مش هدية مني لكم طبعا
ربنا انعم على برغبتي في كتابته
ودي نعمة كبيرة اني بقى عندي حاجة قادرة اسيطر عليها في دماغي
واقرر اني اكتب عنها حاجة كدا يبقى لها راس ورجلين تتشاف وتتفهم ويبقى لها معنى
بعيدا عن محتويات رأسي من افكار غريبة يجدها الكثيرون أفكار شاذة
يا خبر اديني هاسرح بيكم واشت ندخل في الموضوع
هو موقف بسيط جدا حصل معايا النهارده انا مش مستغرباه
لكن سعيدة بيه جدا وبيحصل امثلة منه كتير معايا وقدامي
فقلت موقف ينصف البشر ويثبت ان لسه في شهامة ونخوة وذوق ورجولة
خاصة عند الشباب ربنا يسدد خطاهم جميعا ان شاء الله
وطلعت في دماغي اني لازم اكتبه برغم انه مش غريب ولا حاجة
وابدأ بقى احسن ما تبداوا تقفلوا الصفحة من كتر رغيي
دا للي لسه ما قفلهاش طبعا
حضرتي
واقفة على الطريق عند مدخل قرية صغيرة تابعة لبلدتي الصغيرة ايضا منتظرة ميكروباص
وطبعا سيادتي تحت اي ظرف مش باركب ورا نهائي
دايما متأرننة وواخدة الكرسي اللي قدام كدا ملاكي
ولا باركب جنبي بنات ولا رجالة
لكن في موقف زي دا وكنا خلاص الساعة خمسة قبل المغرب
وعلى طريق يعني العربيات اساسا بتعدي محملة
لا املك خيار ولا فاقوس
المهم وقف ميكروباص فيه مكان واحد بس فاضي في الكنبة الاخيرة
طبعا كلكم فرحانين في مفيش داعي للشماتة
ارحموا عزيز قوم ذل من قدام خالص لورا خالص
المهم
الكنبة فيها اتنين رجالة
اللي ناحية جوا ما شوفتش وشه كبير ولا صغير
الأولاني بقى راجل كبير في الخمسين تقريبا قاعد بقى مش بيتحرك
فباقوله لو سمحت تيجي كدا على أساس اني مش اقعد بينهم
يقوم موسع لي و رايح جنب الشباك
وسعوا لي المكان اللي في النص
قبل ما يكون لي اي رد فعل
كنت طبعا هاكرر عليه طلبي على اساس اني احرجه
وماكانش هايحرج طبعالانه لو ناوي على احراج كان احرج من البداية
ماعلينا
لقيت شاب من الكنبة اللي قدامهم قالي طيب حضرتك تعالي هنا ورجع هو وسطهم
قلتله متشكرة جدا وقعدت
اد ايه كنت سعيدة بيه وبذوقه وبسرعة رد فعله
حسيت انه تعامل معايا كاني حد يهمه زي ما الفروض يحصل بين الناس
استنوا بقى
ما حدش يقول يمكن عاوز يقعد ورايا لغرض في نفس يعقوب
ولا بيلفت النظر والكلام دا كله
لاني اولا هدومي مجرجرة وخماري لحد ركبتي تقريبا
ونقابي مغطي عينيا كمان يعني الدنيا ضلمة ضلمة
هو انسان محترم وعنده شهامة وذوق زيه زي شباب كتير
وعن خبره في المواصلات الشباب بيكونوا اكثر احتراما
وحياءعن كتير من الرجالة الكبار اللي لو قلت لواحد لو سمحت
توسع شوية تسمع وصلة من البستفة
والله مرة واحد كبير
كنت قاعدة قدام كنت لسه متواضعة شوية وممكن اركب حد جنبي
والعربية دخلت الموقف وانا بقى كنت راكباها من برا الموقف بمسافة علشان ما اتبهدلش في الزحمة
واللي جنبي بينزل في الموقف وقبل ما انشن على بنوتة اركبها جنبي
لقيت حاجة كدا
طول بعرض وشلة اكياس طماطم على كنافة على فاكهة كنا في رمضان
وركب قدام وحط اكياسه تحت رجليه وهو بقى ايه شلولح تخيلوا انتم بقى
انا وقفت ابص للحتة اللي باقية من الكرسي اللي المفترض انا هاقعد عليه
كان الاحسن اقعد في الشباك وادلدل رجليا
وبكل هدوء
لو سمحت يا عم الحاج شوية علشان اعرف اقعد
وططاطا
وش احمر
وعيون مبرقة
صايم بقى واحنا العصر
ما اهووو هو دا مش هاياخدك هو انا هاكلك
هو في ايه
يا سنة سودة على القنزحة يا ولاد
هو احنا ما خلفناش
دا احنا عندنا بنات تحل من على حبل المشنقة
دا انا وانا
وانا بقى
يا عم الحاج ما تعليش صوتك
ولاحظ اني محترمة سنك وبلاش تضطرني اغلط فيك
المهم السواق تدخل وشده ناحيته شوية وانا ركبت
ايه دا هو انا ايه خلاني احكي الموضوع دا
ومنه كتير جدا
علشان كدا بقيت اخد الكرسي وبارضوا باسمع اللي فيه النصيب
المهم زي ما في دا في نماذج ممتازة وغالبيتها بيكون من الشباب الصغير
يللا بقى كفاية كدا علشان اللي بيطالبوني اكتب يحرموا
وما حدش يزهق كلكم عارفين ان اهتمامي الاول الناس وتصرفاتهم
يللا سلام يا بشر
