ذاك هو

الحب حالة شعورية تجمع العديد من المتناقضات
تتألم برضا تتذوق العسل مراً تتنعم بعذاب
قمة الإحساس بالكرامة وقمة الإحساس بنسيانها تمتلك العالم وتتنازل عنه لمن تحب

ماذا يمكن أن تسمي
عجز منطقك عن الإدراك ...عجز لسانك عن النطق ....عجز قلبك عن أن يتحمل خفقانه

ذاك هو الحب
ولكن .... لابد و أن يكون مظلل بشرع الله

Wednesday, June 20, 2007

بروتوكولات التدوين

حلوة بروتوكولات دي زي ما اكون هاتكلم عن
بروتوكولات حكماء صهيون يا جماعة
ما حدش يفكرني هارص بقى بروتوكولات لعالم التدوين وكدا
قلبكم ابيض
انا بس كل الحكاية بما اني جاهلة جدا وغير ملمة باداب التواجد في عالم التدوين
دا لاني دخلته كدا نتيجة حب التجربة
وبصراحة الجو عجبني جدا وانبهرت بالعالم ككل
لكن انا ما اعرفش ايه قواعد التعامل فيه
مش هاطول عليكم
انا بس عايزة اعرف؟
هو الواحد لما يكتب موضوع ويفتح مجال التعليقات عليه
مش طبيعي ان كل واحد يقول رايه
بكل ادب طبعا
ويا سلام بقى لو التعليقات اخدت شكل الحوار
يعني انت تعلق
وبعد يوم ولا حاجة تلاقي صاحب الموضوع رد على تعليقك براي
فانت دخلت تاني توضح وجهة نظرك
وكدا يعني
وهكذا دواليك
سؤالي هنا بقى
هل دا مش من بروتوكولات التدوين
هل لا يجوز انك تتابع الحوار او النقاش
وهل من حق صاحب الموضوع
انه يحذف تعليقك
ويقفل باب النقاش باخر تعليق هو شايفه موافق لارائه
هو طبعا كل واحد حر في مدونته
ما هو مش عاملها علشان حد يقرفه ويناكف فيه
ما علينا من كل دا
يمكن كل دا من البروتوكولات وانا ما اعرفش
ما انا جديدة في الجو دا
انا باتكلم جد
سؤالي الاهم
هل اي واحد لو دخل وعلق على موضوع
واكتشف ان تعليقه اتحذف
وحس انها رسالة من صاحب المدونة
ان العدد كومبليت
ومش محتاجين خلاص
هل هايدخل المدونة دي تاني ويعلق فيها عادي ومفيش مشاكل
على اساس ان دي حرية مطلقة لصلحب المدونة
يسيب من تعليقاتك اللي يعجبه ويحذف منهااللي ما يعجبوش
وعلى اساس انه كمان عادي يعني
بيغلق باب النقاش والموضوع مش عدم احترام لتعليقك ولا حاجة
انا باسال يعني
ولا الكرامة تاخده ويعتبر دا عدم احترام لآرائه من قبل صاحب المدونة
وبلاش يدخلها تاني وخلاص
او يدخلها عادي لو شايف انها مدونة كويسة بس بلاش يعلق فيها
ويحترم رغبة صاحب المدونة
يعني يا جماعة عرفوني ما هي اداب وبروتوكولات عالم التدوين

Thursday, June 14, 2007

تخيل نفسك مكانه او مكانها ......وقولي احساسك ايه


من طبيعتي اني اول ما عيني تلتقي باي وجه بشري الاقي نفسي بسرعة جدا بافكر

ياترى في ايه خلف هذا الوجه ايه الافكار او التساؤلات المسئولة عن الانطباعات المرسومة عليه

ويا سلام بقى لو بقى في حوار

كدا المعطيات بتزيد وتبدا انطباعاتي انا تتكون جوايا عن الشخصية دي

والانطباعات دي تبقى محتاجة اما تاكيد او نفي

لاني لا اؤمن ان الانطباعات الاولى تدوم لان احتمال حدوث خطأ وارد

ممكن جدا يكون تقييمي غلط في غلط

المهم .......اني بابدا في اثبات المطلوب بناءُ على مالدي من معطيات

والمعطيات في تزايد كل ما الحوار يتسع

وعلى عكس مسائل الرياضيات

الرياضيات دايما مطلوب اثبات حاجة محددة يعني لازم البرهان بتاعك يوصل بيك في الاخر لها

