معروض للتصويت

بصراحة انا قلت احنا عندنا حرمان تصويت

مفيش حاجة من اللي مفروض اننا نصوت بلاش نصوت

لان هالاقي الف من يقولي احنا بنصوت عمال على بطال من اللي بيجرى فينا

اللي مفروض اننا ندلي بصوتنا لحسم الامر بخصوصها بنتمتع بحكاية التصويت دي عليها



لا انتخابات مجلس شعب

ولا مجلس شورى

ولا مجلس محلي

ولا مجلس عربي متنجد كدا على الارض



المهم انا قلت اطرح موضوع للتصويت

واستفتيكم

ايه رأيكم

ارفع قضية على مديرية الامن عندنا

لانه قد تم منعي من دخولها لانني منتقبة

والباشا اللي على البوابة قالي

ترفعي النقاب من اول ما تدخلي من البوابة وطول ما انت جوا

الى ان تخرجي منها



لا واخويا متصور انه لما يقوله دي اختى وبطاقتي اهي

قال يعني هو هايستذوق ويعتبر دا ضمان اني مش داخلة اغتال مدير الامن

ولا احد كبار السادة قيادي الامن بالمحافظة



مش حتى يقولي ارفعي النقاب علشان اتأكد

او يجيب لي موظفة ماهي المديرية مليئة بالموظفات النساء

لأ لازم اخدها كدا من شرقها لغربها لحد ما اخرج منها





طبعا ما دخلتش

وسبحان الله ربنا يسر لي ماكنت متوجهه للمديرية من اجله

من مكان اخر تابع للمديرية

دون ان اتحدث مع احد حتى وليس ان ارفع نقابي



قولولي بقى ارفع القضية ولا الطيب احسن



باب التصويت مفتوح

وباب الترشيح ايضا مفتوح للي عايز يكون المحامي

ويتولى القضية ويصرف عليا

البقاء لله

لا أجد الكلمات لأسطرها

سوى ان اطلب لها الرحمة والمغفرة من المولى عز وجل

واسألكم الدعاء لها

صديقتي العزيزة التي كنت انتظر تعليقاتها دائما

بهلولة

رحمها الله

قرأت الخبر لدى العزيز

ابوصلاح

وتأكدت بدخولي الى مدونة زوجها

بهلول

لمعرفة بهلولة ادخلوا مدونة

عازف الناي

جزاك الله خيرا استاذ

عصفور المدينة

بوست هدية

مش هدية مني لكم طبعا

ربنا انعم على برغبتي في كتابته

ودي نعمة كبيرة اني بقى عندي حاجة قادرة اسيطر عليها في دماغي

واقرر اني اكتب عنها حاجة كدا يبقى لها راس ورجلين تتشاف وتتفهم ويبقى لها معنى

بعيدا عن محتويات رأسي من افكار غريبة يجدها الكثيرون أفكار شاذة

يا خبر اديني هاسرح بيكم واشت ندخل في الموضوع

هو موقف بسيط جدا حصل معايا النهارده انا مش مستغرباه

لكن سعيدة بيه جدا وبيحصل امثلة منه كتير معايا وقدامي

فقلت موقف ينصف البشر ويثبت ان لسه في شهامة ونخوة وذوق ورجولة

خاصة عند الشباب ربنا يسدد خطاهم جميعا ان شاء الله

وطلعت في دماغي اني لازم اكتبه برغم انه مش غريب ولا حاجة

وابدأ بقى احسن ما تبداوا تقفلوا الصفحة من كتر رغيي

دا للي لسه ما قفلهاش طبعا

حضرتي

واقفة على الطريق عند مدخل قرية صغيرة تابعة لبلدتي الصغيرة ايضا منتظرة ميكروباص

وطبعا سيادتي تحت اي ظرف مش باركب ورا نهائي

دايما متأرننة وواخدة الكرسي اللي قدام كدا ملاكي

ولا باركب جنبي بنات ولا رجالة

لكن في موقف زي دا وكنا خلاص الساعة خمسة قبل المغرب

وعلى طريق يعني العربيات اساسا بتعدي محملة

لا املك خيار ولا فاقوس

المهم وقف ميكروباص فيه مكان واحد بس فاضي في الكنبة الاخيرة

طبعا كلكم فرحانين في مفيش داعي للشماتة

ارحموا عزيز قوم ذل من قدام خالص لورا خالص

المهم

الكنبة فيها اتنين رجالة

اللي ناحية جوا ما شوفتش وشه كبير ولا صغير

الأولاني بقى راجل كبير في الخمسين تقريبا قاعد بقى مش بيتحرك

فباقوله لو سمحت تيجي كدا على أساس اني مش اقعد بينهم

يقوم موسع لي و رايح جنب الشباك

وسعوا لي المكان اللي في النص

قبل ما يكون لي اي رد فعل

كنت طبعا هاكرر عليه طلبي على اساس اني احرجه

وماكانش هايحرج طبعالانه لو ناوي على احراج كان احرج من البداية

ماعلينا

لقيت شاب من الكنبة اللي قدامهم قالي طيب حضرتك تعالي هنا ورجع هو وسطهم