70 comments:
بعد السلام عليكم
سبحان الله .. برضه أول تعليق .. غريبة والله
شكلك كده فيكي شئ لله
أنا في الطبيعي دايما بزور المدونات متأخر بحكم انشغالي شوية
لكن انتي دايما ما يحللكيش الكتابة الا في الساعة اللي أنا قاعد فيها وبتابع الجديد للمدونين
شكلي كده واخدها وضع يد
تعرفي ده هي كده طبيعي والله .. مش برنامج تنظيم قراءة المدونات يعني
يالا مايغلاش عليكي ياستي
أيه الرغي ده .. ادخل بقي في البوست اللي جه بعد غياب ده
دايما اقول أن أي مكان في الدنيا حتي لو متر في متر هتلاقي فيه الكويس و هتلاقي فيه الوحش
مهما طال الزمن وزادت المطامع و المساوئ هيظل الخير موجود و قائم
والله عمل الخير ده بيزرع جوه الواحد راحة غريبة جدا .. وكفاية فرحة البني ادم اللي انتا ساعدته بيك
لما ساعات ببقي راكب المترو و تعبان ولقيت كرسي وقعدت عليه .. و تيجي واحدة ست كبيرة و اقوم عشان هيا تقعد .. مش باحس بالتعب خالص ولا باشعر به .. و سعادة كده بتغمرني بأن لسه في خير جوايا .. وأني لسه قادر اعمله
ساعات كتير اوي باحس من تصرفات الناس بالغرابة و التناقض .. يعني مثلا عايز اسأل سؤال بخصوص موقف الراجل الكبير ده
ياتري
لو بنته كانت مكانك كان يقبلها كده؟
بالنسبة للشاب
لسه كتير جدا والله يا ماعلينا .. لسه شباب كتير عندهم مبادئ وأخلاق و بيحفظوا عليها
وأن كانت الناس شايفة أن القطاع الاكبر منهم بايظ و غير مسئول .. الا أن ده مش هيغطي علي الشباب اللي من فئة الشاب الشهم ده
أد أيه البني أدم ممكن يعمل موقف جميل صغير مش هيكلفه اي تعب .. ولكنه يجبر كل الناس علي احترامه
تحياتي ليكي
ومتنسياش تبقي تتابعي ردودي علي تعليقات البوست الاخير
يا رييت يا باشا تشوف التفاصيل البواقي بتاعخ مسابقه رمضان عشان انت الفايز التالت يا عم الباشا وربنا كده يكرمك ..هي الجايزه تكون صغيره إن شاء الله بس بعون الله..تفرح بيها وتنفعك
هو البوست ده هدية لمين يا جميلة؟؟
ع العموم يا ستي كلنا عارفين ان فعلا الخير لسه موجود فى قلوب الناس حتى لو حتة خير صغيرة بس اهو موجود الحمد لله
وعارفة بقي ده كله علشان الحاجة بتدعيلك وتقولك
ربنا يوقف لك ولاد الحلال
هه؟؟
ربنا يكرمك ويعينك
طبعا الشهامة موجودة بس الحياء يقل في الكبار شيئا ما لأنهم أصبح لهم ذمتين ذمة أبوية وذمة رجولية
بمناسبة البنات اللي يحلوا من على حبل المشنقة
خدي الهدية دي
من يوميات سقراط
السلام عليكم
ربنا يفرح قلبك
هدية حلوة انه لسا في شباب محترم في الوطن العربي
هم كتار بس مابيبانوش
الا وقت الزنقة
اللهم احفظ من حفظ عرضك يا رب
انا خايف اعلق عندك
عشان هتقوليلى دا تعليق قصير
وانت لسه عاملالى محضر من يومين عند ابو سويلم
قلت اكتب كلمتين كده بسرعة
وان شاء الله
استنى منى تعليق طويل
سلااااااااااااااااااااااااااااااااااااام
السلام عليكم
الدنيا لسه بخير يا ولاد
ههههههههههههه
بس والله في ناس محترمين قوي قوي بلدنا لسه برضه محتفظة بشوية
بس والله جدعه انك بتركبي من قدام وتاخدي الكرسين
ناصحه بجد
ومرحبا بعودتك وتجيلك هدايا تاني قريب ان شاء الله وتكتبيلنا
قال نحرم قال
ده انا ما صدقتش نفسى لما لقيت البوست
وما صدقتش نفسى تانى لما لقيت البوست متوسط الطول او اقل من المتوسط كمان
ما علينا
انت عارفة الموقف يتاع الشاب الجدع اللى حصل معاك ده فكرنى بموقف شهامة من مواقف الشهامة الكتيرة اوى اوى اللى انا باعملها
وطبعا لله مش علشان يتقال اى حاجة
المهم
فى يوم كنت واقف وعاوز اعدى الطريق بالعرض والعربيات سريعةومش بتهدى
خالص
المهم جت انسة جميلة ومعاها اختها الصغيرة ووقفوا جنبى علشان يعدوا الطريق
وفجأةالبنت الصغيرة سابت ايد اختها الحلوة ونزلت من على الرصيف وجريت نا حية الطريق
طبعا اختها الحلوة من غير تفكير جريت وراها علشان تنقذها
وفى نفس اللحظة بابص لقيت عربية جاية بسرعة شديدة عليهم
