ابحث عن صوتك واوعى تسيبه حس انك ممكن تغير حاجة
حتى لو مش مقتنع اوى على الأقل تبقى حاولت
التجربة في حد ذاتها بتمنحك احساس بانك انسان ايجابي
نوعا ما حتى وان جاءت النتائج كما توقعت
اعمل اللى عليك
لو مفيش حد من وجهة نظرك يستحق صوتك
روح باردو وافسد صوتك علشان ما يتمش استغلاله
صدقونى التجربة والمحاولة حتى لو النتيجة ليست المرجوة
بتترك اثر ايجابي فى النفس
أنا عن نفسي الدورة الفائتة ذهبت فى المرحلة الأولى
كانت الامور عادية وادليت بصوتى
وفى مرحلة الإعادة ولاننا كان لدينا مرشح اخوان
كان الشغل على عينك يا تاجر
لان محافظتنا كانت مرحلة تالتة
يعنى الحكاية كانت خربت والحكومة يا قاتل يا مقتول
وقالوا للقردة اتبرقعى قالت وشى واخد على الفضيحة
ايه المثل دا
ماعلينا مالكومش دعوة بيه خالص ولا كانكم شوفتوه
المهم يعنى فى الإعادة بقى بكل بجاحة قصدى بكل صراحة
اللجان الحريمي اتبرشمت
و لما تشوفى حلمة ودنك بقى علشان تدخلى تحطى صوتك
وبالتالى الرجالة سابوا لجانهم والتفوا حول لجان الحريم
والمواضيع كيرررررررت اوووووووووى
هتفنا بقى ننادى على الصحافة والاعلام
وكان في مراسلين اجانب
والوضع تفاقم وهوب يللا حرقان فى الزور
والدنيا بقى لونها مدخن
واثناء الجرى ايه دا يا بنتى اللى بيحرق فى الزور دا
يكونش دا يا بت الغازات المسيلة للدموع
والله يا بت يا شوشو ودخلنا التاريخ وبقينا ضمن المناضلين
وبنجرى من الأمن المركزى ورا المدارس فى الأراضى الزراعية
نفسي اتقطع جرى يومها لحد ما وصلنا أطراف البلد
ودخلنا قلب البلد من
اطرافها البعيدة وعربات البوكس انتشرت فى الشوارع
وهاتك يا لم بقى فى البشر
كل دا ورغم انى ايامها قلت توبة من دى النوبة
بلاش بهدلة وقلة قيمة
لكن التجربة رغم الاحساس بالاهانة وقتها
الا انها تركت فى نفسي اثر ايجابي انى حاولت
ولازم ما اتنازلش عن حقى واحاول تانى
حتى فى الاستفتاء الرئاسي رحت وعلمت على لا
رغم انى متاكدة ان دا مالوش اى تأثير
بس قلت لنفسي انا بقى حرة فى صوتى
ولازم اروح واقول لاء نفسي اقول لاء ورحت وقلتها
كل الرغى والدش دا يعنى لو حد دخل وقراه
علشان نقول يا جماعه كل واحد يحاول يدور على صوته
ويقيد نفسه فى الجداول الانتخابية
اكيد فى يوم هيكون لها تأثير
ابسط حاجة حقنا اننا نكون مثبتين فى تواجد البلد دى
مش نبقى عايشين وفى السجلات مش موجودين
ومن وحى الهرتلة دى كلها
اتفركشت فى دماغى شوية جمل كدا
خدوها اهى
صوتك دا حـــق مشــترك لكل واحــد فى البـلد
لـو لسه نـايم فوقــه مش وقته خالـص يتخمــد
اثبت صحـيح انك ولد من صلب ابوه وأمه اتولد
شـــارك بصــوتك يمكــن في يــوم نحيي البــلد
خــايف تـروح ويقفشوك وبايد كلابهــم تتجــلد
يا عم هيصيبك فقط اللى أمر بيه الواحد الأحد
جـرب يا سـيدي وأهـى تبقى ذكـرى لولد الولد
صوتك دا فين ؟ وبطاقته فين ؟ دور وطلع مستند
سجل بسـرعة فى الكشـوف علشان انتخابيا تتولد
وتبقى ناخب بيك مُعترف وتحـط صوتـك لأجل البـلد
يا عم جرب
4 comments:
ايه النشاط ده كله
بالراحة علينا شوية
انا مقدرش ع النشاط ده
عشان كده لازم اعلق تانى ع الموضوع
سلام مؤقت
بسم الله ما شاء الله
تالت موضوع ليكي بعد الرجوع وكمان فاتني اتنين منهم