قلتله متشكرة جدا وقعدت

اد ايه كنت سعيدة بيه وبذوقه وبسرعة رد فعله

حسيت انه تعامل معايا كاني حد يهمه زي ما الفروض يحصل بين الناس

استنوا بقى

ما حدش يقول يمكن عاوز يقعد ورايا لغرض في نفس يعقوب

ولا بيلفت النظر والكلام دا كله

لاني اولا هدومي مجرجرة وخماري لحد ركبتي تقريبا

ونقابي مغطي عينيا كمان يعني الدنيا ضلمة ضلمة

هو انسان محترم وعنده شهامة وذوق زيه زي شباب كتير

وعن خبره في المواصلات الشباب بيكونوا اكثر احتراما

وحياءعن كتير من الرجالة الكبار اللي لو قلت لواحد لو سمحت

توسع شوية تسمع وصلة من البستفة

والله مرة واحد كبير

كنت قاعدة قدام كنت لسه متواضعة شوية وممكن اركب حد جنبي

والعربية دخلت الموقف وانا بقى كنت راكباها من برا الموقف بمسافة علشان ما اتبهدلش في الزحمة

واللي جنبي بينزل في الموقف وقبل ما انشن على بنوتة اركبها جنبي

لقيت حاجة كدا

طول بعرض وشلة اكياس طماطم على كنافة على فاكهة كنا في رمضان

وركب قدام وحط اكياسه تحت رجليه وهو بقى ايه شلولح تخيلوا انتم بقى

انا وقفت ابص للحتة اللي باقية من الكرسي اللي المفترض انا هاقعد عليه

كان الاحسن اقعد في الشباك وادلدل رجليا

وبكل هدوء

لو سمحت يا عم الحاج شوية علشان اعرف اقعد

وططاطا

وش احمر

وعيون مبرقة

صايم بقى واحنا العصر

ما اهووو هو دا مش هاياخدك هو انا هاكلك

هو في ايه

يا سنة سودة على القنزحة يا ولاد

هو احنا ما خلفناش

دا احنا عندنا بنات تحل من على حبل المشنقة

دا انا وانا

وانا بقى

يا عم الحاج ما تعليش صوتك

ولاحظ اني محترمة سنك وبلاش تضطرني اغلط فيك

المهم السواق تدخل وشده ناحيته شوية وانا ركبت

ايه دا هو انا ايه خلاني احكي الموضوع دا

ومنه كتير جدا

علشان كدا بقيت اخد الكرسي وبارضوا باسمع اللي فيه النصيب

المهم زي ما في دا في نماذج ممتازة وغالبيتها بيكون من الشباب الصغير

يللا بقى كفاية كدا علشان اللي بيطالبوني اكتب يحرموا

وما حدش يزهق كلكم عارفين ان اهتمامي الاول الناس وتصرفاتهم

يللا سلام يا بشر

رمضان خلص....كالعادة ياتي ويذهب كلمح البصر

لا تنسوا زكاة الفطر

كل سنة والجميع دايما بخير

اتمنى نكون قدرنا ننهل من الكنز اللي كان بين ايدينا

رمضان طبعا ياريت كل ايامنا رمضان

كلاكيت تاني مرة......تاج.....انما تاج ايه

التاج جالي من مين......؟؟؟؟

مين الأخ والصديق العزيز العزيز أبو صـــــــــــــــــلاح......انا باشكرك جدا اني كنت من ضمن الناس اللي انت مررت لهم التاج

لكن مش مستغربة احنا خلاص متفقين اننا اصدقاء واخوات ودا شيء متوثق ومعلن عندك في المدونة

بالاضافة الى انه موجود ومتفق عليه ضمنيا من قبل ماتنشر بوست توثيق الصداقة عندك

وانت كمان بعته من غير لا خشاف ولا كنافة ولا اي حاجة يعني مش الدكتورة روفي بس اللي عملت كدا

مع اني قريت انها كانت باعته لك مع التاج كنافة وقطايف

ندخل على التاج بقى

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟

بصراحة مش لاقية ولا حاكم من اللي حكموا مصر فقط يعني كانوا حكام لمصر بس

يشجع ويخلي الواحد يتكبد عناء العودة الى الماضي

لكن لو اخترت بناء على معيار الشعوب

هاختار اعيش فترة الاحتلال الانجليزي خاصة فترة الملك

لان التاريخ بيثبت ان الناس وقتها كان احساسهم بحريتهم وكرامتهم رائع

الناس كانوا بيتمتعوا بشخصيات رائعة والغالبية كانت بتتكاتف لنيل الحرية

اول اولويه فى حياتك عيلتك ولا شغلك ولا اصحابك؟

اول أولوية في حياتي عيلتي

خاصة اخواتي التلاتة حبي لهم وعلاقتي بهم لها قدسية خاصة جدا عندي

ايه اكتر حاجه بتحبها فى رمضان؟

لمتنا ساعة الفطار

لاننا بطبيعة الحال كل واحد مواعيده مختلفة عن التاني جدا يعني نادرا ماتلاقي اتنين بياكلوا مع بعض