قام العبد لله نازل من على الرصيف وجريت بسرعة مهولة ومسكت البنت الصغيرة بايدى اليمين واختها الحلوة بايدى الشمال
وطبعا ضميتهم جامد علشان ما يفلتوش من ايدى
والحمد لله ساعتها السواق اخد باله والعربية وقفت
واول ما العربية وقفت لقيت اخويا بيقولى
اصحى يا ابنى بقى
مش كفاية عليك نايم طول الطريق
تمت
شكرا
بس بجد
انت طالما عاوزة تعفى نفسك وتبعدى عن الشبهات
اكيد ربنا هيساعدك ويسيرلك اللى يساعدك زى الشاب الجدع ده
وبعدين انا ما اتصورش ان الشاب ده كان ممكمن يعمل نفس الحركة مع واحدة مدلعةنفسها فى اللبس
ولا ايه؟
علشان تصدقينى لما ابقى اقولك
اننا كنا رجالةولسة رجالة
احنا عاوزين نخدم بس
ياريت بس ما تقعديش على حس البوست ده شهرين تلاتة
ايه رايك
تعليق طويل لم يسبق له مثيل
سلام يا غالية
الصراحة لما شفت تعليق ابو سويلم
خفت اكتر
وقلت مش هاقدر اكتب كلام كتير وحلو زى كلامه
ربنا يعينى واعرف اكتب تعليق طويل
اللى اقدر اقوله لك
رجالة وطول عمر ولادك يا بلدنا يا رجالة
اكيد لسه فيه شهامة ورجولة
الرسول عليه الصلاة والسلام قال
الخير فى وفى امتى الى يوم الدين
وقال فى اهل مصر
هم فى رباط وذمة
صدق رسول الله صلى الله عليه وسلم
انا مبحبش اتكلم عن نفسى كتير
واقولك انى شهم والكلام ده
بس بجد عايز احكيلك على موقف زى اللى حصللك
وضايقنى راجل كبير زى اللى قابلتيه
كنت رايح اركب عربية من الموقف
ولقيت واحدة زميلتى من ايام الثانوية
راكبة وجنبها مكان فاضى
مرضيتشى اركب جنبها عشان تركب هى براحتها
وركبت انا فى مكان ضيق
المهم
لقيت راجل كبير فى الاربعينات
قعد جنبها وزاحمها
انا زعلت جدا وحسيت ان هى كمان زعلت
قلت لنفسى ياريتنى ركبت انا جنبها
مش عشان حاجة والله
بس حسيت ان هيا اختى وكنت عايز احميها
بعيد عن الموقف ده
الخير لسه موجود فينا فعلا
وان كل يوم بشوف مواقف زى دى
انا فاكر ايام الكلية
كنت فى القاهرة
كنت بقابل مواقف كتير زى دى
فى المترو واتوبيسات النقل العام والميكروباصات
نسيت اقول لك
مبروك ع النقاب
ربنا يحميكى
ويزيدك رجاحة عقل وتدين
ويهدينا جميعا
بيتهيالى ان ده تعليق طويل
ولا انت شايفة ايه
سلاااااااااااااااااااااااااااااااااااااااااااااااااااااام
سلامو عليكو
فعلا الدنيا لسه بخير
النماذج دى موجوده لسه
اللى عجبنى انت استثرتى كل واحد انه يذكر مواقف الشهامه الى عملها فعلا الدنيا لسه بخير
بس انا كان نفسى اذكر شهامتى بس لا الوقت ولا المساحه هتسعفنى
بس انى الموقف معاكى كان شهامه ميه فى الميه انما صدقينى لو حده تانيه من بنات اليومين دول يعنى مثلا اللبس
مش ولابد صدقينى الشاب هيقوم بس مش شهامه منظره وجذب انتباه يعنى اللبس والاحترام بفرق
وبعدين بالرجال لما يكبرم بخنقم اسألينى انا تخنقت وكرهت نفسى بس أعمل ايه والدى هى كده النظريه الى انا وصلتلها انا ودكتور كسلان الطفل من 4 الى 8 سنيس والرجال بعد الستين حاجه لاتطاق
وبالنسبه للكرسى اللى قدام فكرتنى بمره راكب قدام وكان فيه زحمه ولقيت
واحد جاى يفتح الباب شاورت بطرف صبعى وقولتله مخصوص
لقيته فتح الباب وقال لى عاوز تتمنظر انزل خد تاكسى وكان منظرى وحش
بس بوست حلو والى احلى زى ماقولت قبل كده مواقف الشهامه اللى عملها الرجاله
انا أيام الدراسه فى القاهره كنت مقضيها شهامه فى المترو بس بصراحه مع الناس كبيره عشان محدش يقول منظره
وبهنيكى على النقاب
وسلام
على فكره انت اكيد كويسه
عشان كده ربنا يوقفلك ولاد الحلال
الشعب المصري طول عمره جدع ومية ميةوبلاش اقولك الجدعنة دي بتظهر بصفة خاصة لما بنكون في المترو وبنوتة تقوم لراجل مسن واتلشباب قاعدين محافظين على نفسهم من اي مضيقات
شوفي با ستي
بما انك محاسبة قد الدنيا
الحياة عبارة عن معادلة ضخمة و معقدة جداً جداً
.
.
لكن التحكم في مخرجاتها يكون عن طريق واحد فقط ليس له بديل
.
.
هو المدخلات
.
.
هي دي الخلاصة وكما تقول الآية
وما تقدموا لأنفسكم تجدوه
.
.
ربنا يكرمك ويوقفلك ولاد الحلال دايماً
.
.