انا لا انا المسائل عندي مرنة جدا

المطلوب اثباته عندي هو انطباعي عن الشخصية

لكن انا مش فارق معايا ان المعطيات تثبت لي عكس انطباعاتي

برغم ان دا نادر الحدوث لكن انا كل اللي يهمني

اني اوصل لتحليل صحيح قدر الامكان للتركيبة اللي باتعامل معاها


لكن فئة واحدة مستحيل اقدر اتوقع ايه اللي ورا تعبيرات وجوههم

او ايه الدوافع او المبررات لتصرفاتهم

وما حدش يقولي عادي مفيش حاجة في دماغهم

لا دول احيانا بل غالبا بياتوا بتصرفات تدل على انهم مدركين لكل ما يدور حولهم

نفسي اعرف لما بنلاعبهم وبيضحكوا بيكونوا بيفكروا في ايه

او لما بيكونوا زعلانين بيكونوا بيفكروا ازاي

وليه دايما تلاقيهم يفهموا بعض

برغم انهم بيكونوا لسه ما اتقنوش الكلام

بصراحة انا باجي عند الاطفال واحس انهم عالم تاني خالص

لهم لغتهم الخاصة اللي بيتفاهموا بيها بعيدا عنا

دايما انصح اصحابي واقول....علشان نقدر نفهم الناس صح

لازم نحط نفسنا مكانهم ونحاول نعيش الموقف من وجهة نظرهم

علشان نقدر نعذرهم او نشوف الجانب اللي هم بيبصوا فيه واحنا مش شايفينه

حتى لو وجهة نظرهم غلط بس لازم نبص بعنيهم الاول علشان لما نناقشهم

نبقى فاهمين ايه مقاصدهم و ما يكونش في مجال لحدوث سوء تفاهم


الا في حالة الاطفال ......قصدي طبعا الاطفال في فترة عدم الادراك

يعني الاطفال لحد سن 4 سنوات

بصراحة بعد 4 سنوات انا بانزع عنهم صفة الاطفال وباعتبرهم مجرمي حرب


انا عن نفسي مش قادرة اتخيل نفسي مكان الطفل دا

اكيد طبعا مستحيل اتخيل نفسي مكانه في هدومه او البطانية بتاعته


احتمال كبير كل اللي يقرا يقول ايه الهبل دا

عادي

بس نفسي

كل اللي يبص في الصورة يقولي

ايه اللي جيه في دماغه

او توقع ايه ممكن يكون مخلي الطفل دا مبتسم

Friday, June 8, 2007

حوارات عقلية


هل ما ينفعش ان يكون في صداقة مبنية على التعارف الفكري وبس ؟

بمعنى هل لازم الناس تتبادل الاسماء والاعمار والعناوين علشان تقوم بينهم صداقة

طبعا انا باتكلم وباتساءل في محيط صداقات النت

هي الاسامي او الاعمار او العناوين هاتفرق في ايه

الاصرار على تبادل المعلومات الشخصية بيؤدي بالغالبية العظمى الى الكذب واعطاء اسماء واعمار وهمية

ودا نظرا لانعدام الثقة ورسوخ فكرة ان الكل بيكذب

وبناءً عليه بيكون الكذب على من هو كاذب ليس بذنب يستحق تانيب الضمير او الاحساس بالذنب

Wednesday, June 6, 2007

لقمة هنية تكفي 100


مش دا مثل عندنا ودايما نقوله ان اي شيء مهما كان قليل طالما في تراضي والنفس مسامحة ممكن يكف من الحبايب الف

انا بقى اكتشفت ان المثل دا حقيقي جدا ويبتحقق واقعيا

انتم تسمعوا عن حاجة اسمها القوافل الطبية

زي المولد كدا للي يعرف الموالد دلوقت وزارة الصحة بتعمل المولد قصدي القوافل دي كل اسبوع كل محافظة بتعمل عندها في قراها

كشف مجاني وعلاج مجاني وتحاليل واشعات وايه العيادات بتروح لحد القرية من دول ويفرشوا في حتة تكون فاضية في البلد وبيبقى مولد

طبعا كل التخصصات متوفرة وتبص تحس ان كل البلد تعبانة ودا حقيقي

طبعا انا سخفت فين العلاقة بين كل دا والعنوان

بصوا بقى برغم تعدد التخصصات والتشخيصات والامراض

تندهش او عادي ممكن ما تندهش

تلاقي ان الصيدلية بتاعة القافلة الطبية مافيهاش غير 6 او 7 اصناف من الادوية

بس الحمد لله كله بيصرف منها

يعني اللي كاشف نفسية وعصبية واللي باطنة واللي اطفال واللي نسا وولادة والرمد والعظام

تلاقي كله بيتصرف له دواه من الـ 6 او الـ7 اصناف دول ما فيش حد بيطلع بايده فاضية

وعادي جدا تلاقي واحد كاشف عظام مصروف له قطرة ما هو دا الموجود والجودة بالموجود

يعني يطلع يلسن ويقول انا ما اخدتش علاج

والمطهر المعوي طبعا قاسم مشترك لكل المرضى ومالوا هو منه ضرر اهو يظبط الرمرمة شوية

المهم ان الكام صنف الموجودين الكل بيتراضى منها

تبقى البلد هاتعمل ايه اكتر من كدا

الخدمة الصحية والعلاج مجانا ولحد قريتك

حبة حبة نلاقي الخدمات بتوصل ديليفري لحد باب البيت ومجاني


طبعا مش هانبقى بجحين بقى ونبص للناس اللي تعبت في تنظيم القوافل دي ونقول هم استفادوا ايه

ربنا يبارك لهم كتر خيرهم انهم جمعونا في بوفيه الادوية والعلاج دا


المولد قصدي القوافل بيبقى يومين

لو اتعملوا عندكم بلاش تكسفوا البلد ابقوا روحوا وجابروا الزاد ومدوا ايديكم

واهي قطرة او شريط حبوب اكسباير مش هايضر بيبقى لسه باقي له شهر ولا حاجة

المهم المشاركة

Monday, June 4, 2007

حاليا مفيش في دماغي موضوع معين


اصل انا قلت اجرب اعمل مدونة


عادي يعني

يعني عملتها ليس مع سبق الاصرار والترصد

هو احساس جميل ان الانسان يكون له مكان يعبر فيه عن آرائه

بس انا بصراحة ياستمتع بدخولي مدونات الغير والمشاركة بالتعليق

وكانت بدايتي في مدونة احنا ولاد النهارده

المشاركة والتفاعل متعتهم اجمل واشد من مجرد عرض الاراء

لكن اكيد المتعه بجمالها دا اكيد بتتحقق بمشاركة الزوار بتعليقاتهم

يعني بنوصل ان النتيجة واحدة