لكن رمضان انتم عارفينه بقى وجبة واحدة بتوقيت واحد

اوصف ليا اجمل فطار ممكن تفطره

اجمل فطار ممكن افطره هو فطار وسط اخواتي ووالدتي ووالدي واولادهم وزوجاتهم

لكن دا اصبح صعب جدا لان والدي توفى اول يناير من هذا العام

ودا اول رمضان من غيره يعني رمضان دا بالذات مش قادرة استعيد فيه احاسيس كتير

اسفة قلبتها دراما بس غصب عني

ربنا يرحم موتانا جميعا

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

ما اعرفش هاتمتع بنعمة العدل ولا لا انا حسب معلوماتي وخبراتي في الحياة

ان السلطة اي سلطة سواء كبيرة او بسيطة بتغير في صاحبها سواء نتيجة استعداد عنده او غصب عنه

لكن اكيد اتمنى اني اكون عادلة

لو افترضنا اني هاكون عادلة وهاعمل ايه علشان اكون حاكم عادل

يبقى مفيش قدوة احسن من سيدنا عمر بن الخطاب رضي الله عنه واني اتفقد احوال الافراد اللي باحكمهم بنفسي

اللى بيبوظ الحكام .. نفسهم؟ ولا الشعب؟ ولا الحاشيه المقربه؟

كله فئة من التلاتة ممكن تشترك في عملية الافساد

الشعوب بصمتها على الفساد

والحاشية المقربة بتفسد الحاكم لخدمة مصالحهم الشخصية

لكن يبقى ان الحاكم اذا كان حاكم جيد من البداية وملم بكل الامور يبقى هايتخلص من الحاشية المقربة الفاسدة

وسيصلح الشعب لان الجو المتوفر والمتاح هيكون لا يدعو للفساد

مين أكتر اعلامي مصري بتحترمه؟

بصراحة الاعلام المصري كله بمن فيه فقدت ثقتي فيهم من زمان جدا

حتى الأقلام المعارضة الوقت والمتابعة اثبتوا لي انها معارضة موجهه ومقننة

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟

لو اه ايه رايك فيه؟؟
لا .. ما قريتوش

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

كنت أتمني أشتغل حاجات كتير اوي

اولها كنت اتمنى اكون صحفية وتمنيت اني اشتغل بالمحاماة وحلمت كتير جدا اني اشتغل طبيبة نفسية

ايه تانى بلد تتمنى تعيش فيها بعد مصر؟

مصر هي اول بلد وتاني بلد واخر بلد اتمنى اعيش فيها

اوصف ليا ترتيبات اجمل فرح ممكن تحضره

اجمل فرح ممكن احضره يكون فرح حد قريب مني اوي واكون مشاركة في كل تفصيله من تفاصيله

زي افراح اخواتي كدا وصديقاتي واخوات صديقاتي

بتراعي كلام الناس والقيل والقال؟ لو اه او لو لا قول لى ليه؟

انا بحاول اراعي ربنا قدر امكاني

ثم باحاول اراعي نفسي وان كل تصرفاتي يكون فيها احترام لنفسي

وعندي يقين اني طالما باحترم نفسي يبقى اكيد باحترم الاخرين

لانه من صميم احترام الذات ان الانسان يحترم الاخرين
غير كدا انا مش باهتم بالقيل والقال لاني مؤمنة

ان مش من المنطق ابدا اني احول الناس لسجن اسجن نفسي فيه

صحيت من النوم ما لقيتش الموبايل ولا الكمبيوتر ولا الكاميرا الديجيتال

ولقيتنا رجعنا لعصر الحمام الزاجل والحصنه هتكون سعيد؟

طالما هارجع للعصر دا يبقى كل الناس هاتبقى من غير موبايل ولا كمبيوتر ولا كاميرا

وساعتها سعادتي هتكون متعلقة ومرتبطة بالناس اللي هاكون موجودة بينهم وشكل تواجدي دا هيكون ايه

السعاده هى؟

السعادة عندي اني احس بحب الناس واحسسهم بحبي لهم خاصة المقربين مني جدا

واني اقدر اكون سبب لسعادة اي انسان

والسعادة المطلقة في الاحساس بالرضا عن النفس واني وصلت بها لحالة من النقاء والصفاء