رجااااء خاااااص
متتأخريش علينا كتير
السلاك عليكم
ازيك يا ما عليما
طبعا الشهامة في الشباب علي طول... احم
والمجدعة المصرية هتلاقيها موجودة
يمكن ديه حاجة من الحجات الجميلة اللي لسا متخلناش عنها
وهي الشهامة والمجدعة
الموضوع جميل
جزاكي الله خيرا يا ماعلينا
abo salah
مش باقولك اكيد انت واخدها ايجار قديم
وعموما يا ابوصلاح المقصورة دايما منورة ومتشرفة بيك
وانا معاك
ان كل مكان وكل زمان فيه الحلو وفيه الوحش
وانا عندي قناعة ناتجة من تجارب وخبره شخصية
ان الشباب اكثر حياء وشهامة ونخوة من الرجالة الكبار
ووالله العظيم يا ابو صلاح
فعلا اد ايه الواحد بيفرح لما يعمل
حاجة خير ويكتشف ان جواه في جزئية كويسة بتحب الناس وتحب تسعدهم
ويا عم انا رحت قريت الرد من غير ما تقول
وبلاش بقى الابداعات الجامدة دي
علشان دخلت الناس مود مش حلو
يعني انت تفن وتبدع واحنا نتنكد
سلام يا ابو صلاح
ياسر مدني ...دينامو الإخوان
مش عارفة ليه يا اخ ياسر
انت مصر اني شاب
والله العظيم
انا ختك
وبدل ما تقولي يا عم
قولي يا عمة بفتح العين مش بكسرها
كل سنة وانت طيب
تخاريف دكتور
مش لك يا تخاريف
وبعدين يا سيدي عارفة طبعا ان الحاجة بتدعيلي
ومالك كدا انت عاوزها تدعيلك انت ولا ايه
راضي الحاجة اللي عندك
وما تزعلهاش وهي تدعيلك
وترضى عنك
دي شاكية لي منك مر الشكوى
ماشي
هه؟
عصفور المدينة
ربنا يكرمك ويعزك ايما ان شاء الله
فعلا اصبح شيء ملحوظ جدا
ان كبار السن
ومش كبار السن اوي
الرجال بداية من الاربعين تقريبا
او فوق الثلاثين
تلاقيهم كدا حياءهم
راح فين مش عارفة
طبعا مش الكل
لكن شريحة كبيرة منهم
وبصراحة
يوميات سقراط
خير مثال ودليل
وحلوة اوي
ان بنته راجل دي
ولا ابن عمه اللي متجوز راجل
شرفتني حضرتك جدا بالتعليق
ربنا يعزك دايما ان شاء الله
Nani
وعليكم السلام ورحمة الله وبركاته
ربنا يبهج قلبك ويبشرك بما يسرك ان شاء الله
ربنا يجازيكي خير على دعائك الجميل
وفعلا الشباب المحترم موجود
وبيظهروا في الموقف فعلا
ربنا يحفظنا ويسترنا جميعا ان شاء الله
دكتور كسلان
يا دكتور
قبل كدا قلت لك
انت براحتك خالص
وبعدين احنا متفقين ان العبرة مش بطول التعليق
العبرة بمحتواه
يعني براحتك خالص
انا يهمني تكتب الرأي اللي بيكون في بالك
بعد ما تقرأ البوست
حتى لو كلمتين بس
على حسب البوست ما يستحق وبس
ومش لازم البوست عندي يستحق تعليق طويل
زي بوست عند حد تاني
يا دكتور انا احيانا باكتب تعليقات في مدونات
اطول من البوستات اللي انا باكتبها
وفي مدونات بيكون تعليقي فيها
قصير
فهمتني يا باشا
انا بس باغتت عليك
ومش هابطل اعملك محاضر
حتى لو علقت تعليق طويل عندي
خلاص بقى ما انت بقيت مسجل
تعليقات
mohand
الكل يبارك للاخ مهند يا جماعة
على الخطوبة السعيدة
الف مبروك يا اخ مهند
اضحك يا عم براحتك
وطبعا البلد مليانة رجالة بجد لسه
وناصحة دي بجد ولا تريقة
ما هو الواحد لما بيبقى خبرة مواصلات
وبيسافر بشكل يومي
وحفظت نمر الميكروباصات اللي على الخط
وباقف انتظرهم دايما وهم داخلين الموقف يحملوا
بانتظرهم في اماكن الناس بتقف فيها
بس انا متفوقة بحفظ النمر
علشان كدا باعرف عربيات الخط من بعيد
وقبل ما البس النقاب بقى
كان كل سواقين الخط حافظين شكلي وعارفين اني باخد الكرسي لوحدي
ودا طبعا بيبسطهم
اجرة نفر وزنه بيخف من العربية
ويحجزولي
تعبت شوية بعد النقاب
لكن تخيل مع الوقت عرفوني
من مكاني اللي باقف فيه
ومكان نزولي
والمشكلة اتحلت
ورجعت تاني
اركب بعيد عن الزحمة
ولو في زحمة
المكان بيتحجز لي لحد الدنيا ما تروق وادخل اركب في هدوء
وطول الطريق
اسمع وصلات عن الذوق والزحمة
وليه يعني
وما تاخدلها عربية مخصوص
وهو في كدا ومش كدا
بيقولوا لمين دول
وانا مالي
وبعدين اكتب ايه بس
مش كفاية التعليقات
انا باشطب بنزين فيها خالص
لاني بارغي كتير
مبروك مرة تانية
أبو سويلم
الغالي
المهم ي الموضوع كله ان اختها الحلوة
جريت راها بدون تفكير مما دفعك
