنيه الجامعة
والاحلام انا بامشي من غيرها
وكذلك المشاعر
بطلت اتعاطى الصنفين دول من زمان جدا
وبالنسبة لفاروق جويدة
هو فعلا له اشعار كتير جميلة جدا
سعيدا جدا بزيارتك
واكثر سعادة بتعليقك
تخاريف دكتور
نفسك اكون اتخطفت
مش كدا؟
مش انا قايلة لك هاخلص
الاثنين
واديني رجعت النهارده يا سيدي
وهاستقر بقى ان شاء الله
تشكر على السؤال يا دكتور
عبده الميكانيكى
مش معقول
دا انا قلت انت زعلان مني ولا حاجة
اكون دست لك على مفك ولا مفتاح انجليزي
ايه الغيبة دي يا ميكانيكي
هو الجاز كان قاطع عندك زي مية البرلس ولا ايه
ولعلمك انا قلت كدا
انا ماليش دخول
المناطق دي
واهو درس بقى
لا قصدي درسين
تكونش كنت غايب بتخطط للعملية دي
طيب كنت قولي
كنت بعت لك الشنطة بمحتوياتها كادو
نورتيني والله يا ميكانيكي
بلاش الغياب الطويل دا
احنا محتاجين عمرة من وقت للتاني
nosha
الله يسلمك
صح
قل لن يصيبنا الا ما كتب الله لنا
لكن الخوف غريزة بشرية
وتم تنميتها بواسطة كل العوامل والوسائل المحيطة
الناس ايه ؟
معذووووووورة
سعيدة جدا بمرورك وتعليقك
اسماء العـــــــريان
اللهم امين
شرفتيني بزيارتك وتعليقك
BinO
انا طبعا متاكدة ان الشهامة موجودة
ومش انا اللي كنت بابكي على الشهامة المندثرة
دي زوجة اخي
انا عن نفسي شفت وباشوف امثلة كتير على الشهامة
او بمعنى اصح
ناس عايشه اسلامها صح
ومؤمنة بربنا ايمان قوى
ولا تخشى سواه
الحمد لله
احنا مسلمين
وبالنسبة للقطة
زي ما هي قطة
هي كويسة وزياراتها للدكتورة مستمرة
BinO
سعيدة جدا بزيارتك مدونتي
وبتعليقك على موضوعي
اتمنى الزيارة تتكرر
S H A H
خلاص ياعم شاه دانت كدا مش جايب لي عزومة
دا انت بتلبسني قضية
ياجماعة
يا خلق هو
في دنيا التدوين وبراها
شاه باشا اجدع الجدعان
روحوا عنده تجدوا ما يسركم
ويظبط دماغكم
عايزين تعلوها ماشي
عايزين تووها ماشي
كله ماشي
خلاص يا معلم
احلى دعاية اهو
وبعدين يا عم انا عديت عليك قبل ما اسافر
وسيبت لك سلامي في صندوق البوسطة
اللي انت سايبه على سطح المدونة
وانت ما رديتش على
وياسيدي بقولك تاني
الطوابع ما تاكلش معانا
احنا ما ياثرش فينا غير اننا نعمل دماغ بلدي
هتلاقي بس حد من الزوار لقاهم
فاخدهم يجرب
والغش يا باشا مش سكتي
انا اصلي بادخل اللجنة
واشوف الاسئلة
لو في سابق معرفة بيني وبينها كان بها
مفيش يبقى مكانش وبالم تعابيني واخرج
والنتيجة بقى لما تظهر نبقى نعرف انا عملت ايه
السلام عليكم
هي الشنطه مفهاش حاجه مهمه ولا ايه؟
عدم الاكتراث ده يخليني اشك انك حاطه فيها حاجه اصلا
---------------
بس الرجاله لسه عايشه
عايشين بعد الحرب
بس ماشيين جنب الحيط
اصل الدنيا شمس بقاله اكتر من 35 سنه
تخيلي
تحياتي
mohand
كان فيها
الرقم القومي وكارنيه الجامعة
وكان عندي امتحان بعدها بيومين
وسلسلتين مفاتيح مهمين جدا جدا
واله حاسبة في علبة ذهبية اللون
غالية برضوا
ومجموعة اقلام قيمة جدا
تعبت على ما جمعتهم
ومحفظتي غالية برضوا
وتليفوني
وشريحة زيادة
و160 جنيه
ومجموعة جنيهات معدنيه
وشوية اوراق مهمة
ومجموعة صور
بالنسبة لي فيها حاجات كهكة جدا وحيوية جدا
لكن هاعمل ايه
قدر الله وما شاء فعل
اي رد فعل هايبدر عني هيكون مالوش اي نتيجة
انا عموما لما اي حاجة بتضيع مني مش باشد اعصابي
كفاية اعصابي بتتشد من التعاملات الانسانية
وعلى فكرة
في رجالة فعلا
وماشيين في وسط الطريق
في عز الشمس
يعني في وفي
انا سعيدة جدا بزيارتك وتعليقك
ماعلينا
تعيشى بس ماتخديش غيرها ان شاء الله
كل الحاجات دى كانت فى الشنطة