ودي سعادة صعبة المنال جدا

لانها زي ما قال ابو صلاح مرتبطة بالاحساس

برضا المولى عز وجل واعتقد ان مفيش حد يقدر يجزم برضا ربنا سبحانه وتعالى عنه وعن افعاله

عندك أمل ؟؟ أسبابك ؟

الحمد لله طبعا عندي أمل

الدنيا ايه من غير أمل

وعندي أمل ليه؟ لأن ثقتي في الله مطلقة

لما تحب تهرب من كل شئ بتروح فين؟

مع ان دا نادرا مايحدث

لاني بحب اواجه الامور وكل حاجة في وقتها

لكن لو طلبت معايا هروب او نقول تأجيل مواجهة

باروح انام

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

مش متذكرة لحظة زي دي لأني اعتقد اني من يومي وانا حاسة اني كبرت

وكل اللي حواليا بيتعاملوا معايا على اني كبيرة ومتحملة للمسئولية

لما بتعمل عمل خيرى بيكون ايه هو دافعك الاول؟

طبعا رضا المولى عز وجل

ثم بعد ذلك يأتي حبي الشديد لنفسي وحبي اني اكون فخورة بيها بيني وبينها واحترمها

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟

لا مش باشرب سجاير

ولو شفت ست بتشرب سجاير عادي زي لما باشوف راجل بيشرب سجاير

لأن لأصل في التدخين انه ذنب يعني حرام للراجل والست والمعاصي مافيهاش راجل وست

بتعرف ايدك اليمين من الشمال ازاي؟

وانا صغيرة ثبتها في دماغي بالسلام
ان اليد اللي بامدها للسلام هي اليمين
وتقريبا السلام والاكل هم الحاجتين الوحيدتين اللي باعملهم بايدي اليمين

واحيانا غصب عني بافاجأ بنفسي وانا باكل بالشمال وبيبقى منظري وحش اوي

ايه اكتر اله موسيقيه بتحبها ؟ ايه اكتر اله موسيقيه بتحبها ؟

الناي والقانون والهارمونيكا نغمهم بيعجبني

فى رأيك ليه الذوق والنخوه اتعدموا؟

هم تقلصوا ممكن

الناس بقت بتخاف من توابعهم

لكن مستحيل يكونوا انعدموا في ناس كتير كلها خير وشهامة

ايه الحاجه اللى لو حصلتلك تبقى سعيد قوى؟؟؟

مش عارفة

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

يا سلاااااااااااااااااام يبقى عندي ارض زراعية طبعا اغلب الوقت باقعد اتخيل لو عايشة في مزرعة انا واسرتي

بس للأمانة وانا صغيرة كنت دايما احلم يكون عندي قهوة واقعد اتفرج على الناس واتابع سلوكياتهم

البحر و لا النيل؟؟؟

كل منهم له جماله

النيل خير وهدوء

البحر برضوا خير وقوة

لكن انا عامة باخاف من الميه جدا

مركب و لا طياره؟؟

ما اقدرش احكم لاني ماجربتش الطيارة

مجنون و لا عاقل؟؟

كل المحيطين بيوصفوني بالعقل

وانا باحب الجنون اللي في قليلين جدا بيلمسوه في

تقرأ كتاب و لا تتفرج عليه فيلم؟

الكتاب طبعا من غير تفكير حتى لو مكتوب فيه ايه هو يكسب

بتمرر التاج لمين؟؟؟

يا سلام جينا بقى للجد

بحب انا اوي النقطة دي

والناس بقى عارفني ومن غير ما اقول

التاج باغلس على كل اللي اسماء مدوناتهم منورة عندى في اليمين

تحت عنوان

لـــــــــو طلبكـــــــم مش موجــــــــــود هنا

يللا بالهنا والشفا للجميع

والتاج ملحق معه مائدة رحمن عليها كل مالذ وطاب

افطروا وبعدين جاوبوا

كل الموجودين مفيش استثناءات

معاملة المهن

اصبح الطبيعي في التعاملات بل الادق ان اقول ان الطبيعي في التعاملات بين

البشر

هو انتهاج مبدأ القولبة أن نضع الأشخاص في قوالب ونعاملهم بناء عليه

دون محاولة تحمل عناء فهم تركيباتهم
طبعا في اخوة كتير من المدونين كتبوا في الموضوع دا
انا اللي شاغلني من زمان شكل محدد من اشكال القولبة

لفت نظري شكل القولبةالشائع جدا جدا بين الناس وهو قولبة المهن
وقرأت رد على تعليق في احدى المدونات الصديقة يفيد نفس المعنى

يعني على سبيل المثال نفترض ان تصادف وجود شخصين في مكان واحد
دكتور جامعي مثلا ورجل بسيط عامل او حرفي ونفترض ان مهنة كل منهما معروفة للمحيطين
المهن فقط هي المعروفة اما الاخلاقيات فمجهولة