انت كمان للجري وراهم بدون تفكير
طيب يا عم كنت اجري ورا الصغيرة بدون تفكير
ولا انت ما كنتش واخد بالك ان البت نزلت جري للطريق
ما انت كنت بقى مركز مع الحلوة
بس قصة حلوة
وبعدين طبعا طول عمركم رجالة وبتقفوا وقفة رجالة
وانا عند رأي طبعا ان الشاب دا وزيه كتير محترمين جدا
وممكن لبسي طبعا ومظهري له دخل كبير في تصرفه
لكن للاسف لبسي واحتشامي ونقابي
ما بمنعش نماذج موجودة من انها ممكن تتعرض لي بالمعاكسة
اللفظية او التلميحات
قولي انت بقى المظهر المحترم
كان ايه تأثيره
وان شاء الله هاحاول ما اغيبش
ربك يسهل ويرزقنا
بهدية تانية كدا
اللهم امين
وشكرا على التعليق الوصاية
دكتور كسلان
يا عم احكي وقول
انا نفسي كل شاب عمل موقف كويس مشابه يحكيه
علشان الناس معنوياتها ترتفع
وبعدين هو مفيش شهامة غير في دمياط ولا ايه
وهو اللي انت بتحكيه دا اللي انا اقصده يا دكتور
شايف انت زعلت ازي على زميلتك وحسيتها اختك
ونددمت انك ما قعدتش انت جنبها
لانك اولا ما كنتش هاتزاحمها
بل كنت هاتبقى حريص على انك تكون موفرلها انها تكون مرتاحة في مكانها
ودا انا جربته كتير
مع زملا ومع شباب ما اعرفهمش
ا اعرفش
باحسهم بيتكسفوا
يمكن بيخاف البنت تحرجه بكلمة ولا حاجة
ومان كان زمانك جنبتها غلاسة الراجل الكبير
اللي قاعد بقى ولا في دماغه ان دي
بنت ولها حرمتها وكدا
يا عم باقولك الراجل بستفني
وكان فاضله شوية ويضربني
ا وما كنتش منتقبة
عارف لوقت وانا بالنقاب
على فكرة النقاب مش جديد
دا انا منتقبة من زمان الحمد لله
المهم لو حد جنبي ولسه بس هادير او ابص اقول حاجة
او اتأفف
تلاقيهم هجوم
وكانهم بقى وجدوا فريسة
هو انتم كدا
هو احنا هاناكلكم
وووووو
وشكرا يا عم على التعليق الطويل
واي خدمة
ردين طوال اهم
سى السيد
طيب ليه كدا بس
انا كنت عاوزة اشوف باقي شهامة دمياط
ليه تبخل علينا
واي خدمة شباب بلدكم رافعين راسكم اهو
وانا معاك في موضوع اللبس
بس ممكن تلاقي ناس ولا بتحترم مظهر ولا غيره
وفي ناس محترمه وبتعمل اللي شايفاه صح بغض النظر عن اي حاجة تانية
يعني حتى لو واحدة مدلعة نفسها ممكن الشاب يعمل نفس الموقفمن غير ما يقص المنظرة ولا حاجة
لا معلش بقى ما تاخذنيش في موضوع الكرسي دا
يقولك خدلك تاكسي وما اعرفش ايه
وانت نزلت
والنعمة انا بيتقالي اكتر من كدا
ولا كاني سامعة
في مرة
جيه
راجل كبير برضوا موظف في الخمسين تقريبا
والعربية واقفة في الموقف وفاضية خالص من ورا
وقالي حد جنبك يا ابلة
هزيت دماغي بالايجاب
يقوم يقولي مين
طيب وانت مالك
ما رديتش
وجيه واقف بطريقة سخيفة جنب الباب
وقال يب انا بقى هاستنى اشوف مين اللي هايركب هنا دا
السواق كان رال كبير وعارفه
فقالي ركبيه وخلاص يا ابلة معلش علشان خاطري
وانا بقى
لا ياعم سيد ماهوش راكب
وانا بقى واخدة الكرسي احط فيه شنطة ايدي
وبس
هو بقى واقف دمه محروق
معتقد اني بانقي حد يركب جنبي
وجات بنت سالتني حد معاكي قلت له خالص
وانتظر العربية حملت وركب زيادة ورفض يدفع الاجرة
وقال العربي 14
والسواق معاه 1 اجرة
شوفت تباتة اكتر من كا
وطول السكة دروس في الذوق والاخلاق
ويغلط السواق
يقوله المفروض انت تقول مفيش حجز في العربية
وفي من دا كتير
وانقح وانقح
يا باشا انا كنت في عبود
وسيبت العربية اللي بتحمل
وربت اللي وراها علشان اخد الكرسي اللي قام لوحدي
سفر ساعتين بقى
المهم السواق اللي قبل العربية شد مع الراكب اللي قدام
كان عاوز ينزله ويناديلي اركب طالما هاخد الكرسيين
حظه المهبب انه طلع ظابط داخلية
واتفرج بقى على الظابط وانتكته
السواق طبعا قلة ذوق منه انه كان عاوز ينزله خاصة اني خلاص ركبت عربية تانية
السواقين كلهم عارفين الباشا ما عدا السواق تعيس الحظ دا
المهم بعد ما هزأه
حلف ما هو راكب معاه ونزل
وبعت لي سواق دا الظابط
ينزلني اركب انا مكانه في الكرسيين علشان هو يركب العربي اللي انا فيها
والسواقين بقى يا عم
جولي ويا استاذه واحنا بنحل مشكلة