طيب كويس ان اوضة نومك سيبتيها فى البيت
بيقولك لا تضع كل البيض فى سلة واحدة
حبيت اعمل الحركة دى اتسرقت محفظتى بس فى الجامعة
واللى سرقها لما ملقاش فيها تمن ركوبة تاكسى
حب ينتقم منى رماها فى مكان بعيد بالعافية على ماوصلت لها
سلام دلوقتى
وليا زيارة تانية لمدونتك علشان عاجبانى اوى
السلام عليكم ورحمة الله وبركاته
ما علينا
ازيييييك
انا بشكر الظروف اللى حطيت قدامى المدونة العسل دى
بجد جميلة جدا
نيجى للبوست بقى؟؟
اتسرقتى؟؟
وفين ؟؟
فى المهندسين؟؟؟
عندنا فى المنطوقة
اوعى تفتكرى انى من قاطنى المهندسين
بس الكورس اللى ميتسماش بتاعى فى المهندسين
الشوارع فعلا هناك كلها على الجناب عربيات وفى النص ناس فعلا انا كده اتاكدت انك كنتى فى المهندسين
بس اعتبرى الحكاية فى بيتها وحاجاتك تكون عندك بكرة
دا انا حدوتة فتوة المنطقة
ههههههههههههههههههههه
المهم بس قوليسلى ؟؟
هيا الشنطة كان فيها كام؟؟؟
فكرينى بحادثة بنت خالتى اتسرقت زيك بالضبط كده
قام الحرامى الله يستره طلع كل الورق المهم من الشنطة والبطاقة والكلام دا وبعتهولها فى جواب على البيت
شوفتى الحرامية التمام؟؟؟
الشهامة بقى والكلام دى خلاص راحت عليه
بس مش اوى يعنى
تقدر تقولى فى المهندسين بس
مع احترامى لكل ساكنى المهندسيييين والاماكن الراقية دى
انما تعالى عندنا فى شبرا بقى
كانوا جابوه من قفاه
طولت عليكى
صح؟؟
رغاية
صح؟؟؟
عادى بقى
بكرة تتعودى عليا
:D
Hadota .. حدوتة
والله انت اللي جميلة وعسل
وبالنسبة للشنطة ما كانش فيها كتير اوي
هم 160 جنيه
وشوية فكة كدا
خدي بالك بقى من فلوسك وانت ماشية في المهندسين
والله الحرامي بتاع بنت خالتك ده
جنتلمان جدا
يابختها
ويا ستي انا عايزاكي ترغي براحتك
هو دا رغي دا
انا عايزاكي ترغي بجد
وتعتبري المدونة مدونتك
انت مجرد دخولك يسعدني ويشرفني
WiLdBiRd
بس انا واخدة غيرها قبل كدا
ونصيبهم بقى ان كل
الحاجات دي كانت فيها
لا في اليوم دا كنت واخدة الانتريه بس
والحرامي بتاعك بصراحة من حقه
يعني الراجل يتعب ويسرق
والاخر تعبه يطلع على مفيش
حرام عليكي يا شيخة
ويا ستي انتي تيجي وتتجولي هنا
براحتك
المنطقة متامنة
وتنوريني دايما
المهم حمد لله علي سلامتك
بس هستيرا الضحك دا اسخن من العياط يعني
واسالي مجرب
دا طبعا اللي هو انا
بونجووور على بارونة مخدرات الساحل و رئيسة هيئة البريد
موضوع التيست بوست كبر على ايديكي البنات داخلة كلها تهيص ة مش فاهمين حاجة
مش عارفين ان ده اسم الصنف الجديد بتاعك!!؟
قوليلي النتيجة بتاعتك امتى عشان نيجي نبارك و في ايدينا الواجب بتاعك
ليكي عندي حق عرب
السلام عليكم
ازيك يا ما علينا
زعلت جدا انا علي الشنطة اكيد كان فيها اكل....بس اللي فرحت بيه ان في روح تعاون وإخاء و3 راكبين علي موتوسيكل
اهو توفير في وسائل المواصلات
لما رجعت الاجازة ديه لقيت العربية بتعتنا ازازها متكسر ومتغطية بكرتونة
طبعا اصابني الهلع وطلعت اجري علي البيت واخبط بكل ما املك من قوة
فتحولي الباب تأكدت إن كل افراد البيت بخير قلت الحمد لله...وبدأت استفسر عن اللي حصل
قلولي واحد مبرشم ماشي في الشارع كسر ازاز عربيات الشارع كله وجري
طيب محدش عرف ينزل يوقفه ليه؟؟
قلولي واحنا نعرض نفسنا لوحد مسطول ليه؟؟
علي الرغم من انننا في منطقة هادية وبرضو نظيفة...
احمدي ربنا انها جت في شنطة واللي اخدها جري...
وانا بحمد ربنا اني مكنتش موجود ساعة العربية عشان كنت هخدلي مطوة وامشي بعاهة مستديرة طول عمري
المهم انك بخير وفداكي الف شنطة....