ونلاحظ طريقة استقبال المحيطين للشخصيتين او طريقة الحوار مع كل منهما
الغريب ان الناس اوتوماتيك بتفترض ان صاحب المهنة الارقى لابد وانه ارقى خلقيا
ويستحق معاملة افضل واكثر تهذيبا

المشكلة ان دا له اثر فظيع جدا اثر سلبي

مثلا
فئة زي فئة السواقين
مش هانكر ان غالبيتهم التعامل معاهم صعب جدا جدا
لكن دا مش من فراغ المسألة هنا يحكمها مبدا
الاب بيبقى عارف ابنه كويس لدرجة انه عارف اذا كان هاينجح ولا لا

السواقين مثلا دا مجرد مثال بيتعاملوا مع الناس من خلال نظرة الناس لهم
الناس بينظروا لهم نظرة حقيرة جدا
ويقولك دول فئة وماركة تعاملها من تحت رجليك

طيب ليه يا جماعة
ما كل مجال فيه الحلو والوحش انتهاجنا للاسلوب دا بيخلي الكويس الموجود وسط السيئين
يقول ما انا كدا كدا واخد السمعة ومهما اتعامل كويس مع الناس زي قلته

بيحزني جدا جدا اني باشوف الموضوع دا متفشي جدا وبشكل بشع في مجتمعنا

انا ممكن اتعامل مع شخص بسيط جدا لم ينل اي قسط من التعليم
او من وسط اجتماعي بسيط جدا او بيعمل مهنة بسيطة جدا جدا
لكن تجد اخلاقه عالية وغاية في الاحترام والادب
والعكس انك ممكن تجتمع بشخص كل الدلائل والظروف ترجح وتؤكد
وجوب حسن خلقه وجمال معشره
لكن يصدمك عندما تحاوره


عارفة رغيت كتير بس الموضوع كان في دماغي
قلت بقى يبقى في دماغي وفي المدونة

يمكن بوستاتي شبه بعضها اوي
بس دا طبيعي لانها من دماغي وخاصة بالموضوع الوحيد اللي مسيطر على
وهو الناس والتعامل معاهم وكيفية التواصل معاهم وفهمهم

كلنا بشر لازم نتعامل مع بعض على هذا الاساس
ثم نبدأ في وضع اساسيات التعامل مع اكتشاف ابعاد الشخصيات

مش من قبل ما اعرف الناس
اضع قواعد بناء على ان هذا دكتور وهذا مهندس وهذا كناس وهذا حرفي
لا احنا بشر اولا واخيرا بشر