قلت لهم انا مش نازلة انا لما باركب في عربية مش بانزل منها
دا اولا
ثانيا يا جماعة
هو طالما حطه في دماغه يبقى خلاص
راحوا قالوله مش راضية تنزل
جيه متعفرت
و يحرق موقف اليكروباص على اللي فيه
وشتيمة ظباطي بقى
وانا كنت متحفزة قلت خليه ييجي
وكنت ناوية امسح بكرامته الارض
لكن فوت على الفرصة
يا خبر كل دا
وربنا يبارك فيك
النقاب من زمان
بس انتم ما تعرفوش اني منتقبة
وكله على راي تخاريف
بركة دعا الحاجة
ربنا يخليها
قلوب حائرة
اكيد الشعب المصري
فيه وفيه
مش كله حلو ومش كله وحش
ومرة تلاقي البنوتة جدعة
والف مرة تلاقي الشباب جدعان
القياس مش على موقف واحد
انا لما كتبت البوست
كتبته كمثال
لمواقف حصلت معايا مشابهه كتير وقدامي
وفي مواقف مستفزة
بس خلينا مع المواقف الحلوة
هو ايبقى كله
مساوئ مساوئ
مفيش محاسن خلاص
أنونيمس
ايا يا سيدي
وبما اني محاسبة
تحت التكوين لسه
دا انا فاضلي سنة بحالها
لكن خبرة مع البشر
فانا فاهمة المعادلة كويس جدا
والحمد لله على كل شيء
بس مش دايما المدخلات
بتكون متحكمة في المخرجات
لان دايما في شواذ
وفي نسب الخطأ المسموح بها
يعني احيانا بتلاقي المعادلة مع انك مظبط مدخلاتها وتمام التمام
الا ان المخرجات
بتيجي
غير متوقعة
لكن الحمد لله
دي
نسب بسيطة
وانا تحت امرك
ان شاء الله
ما اتاخرش
دا انا كنت ناوية اكتب لك بوست اعتذار رسمي هنا كمان
واهو يبقى منه اعتذار
واسكت الناس اللي طالبين
بوست جديد
باعتذر تاني اهو
لا مش تاني
كدا تالت باين
حط لي عنوانك وانا ابعتلك اعتذار في طرد
وانزلهولك كمان على مزيكا
وروتانا سينما
كله الا زعل الدكاترة
هو انا اد زعلكم
منورني دايما يا رب
الراقص مع الذئاب
وعليكم السلام ورحمة الله وبركاته
حمدا لله على السلامة
انت اجازة ولا ايه
نورت يا محمد والله
وطبعا شبابنا كله شهامة ورجولة
كفاية ان في امثالك
انت وباقي اخواني المدونين
اللي دايما منورني
يللا
اتغر براحتك بقى ولا يهمك
انا مياك تصريح
بس بعد كدا
عندك طابور ذنب
غلاسة يعني
ربنا يكرمك ويعزك دايما يا رب
هما الكبار بس تلاقيهم شايلين من دماغهم ان ممكن بنت تخاق علي نفسها منهم
يعني هيقولوا زي الراجل ده ده انتي زي بنتي فمش بيحاول يثبت انه مش هيعاكس
لانه شايف ان الناس المفروض شايفه ده
اما الشباب فعايزين يثبتوا حسن النيه
بالمواقف اللي بتذكريها
وفعلا البلد دي غريبه قوي
كل ما نقرب نكرهها
تحصل حاجه تاكدلنا اننا ماينفعش نكره الناس الطيبه دي
كل سنه وانتي طيبه ولو انها متاخر بعد العيد باسبوعين :)
آه تتعدد المواقف بين الناس و"نحن" الناس أيضاً
ولكنها دائماً تكون مخلتفة ولكن تبدو متشابهة جداً
أنا مش هخاف م المصير ولا خايف م القدر
ومخوفتش من ماضيا لكن بخاف م البشر
مع أطيب تمنياتي تركبي في عربية لوحدك إن شاء الله علشان ترتاحي من الناس دي أو تركبي مترو بقى
مستني زيارة للبوست الجديد
تحياتي
بعد السلالم عليكم الشهامه موجوده و هتفضل موجوده بس انا ليا ملاحظه
لسيه محدش يقعد جنبك و لو بنت ؟؟؟
انا ليا وجهه نظر اقعدي و ادفعي نفرين و لو لقيتي بنت مفيش مانغ تقعد جنبك
انا فعلا بقيتع اضايق من الموضه دي الاقي الراجل واخد الكرسي و رافض حد جنبه و البنت كذلك فكر ان في حد عاوز يروح زيك و مش لاقي وسيله مواصلات و خصوصا الموضه دي انتشرت مع الولاد خصوصا البهوات ؟( امناء الشرطه سابقا )
بقولك ايه يا أختي متغيريش الموضوع حضرتك كسبتي في فوازير رمضان اللي أنا كنت عاملها..ولو سمحتي كلميني عشان أعرف إزاي حبعتلك الجايزه وعلي العموم أنا اسف يا ستي أصدي يا عمتي
جنـه
انا معاكي
لكن لو بنته بقى وواحد في سنه مغلس عليها كدا
هيقولها دي زي ابوكي
وفي مقامي
ولا هايمسكه يهزأه
هم كدا بيكيلوا بمكيالين
وطبعا البلد دي مليانة حاجات جميلة وناس اجمل
دايما يا رب تنوريني بزيارتك
الأستاذ
يا باشا ومين قالك اني مش باركب المترو
انا بانزل القاهرة كتير جدا
وتنقلاتي فيها
اما بالمترو او بالتاكسيات