حمد الله علي السلامة يا ما علينا
نورتى مدونتك وأشرقتيها من جديد
بالنسبة للبوست .. معاكي في كل كلمة .. عندك حق حتي لو مش هيتأخد بكلامنا ولا بأصواتنا بس ما نكونش سلبيين
ضحكت علي مغامرتك والجري اللي جرتيه في اليوم دا .. حسسني أني بأشوف مشهد من فيلم سياسي
وشوية الجمل-علي حد تعبيرك- اللي تحت دول في الصميم جدا .. أحييكي عليهم
كل التحية وحمد الله علي السلامة
انا معاكى فى كل كلمة قولتيها
بس انت عارفة ساعات كتير اليأس يتسلل الى نفسى
حلوة اوى الجملة دى
ما علينا
بجد انابحب جدا اشارك فى الانتخابات او اى حاجة تغير الظلم اللى احنا فيه
بس لما بحس ان صوتى مالوش قيمة بتضايق جدا
عشان كده فكرت انى اقاطع الانتخابات
بس برده اكيد هرجع فى كلامى ولازم اشارك
حتى لو هبطله زى ما بتقولى
على فكرة نفس اللى حصل عندكم فى انتخابات 2005 تقريبا حصل عندنا
برده كنا مرحلة تالتة زيكم وكان عندنا مرشح اخوان
والحمد لله هوالمرشح الوحيد اللى نجح فى المحافظةمن مرشحين الاخوان
وبرده كان فيه اعادة
وفى الجولة الاولى كانت اللجنة الوحيدة اللى كانت تقريبا مغلقة
كانت اللجنة اللى انا فيها
هما كانوا مدرستين جنب بعض واحدة رجالى وواحدة حريمى
اكيد كان عندهم خبر ان اسمى فى اللجنة دى عشان كده قفلوها :)
ومعرفتش ادخل المرة دى كان الامن ما شاء الله زى العدد فى اللمون
وامن الدولة واعوانهم كانوا مالين البلد
بس فيه ناس كتير عرفت تدخل والحمد لله حصل اعادة
وفى الاعادة كل اللجان اتقفلت
والامن زاد ومفيش حد داخل ولا حد خارج
المهم انا كل شوية رايح جاى عايز اخش
ولقيت عميد شكله طيب قلتله يا افندم انا هنا م الصبح وعايز ادخل
دخلنى انا وتنين معايا
وبعد ما عديت م الكردون بتاع الامن
قابلنى بتوع امن الدولة والظابط يقولى
مين اللى دخلك قولتله سيادة العميد
قالى عميد مين يا ابنى روح يللا
رجعت تانى للعميد واقوله الظابط مش راضى يدخلنى
لقيت العميد خاف وقالى بس روح انت وهو يدخلك
قلت قشطة حتى عميد الشرطة خايف من حتة ملازم امن دولة
المهم روحت للظابط تانى
ويهديك يرضيك يقولى القضاة بيتغدوا
المهم قالى خلاص هدخلك بس حاول تروح الستات اللى واقفين دول
قولتله هحاول
المهم دخلت وحطيت صوتى
وانا خارج قالى يلا مشى بقى الستات دى
قلتله معرفش
ما ينفعش
لقيته اتجنن وبيقول للى جمبه شفت انا غلطان اللى دخلته
سيبته يخبط راسه فى الحيط ومشيت
وكنت فرحان جدا ان حطيت صوتى
وفعلا حسيت انه ليه قيمة وان انا عملت حاجة كويسة اوى
لان تقريبا مدخلش غير 10 اصوات من كام الف صوت
وكنت مبسوط من الناس اوى لان كان فيه كتير عايزين يدخلوا
بس طبعا الامن بدا يضرب غازات مسيلة للدموع وهددوا بضرب رصاص حى
طبعا كله جرى
لاننا كنا رجالة ووقفنا وقفة رجالة
بس بعد كده جت انتخابات احبطتنى
زى الاستفتاء على تعديل الدستور
والمحليات ومجلس الشورى
وراجع اقول فى الاخر مفيش فايدة
انت عارفة اوقات كتير بيبقى عندى نفس الحماسة اللى عندك
واوقات تانية ببقى يائس جدا
وخصوصا م الشعب قبل الحكومة
والله لغاية دلوقتى ما انا عارف اشارك ولا لأ
ولا انت ايه رايك
بعيد عن الموضوع انا عازمك على مجشاى وقرص بنادول
عشان اكيد صدعتك
سلاااااااااااااااااااااااام
Post a Comment