من الامير الى الغفير من ملك الملوك الى الصعلوك
بشر

واعتقكم بقى لوجه الله يا بشر

نظرة من زاوية معاكسة

انت انسان رائع

تحب الجميع لا تؤذي غيرك متسامح جدا كريم جدا خدوم معطاء مرح خفيف الظل

قناعتك بامتلاكك لتلك الصفات ليست محض غرور

بل كثيرون يغذون هذا الإحساس لديك

ترى هل يمكن ان يكون هناك من لايستطيع ان يحبك ؟

بل هل يمكن أن يكون هناك من يكرهك ويبغضك ؟

هل هناك من يتمنى اختفاءك من الحياة ؟

بالطبع ممكن جدا

واهم من يظن انه قادر على ان يحصد الحب من الجميع

ظالم ايضا من يطلب الحب من الجميع

لكل تركيبة انسانية مبرراتها التي تبرر سلوكياتها

قف في الجانب الآخر والقي نظرة من زاوية معاكسة

لتلك الزاوية التي اعتدت أن تنظر منها

انظر بعين من يكرهك ويبغضك حلل نفسك بعقله بفكره

ستجدك تكرهك

بغض النظر عن سلامة موقفه وصواب رأيه

انما هو قانع بما لديه ويجدك شخصية كريهة الى نفسه

انظر حوله اكتشف بيئته محيطاته

انتزع نفسك من مكانك وتخلص من افكارك ومبادئك

وتبنى افكاره ومبادئه لوقت قليل لدقائق حتى

حاول ان تستخدم عقله هو ليس عقلك أنت

نهاية ربما تستطيع أن تلتمس له العذر

وتعدل من طريقة تعاملك معه بناء على ما اكتشفت في شخصيته

ربما نظرتك من موقعه تكشف لك عن

مدخل جديد للتعامل معه لم تكن تراه سابقا

فلنلتمس الأعذار للآخرين

اخيركم للناس أعذركم للناس

اتحدث على المستوى السلوكي الانساني فقط

النتيجة ظهرت

كنت من اخر يوم امتحانات تقريبا متوقعاها

و ما كنتش منتظراها بل كنت ناسياها نهائي

كان بيفكرني بيها سؤال المحيطين

أخبار النتيجة ايه؟

وانا اقول أخر الشهر

قال والشهر ماشي وانا مش مركزة معاه خالص

ويوم الجمعه الساعة 6 مساءً تقريبا

لقيت رسالة جاية على الموبايل

تكنولوجيا بقى

بيبعتوا لنا النتيجة كل تيرم على الموبايل

المهم

قلت مع نفسي انتي جيتي

أشوف بقى هاخد كام مادة مع مواد التيرم اللي جاي

ومش هاطول عليكم

الحمد لله الحمد لله الحمد لله

نجحت في الخمس مواد

بلا فخر 4 مقبول و واحدة جيد جدا

الحمد لله الحمد لله الحمد لله

اللي ييجي يهني

انا باقدم شاي

وبس

النصبة عندكم والست قاعدة

اطلبوا زي ما انتم عاوزين

دعواتكم بقى

فاضل تيرمين

اطرق الحديد وهو ساخن

يللا بينا نكمل

هـــــــــــــــــــل تكــــــــــــــــذب؟؟؟؟؟؟؟؟؟؟؟؟

نعم

عندمـا تكذب احيانا هل يكون شعورك ان هذا طبيعي ومن حقك وأن هذا هو الصواب؟

لما بيحصل واضطر اكذب باكون مضايقة جدا

مش بافكر في حكاية حقي او مش حقي

بابقى عارفة ومتاكدة انه خطأ

هل انت خائن او غــادر او بوجهــين؟

مستحيل

لو على رقبتي لانها اكتر حاجة ممكن تازمني اني اتعرض للغدر او للخيانة

هل انت مشغول بما لايعنيك؟

لا

هـــــــــــــــــــل انت متعصب لرأيك ولا تقبل الخلاف ولا المناقشــــــه ؟

احيانا كثيرة باكون متعصبة لرايي بل غالبا لكن تعصب غير ظاهر

واقبل الخلاف والمناقشة لكن باحس اني باقبلهم لاني باعشق النقاش في حد ذاته

وغالبا رأيي مش بيتغير وممكن اللي قدامي هو اللي يغير رايه

هل انت تحب الاخذ ولا تحب العطاء؟

لا

احنا اتفقنا اني بحب نفسي جدا وبحب اعتز بيها بيني وبينها

فلازم احسها واشوفها معطاءة مترفعة عن الاخذ

هل تشتهي ان يُذل بضم الياء الناس لك ويتوسلون لك؟

لا

نهائي مهما كانت الاسباب دا بيسبب لي حرج فظيع

هل تحب ان يسارع الناس في خدمتك واكرامك ويثقل عليك التواضع للآخرين؟

اكيد هاحب اني احس الناس حابني وحابين يكرموني زي انا ما باعمل مع اللي باحبهم

انا باتعامل مع الناس زي ما احب انهم يتعاملوا معايا

هــــــــــــــــــــــــل تحــــــــــــب البطــاله والكسـل والنــوم؟

احب البطالة والكسل

لكن النوم لا

هل حـــدث مـــرة ان منعت خيرا عن احد من الناس؟

لا

هل احببت ان يصيب احد الناس شرا ؟

لا

هل حدث مرة ان كان باستطاعتك منع او درء شر عــن احــد الناس ولم تفعل

او العكس أي تجلب خير لاحدهم ولم تفعل ايضا؟

احتمال

ما هو تقييمك للناس هل هو :
•على قدر حبهم واخلاصهم لك؟

•ام على قدر ثناؤهم ومدحهم لك؟

•ام على قدر خدمات احدهم لك؟

•ام على قدر ارضاؤهم لغرورك ونفاقهم لك؟

•ام على قدر رقتهم وخفة ظلهم ؟

• ام على قدر موافقتهم لك واشباعهم لشهواتك؟
تقييمي للناس بيكون على اساس كل سلوكياتهم وافكارهم معايا ومع غيري