وباشوف العجب في المترو
وحالا اخلص ردود واثبت حضور عندك يا استاذ
Mohamed_sobhy84
اولا منور يا سيدي
والاستفسار دا انا كنت متوقعاه
وهاسألك سؤال
ايه يكون رد فعلك لما تلاقي بني ادم زيه زيك
بيتعامل معاك على انه اكثر احتراما
وكأنه بيقولك صراحة كدا
لا معلش انا ما اقبلش دا على نفسي
هاوضح اكتر
انا كوني باخ الكرسي دا ما جاش من فراغ
انا الاول كنت عادي باركب جنب اي حد
لكن وجدت اني بابقى متأذية جدا وانا راكب جنبي راجل واخد راحته على الاخر
ومش مراعي ان في بنت جنبه ولو اعترضت
ابقي قليلة الذوق ومتأنتكة
وبقيت ما اركبش رجالة جنبي
ولو رحت لقيت عربية فيها راكب واحد بس قدام ويكون راجل مش باركب واروح اركب اللي بعدها
لو بالاقي بنت عادي باركب جنبها بتنزل وتقولي تدخلي جوا
عادي باقولها عادي
خاصة واني اعرف كل سواقين الخط وانهم ناس غاية في الاحترام والادب
المهم
بدأت بقى اخد الكرسي ولما الاقي بنت جاية وتسألني
حد معاكي اقولها لأ
واجي انزل علشان اركبها
ودا طبيعي ان اللي بيكون موجود الاول بيختار المكان اللي يريحه
الاقي البنت من دول تقولي لالالالالالا
ادخلي انت جوا
فالكلام يضايقني
واقولها معلش انا مش بارتاح جوا
تقولي خلاص وبعد ما تنزلني
تيجي رايحة راكبة ورا
الموقف دا بقى حصل كتير جدا
قولي بقى انت
ايه وجه نظرهم
والله العظيم في بنات
تقف وتقولي ادخلي جوا وكانها بتؤمرني
جط نفسك مكاني
ولما ارفض تيجي راجعة راكبة ورا
وممكن تلاقيها تتحشر في وسط رجالة
الموقف دا كان بضايقني جدا واقول
دي واحدة مش هي الفيصل
بقى بيتكرر بقى
وبالتالي
اخدت قراري النهائي
اني باخد الكرسي
ولا اركب دول ولا دول
لانها حاجة تحرق الدم
لما الاقي واحدة
تقولي ما تدخلي انت جوا
ليه يعني ؟
هي خايفة على نفسها من ايه
وفي نفس الوقت اللي خايفة على نفسها منه
بترتضيه لي انا ليه
غير انه قلة ذوق لان المكان من البداية مكاني
انا عمري ما رحت على واحدة راكبة قدام واقولها ادخلي انت جوا
واديني بطلت
وممن افوت كذا عربية
لحد ما تيجي عربية فاضية خالص واركب
والفرق شاسع جدا بين تصرفي وبين
البشوات امناءء الشرطة
ياسر مدني ...دينامو الإخوان
حاضر
وبعدين ولا اسف ولا حاجة يا سيدي
وشاكرة جدا على الاهتمام
موضوعاتك عن سلوكيات الشارع جميله قوى يا جميله
شوفى يا ستى فعلا الشهامه دى ساعات بتتفهم غلط على اساس انها استعراض ومحاوله لكسب البنت دى وده انت فاهمه الحاجات دى طبعا
وانا عن نفسى هى اوقات نادره جدا للى ممكن اقوم فيها لبنت تقعد مكانى ككنت بأعمل كده لحد ماشفت مواقف قدامى من ناس
يلا
ان الله حليم ستير
سيبك مفيش احلى من المشى
فيه حاجه تلزمك عندى فى الكومنت
بيعجبنى جدا اسلوبك الجميل فى السرد
الحمد لله لسه الدنيا بخير
والجميل ان الشاب هو اللى اتصرف
بذوق .لو كل واحد فينا اتصرف
ان اللى راكبه دى ممكن
تكون اخته او خطيبته او اى حد يهمه
الدنيا حاتختلف
موقف بسيط بس مؤثر
الدنيا بتكون اجمل لما نراعى
بعض .بس للأسف الناس
اللى من نوع الشاب ده مش كتير
ربنا يكرمه
عارفه من فتره ركبت ترام الستات
من اول الخط
قعدت جنب طفل عنده حوالى 6 سنوات
ومامته واخته امامى
وطلعت ست كبيره شكلها مرهق
قلت اكيد الست اللى امامى
حاتقوم حد من اولادها ابدا
كنت لفيت فى الاسواق ومرهقه
قلت يمكن المحطه الجايه ابدا
اللى بعدها مافيش الولد
زهق وطلب من مامته يقف جنب الشباك
مالت عليه وقالت له لأ
اللى واقفه حا تاخد مكانك
قمت للست ودعت ليا من قلبها
مامت الولد بصت ليا من فوق لتحت
وبصت من الشباك
كنت متضايقه منه جدا
كان نفسى اقولها الست اللى واقفه
فى مقام مامتك بس
شكلها كان شلأ
فى ناس حلوه بس مش كتير
افتقدنا القدوه الحسنه
ربنا يصلح حالنا جميعا
انا بحبك وبحب مدونتك وبحب تعليقاتك
فى المدونات
ماشاء الله عليكى
تحياتى وسلامى
ههههههههههه بتحصل كتييييييييير
ده الواحد بيشوف اشكال رمامه من دي كتير بجد
بقوك ايه شكلك فتحتي الموضوع و هحكي
احكي؟
لا بلاش
.