سلام
بالله المستعان
فعلا الله المستعان
بس والله انا كنت باضحك عادي
اصلي متعودة من زمان
ما ازعلش على اي شيء مادي يضيع مني
طالما بعيد عن الناس اللي بحبهم
يبقى مع الف سلامة
وقدر الله وما شاء فعل
وقلب عندك
يعني احنا زمل بقى
S H A H
بارونة
دا انت بتشيلني الليلة كلها بقى
مش بقولك ناوي لنا على تابيدة
ودلوقت بقى اعدام
خليهم يهيصوا
اجازة صيف بقى
وبعدين
شوف لنا احوالهم ايه
احنا مش هانفتحها تكية
دا كيف مش ترمس
ماشي
يا بهظ بيه
النتيجة لسه بدري عليها يا شاه
وانت عارف يعني اني
لي عندك حق عرب
انا مسامحة فيه يا لورد
الراقص مع الذئاب
وعليكم السلام ورحمة الله وبركاته
حمدا لله على سلامتك
والله يا اخ محمد ما كان فيها اكل
اوعى تزعل نفسك
انا عجبني تعاونهم برضوا
بس كانوا وقفوا طلبوها كدا واتناقشنا
كنت اديتهالهم عادي
والحمد لله فعلا انك ما كنتش
موجود في موضوع العربية
يعني كنت تبقى انت والعربية
ربنا يحفظك من كل سوء
شرفتني
مرة تانية
انا مش الدكتورة مااااعلينا
ومش الباشمهندس ماعلينا
السلام عليكم ورحمة الله وبركاته
ما علينا
انا عرفت انك ما علينا تالتة علي فكرة من ردك الاخير لما قلتيلي انا مش دكتورة
حراااام عليكم جبتولي تربنة
بقيت بدخل في الحيطة زي الوطاويط ومش عارف اركز
طبعا انا متشرف جدا جدا جدا بتواجدك وردودك عندي يا ما علينا
وياريت تقبلني ضيف واخ في مدونتك الجميلة التي لا تقل جمالا عن ما علينا التانيين
ما علينا
دمتي في خير اختي الكريمة
الراقص مع الذئاب
والله معاك حق
كتير اوي 3 ماعلينا
بس تقول ايه
توارد خواطر
ولا هو دا بقى حالنا كلنا
هانعمل ايه بس
ما علينا
وانا يا اخ محمد
يشرفني جدا انك تكون اخويا وتتقبلني اخت لك
واعتبر المدونة مدونتك
وربنا يكرمك ويعزك
ويجازيك خير على جميل كلامك
صباح الورد
ايه الحكاية جيت افتح لقيت البوست اللي فيه تقييم النفس و اسئلة الشيخ محمد يعقوب اتسرق هوا كمان
ايه الحكاية ا
الحرامية عرفوا مكان البلوج كمان و مكفاش الشنطة و لا ايه؟؟
طمنيني
و لا لقيت التوبة مش هتظبط معاكي و رجعتي للطريق بتاعنا؟
S H A H
الموضوع كدا فيه قولان
دواخليتك اللي بتتمنى اني ارجع عن التوبة
هي اللي خلاتك ما شوفتش البلوج
اللاشعور عندك كان طاغي شوية
ولا تلاقيك بقى ضربت عينة الصنف الجديد
وكانت عاملة معاك احلى شغل
ومعلية معاك على الآخر
ههههههههههههههه
هههههههههههه
ههههههههههههههه
صراحة أنا آسف انى ضحكت بس طريقتك فى سرد القصة تموت من الضحك
وكله كوم والحته دى كوم
هم جايين من ورانا
قال وانا اعتقدت انها شبطت كدا في الموتوسيكل ومنتظرة انهم يقفوا يرجعوها
ومرات اخويا شافتها في ايديهم بعد ما عدوا
ولسه بتبص لي تسالني شنطتك دي
لقتني بكل هدوء بقولها دول خدوا الشنطة
قالتلي صوتي
وجات هي مطلقة السرينة
حرااااااااااااااااااااامي خطفوا الشنطة حرااااااااااااااااااااااااااامي
بجد مقدرتش أمسك نفسي خالص من كتر الضحك
نيجي بقى للكلام الجد
الحمد الله انك كويس الحمد الله
ثانيا خير ان شاء الله اكيد فى الشنطة كان فيها حاجه وكان لازم تتخلصى منها قولى الحمد الله على كل شئ
أنا بقى عايز اعرف الشنطة كانت تقيله ليه ها كان فيها ايه ها انا مش فضولى انا عايز اعرف بس
حمد الله على سلامتك
3abdo me7tas
وتمسك نفسك ليه بس
اضحك يا عم ما حدش واخد منها حاجة
انا نفسي من بعد السرقة بخمس دقايق اتفتحت من الضحك
وفضلت اضحك تقريبا لمدة اسبوع
والى الان كل ما حد يفتح الموضوع
افطس على روحي من الضحك
هاعيط يعني
وانا قلت الحمد لله طبعا
كويس اني اتخلصت من الشنطة
خصوصا ان كان فيها
ممنوعات
ومتفجرات
والشنطة كانت تقيلة اوي
اصلي بامشي
بادراج مكتبي فيها
Post a Comment