هل انت مراء او منافق تحب ان تُحمد بمالا تفعل؟

لا

هل انت من اصحاب الدعاوي العريضه انا وانا وانا وانا وانا وانا ؟

اعتقد ذلك

بما اني باتكلم عن ارائي وافكاري كتير

بس مش باستخدم كلمة انا كتير

هل انت متطلع لما ليس عندك متشوق لما لا تقدر عليه أي هل تعرف حق قدرك ووزنك؟

لا اتطلع لما ليس عندي لاني راضية جدا بما لدي

ما اعرفش هل انا مديا لنفسي وزن اكتر من حقها او اقل

بس غالبا باحس اني واخدة في نفسي قلم كبير

ما هي مساحة الجد من الهزل واللعب في حياتك ؟

لا اعرف

هل تعترف بالخطأ وتتراجع ام يصعب عليك التراجع والاعتذار؟

من اسهل الامور عندي

اني اول ما احس اني اخطأت اتراجع و اعترف واعتذر بشتى الطرق

متى تشعر بالسعاده ومتى تتـــــألــــــــم؟

دايما باحب استمتع بكل حاجة في حياتي

وطالما انا مستمتعة باكون سعيدة الى حد ما

لكن في سعادة الرضا عن النفس

دي اعتقد تحقيقها صعب شوية مع كل العيوب والبلاوي دي

باتالم بقى لما اقعد معايا والاقي حاجة مخزية عملتها

وباتالم برضوا لو الناس اللي بحبهم حد منهم جرحني حتى لو بدون قصد

دايما لو حصل بيكون بدون قصد بس دا بيكون الم مؤقت

هل الاحساس بالسعاده او الالــــــم مرتبط بالجسد ام بالمشاعر وعلاقتك بالاخرين؟

بالمشاعر وعلاقتي مع الاخرين

هل تحب الشماته؟

لالالالالالالا

هل عندك القدرة على العفو وأن تغفر اخطاء الاخرين؟

نعم

هـــــــــــــــــــل تقبل الاعتذار او تلتمس الاعذار؟

دي شغلتي

علشان اقدر استرسل في علاقاتي

هل تسامح وتنسى الاساءه؟

هي النقطة دي ملعبكة شوية عندي

انا باسامح واستعيد تعاملاتي لكن مش بانسى الاساءة ودا غصب عني

ومع اول موقف تاني للشخص يحرك اي شيء قديم

هل انت قلـــــــــــــــــــــــوق وموســــــــــــــــوس؟

قلوقة لا موسوسة اه

هــــــــــــــل انت مهمـــــوم دائمــــــا وتختلق همــــــوم لتشعر بأنك تحملها وتثقـــــل كاهــلك؟

لالالالالالالا

هل تعيش في وهم كبير ثم تصدقه وتظن انه حقيقي وتبحث عن علاج له؟

لالالالالالالالا

هل تستطيع ان تأخذ قرارا عند الحاجه في دقيقه واحده ام تكون متردد لا تستطيع الحسم؟

استطيع

هل تحب المظاهــــــــــــــر؟

مش قادرة ولا عارفة اجاوب

المظاهر هنا ايه المقصود بيها مظاهر الحياة عموما

لبس واكل ووضع اجتماعي وفلوس وكدا لو كدا ايه يمنع اني احبها

لكن مش هي معياري ولا مقياسي في الحياة

لكن اكيد باحب المظاهر الجميلة ويكون وراها داخل مماثل لها في جمالها

هل تحب ان تتظاهـــــــــــــــــــــــــر؟

لا

هل انت عنيد تحب المخالفه والاصرار؟

نعم

ما هي النســــبه بيــن داخـــلك وخارجـــك و ســـرك و عـــــلانيتك و باطـــــنك وظاهـــــرك ؟

مش عارفة

السؤال دا محتاجة لجنة تجاوب عليه

مكونة مني علشان اقول الجانب اللي انا اعرفه عن نفسي وما حدش يعرفه غيري

ومن الناس اللي حواليا علشان يقولوا الجانب اللي هم شايفينه وانا لا

ونقول انا وهم الجانب اللي احنا شايفينه كلنا

هل انت كريم ام بخيل ام حريص؟

(البخيل على كل الناس بما فيها نفسه اما الحريص فهو كريم على نفسه بخيل على الناس

بخيلة

لالالالالالالالا

مستحيل ولا حريصة ابدا وربنا العالم

هل انت رقيق هادئ الطباع لطيف ام قاسي غليظ؟

كلها صفات متواجدة في

وعلى حسب المواقف باكون اي واحدة فيهم

ما هــــــــــــــو رأي اعدائك ومن يكرهونك فيك؟

مدللة

مغرورة

قليلة الذوق

وماذا يقولون عنك ؟

بيقولوا رايهم اللي فوق

هل تحب الناس ام تكرههم؟

انا بحب الناس جدا

هل انت غاضب من الناس؟

انا باحب الناس واحب اتواصل معاهم

لكن انا مين علشان ارضى عنهم اواغضب عليهم

هل انت راضي عن الناس؟
نفس اجابة السؤال السابق

انا اكتر حاجة بافكر فيها امتى هارضى عن نفسي

وهل اليوم دا ممكن ييجي

من انت من كل هذه الاسئله؟
اجابة السؤال دا بقى هاحتفظ بيها لنفسي حاليا

لانها هاتتضمن رايي النهائي في نفسي بعد ما اركب الاجابات دي مع بعضها

ومع حيثياتها اللي انا ما كتبتهاش وقلت كفاية عليكم الاجابة النهائية المختصرة

بمنتهى الصراحة مع نفسي جاوبت

وادينا عملنا البوست

والله العظيم والله العظيم جاوبته مع نفسي ييجي عشرين مرة

وكنت كاتبه الاجابات بشكل شرح ومبررات

لكن قلت لنفسي في النهاية لازم يا نعم يا لا

وبعد ما عصرت ماعلينا عصر كان ما كان من تلك الاجابات

كل لا او نعم من دول جاءت بعد حوار ونقاش طويل جدا مع نفسي

وان كان هناك بعض الجمل التبريرية فهذا كان للضرورة

==============

هل تحب نفسك أي هل تحس بالغرور والتكبر والاعجاب بالنفس؟

نعم احب نفسي جدا

يداخلني الاحساس بالغرور احيانا

واعجب بنفسي في مواقف كثيرة

يستحيل ان يقترب مني احساس الكبر

هل تحب المدح من الاخرين؟

لا

هل تضيق من النقد او من ابراز عيوبك من شخص اخر؟

نعم

هل انت ممن يؤثرون مصلحتهم وراحتهم دائما ولو على حساب الاخرين؟

اكيد بحب مصلحتى لكن مش على حساب وراحة الاخرين ولو بقدر ضئيل

هل تغلبك الشهوات دائما؟

لا

ما هو المقدار الكافي لك من النوم - الاكل - الكلام؟

يكفيني من النوم 4 ساعات او 3

الأكل اللي باحبه باحب اكل منه لحد ما اشبع

والاصناف اللي انا مش مغرمة بيها اكل منها ما يسد جوعي

الكلام انا رغاية جدا طالما باعرض ارائي وأفكاري

هل تطاوع نفسك وهواك في كل ما تطلب؟

لا

هل انت متسرع عجول؟

لا

هــــل انت عصبي سريع الانفعال؟

نعم

هل انت شديد الحساسيه تجاه الاخرين ومع ذلك لا تراعي مشاعر الاخرين؟

لا

هل تتحدث عن نفسك كثيراً وعن اعمالك وآرائك وانجازاتك

وماضيك وآمالك حتى مع نفسك وليس بالضرورة مع الناس؟

اتحدث عن آرائي وافكاري و ربما آمالي

كثيرا مع الاصدقاءأما نفسي فاتحدث معها عن عيوبي

لكن لا اتحدث عن ماضي واعمالي وانجازاتي

هذا اذا وجدت

كيف تنظر للآخرين سواء

الافضل منك او الاغنى منك او الاشهر منك او جميعهم

والعكــس أي الاقــل منــك و الافقــر منك

و الاضعف منك و الاجهل منك؟

انظر لكل شخص على انه انسان مجموعة من المشاعر والافكار

سواء كانت متناقضة او منتظمة في النهاية انسان زيي زيه بس افكارنا ورؤيتنا للأمور مختلفة

هل تعتقد انك لم تأخذ حقك في هذه الحياه؟

الحمد لله انا ارضى بما قسمه الله لي

ودا احساس مريح وممتع جدا

كيف ظنك بالناس (حقودة – مؤذيه – غير ودوده – ودوده – الخ ) ؟

الناس بيجمعوا كل التركيبات دي

وكل الفئات دي موجودة

وكل انسان يمكن ان يكتشف انه خليط من تلك الصفات

ولكن نسب الخليط تختلف من شخص لآخر

هل انت راضٍ بما قسم الله لك من رزق؟

الحمد لله تمام الرضا

هل تحب ان تُقدم اليك النصائح؟

لا

لا احب ابدا اسلوب التوجيه

لكن ان كانت النصيحة مقدمة في سياق حوار ونقاش

يبقى اقتناع واتقبل التراجع عن رأيي والأخذ بالرأي الصواب

لكن فعلا ما احبش ان حد ينصحني بشكل مباشر وممكن اعند

هل انت كثير الكلام؟

نعم

هل تفكر كثيرا في نظرة الناس لك؟

لا

هل تغضب لنفسك وتنتصر لها دوما؟

اغضب لها

وانتصر لها احياناولكن ليس دوما

هذا يتوقف على من الذي انتصر عليه لها

هل تمدح نفسك وتدافع عنها ولا تحب ان يعاب عليك وتسوق المبررات لكي تكون الصائب دائما؟

اعتقد اني افعل هذا

هل تغتاب الناس ولو بقلبك؟

في حياتي اشخاص كثر فعلا اشارك في ان اغتابهم مع آخرين

ولكني لا افعل بيني وبين نفسي ولكنها التجمعات

ولكن نهايةً افعل

هل تحب ان يُنتقص بضم الياء الناس امامك؟

لا احب ان يُنتقص الناس امامي ولن اقول انني امنعه

لانني احيانا كثيرة اشارك فيه ولكنني الوم نفسي كثيرا

ومع ذلك اشارك فيه بيكون في اسباب لكنها مهما كانت لا يجوز ان تبرر ما افعل

هل تقبـل النميمه وتحب نقلهــا؟

لا

انا قسمت الأسئلةعلى مرتين لانها طويلة

وللحديث بقية