زيــزي
طبعا انا مبشبهكيش بالبشوات دول ملهمش زي
شكلك متوقعه الكلمه دي بس انا فعلا بقولها عادي
بس بجد متخديش الكل بذنب كام واحده و ممكن بكل بساطه اللي تقولك معاكي حد تردي و تقولي هتقعدي جوه ؟ قالت ماشي انزلي ليها مرضتش تروح تركب وسط الرجاله
انا في اوقات فعلا ببقى متغاظ من كده الاقي الكرسي اللي قدام قاعد فيه واحده بس و يقولي السواق مشغول طب ما واحده من اللي ورا تقعد قدام بدل ما انا بقف استنى كتييييييييييييييير الميكروباصات و مبلاقيش
e7na
ايه النور دا
حل اوي سلوكيات الشارع دي
عجبتني جدا بصراحة
طبعا يا عم اا فاهمة
بس بقى لو قعدنا نقول الناس
هتقول منظرة وما اعرفش ايه
يبقى مش هانخلص
احنا نعمل اللي مقتنعين بيه وخلاص
ومشي مين يا عم
كان زمان بقى ايام الصحة
لكن دلوقت العضمة كبرت والصحة راحت
وما اخبيش عليك
كنت الاول بامشي كتير جدا
لكن من ساعة التكاتك
ما انتشرت زي الوباء
والوا جاله كساح
وهاين على اركب توك توك
في كل مشوار
خليك فاكرنا دايما يا باشا
سى السيد
على فكرة
انا مش هاهرج عندك تاني في المدونة
يا عم انا قبل كدا قلت لك باحب اغلس بس
احرجتني جدا والله
بردك على كلامي
اخجلتم تواضعنا يا سي السيد
وبما اني الملكة
اامرلك
بعشرة اكياس من الدنانير الذهبية
والفتاه امينة
يتم تزويجها لك
ويتم زفافها من بيت ابيها
الى بيتك الذي سيتم
اعداده على نفقتنا الخاصة
وكذلك زفافك
يللا اي خدمة
مهيصاك اهو
اظن ملكة اخر جدعنه
klmat
ربنا يخليكي يا رب
ويديم على زياراتك الجميلة
بتغمريني بجد بذوقك ورقتك
ربنا يديم المحبة بينا ان شاء الله
وفعلا اكتر حاجة فرحتني بالموقف
انه صادر من شاب صغير
اللي كل الناس ظلماهم
ودايما جايين عليهم
الموقف اللي حصل معاكي مستفز جدا
وفعلا انت لو كنت نطقتي معاها بحرف واحد
ما كنتيش خلصتي
وبرغم انه موقف مستفز جدا
الا اي مش مستغربة
لاني باشوف زيه كتير في المترو
لما اكون في القاهرة
قريب والله
شفت موقف مشابه
واحدة قاعدة
وجنبها ابنها
وقصادها
بنتين اطفال عمر 7 سنوات كدا
انا دخلت
العيال قاعدين
وجنبهم شنطة
المهم قلت لهم يوسعوا شوية
وسعولي ايه حاجة كدا لا تكر المهم قعدت لاني كنت ميته من المشاوير وخلاص متوجه لعبود علشان اسافر واروح
بعد محطة دخلت ست متوسطة العمر
فقالت لهم وسعوا بلطف
فبنت منهم قامت راحت عند مامتها
وبصي بقى
في ايه قمتي ليه يا بت
ووش مكشر
فالست قالت لها تعالي يا حبيبتي وكانت بتقوم تاني والله
بس هي احرجت لما لقت الست بتقوم قالت لها خلاص
اللي يخنقك ان بنتها قعدت جنبها
يللا هانعمل ايه
ربنا يهدي البشر
وربنا يديم المحبة بينا دايما يا رب
Meekness !!!
ليه بس كدا يا زيزي
دا انا قعدت وربعت رجلي
الاقيكي تقولي لا مش هاحكي
دي المواقف دي عاوزة تتنقش على الحجر
واهو منها كتير
وفي برضوا كتير من الكويس
نورتيني
Mohamed_sobhy84
شوف يا محمد
انا كنت متوقعة الاستفسار يتقالي عامة
وكنت متوقعة الكلمة دي منك انت خاصة
لاني عارفة خنقتك من امناء الشرطة
وعارفة والله انك ما تقصدش تشبهني بيهم
انا قصدت
التصرف في حد ذاته
واللى انت بتقوله دا
هو دا اللي انا عملته
وهاقولك حاجة
احنا مركز صغير
مواصلتي اللي باركبها دي
بتوديني عاصمة المحافظة
اللي عاوزة اقوله
اني باركب من الموقف والعربيات عندنا
كتير جدا ومش بتبقى لاقية ركاب
هو بيكون في زحمة ايام الدراسة ولمدة معينة
مش طول السنة الدراسية
يعني الركاب تقريبا الى حد ما ثابتين وعارفين وشوش بعض
وانا مش باظلم الكل نتيجة تصرف كام واحدة
انا فضلت على المنوال دا ييجي سنة
ولما فاض بي واتخنقت قررت انه خلاص
والبنات هم هم
وهم نفسهم دلوقت لما ييجوا يركبوا
ويلاقوني
اوتوماتيك يرجعوا ورا
احنا كركاب خط معظمنا عارفين بعض
وحافظين الوشوش
طيب انا هاضحكك
راكب عادي قدام
انا منتقبة ومن بعيد جاية واحدة منتقب
فالسواق قالها اركبي مع الابلة قدام
هو بقى مش عاوزها تركب ورا وتقوله ما تركبش رابع والافلام دي فعاوز يريح دماغه كل دا انا ساكتة
هي بقى من قبل اي حاجة تقوله
ما هي مش هاترضى تدخل جوا
هو مش سامعها
يقولها تعالي قدام يا ابلة
تقوله هي مش هاترضى طب قولها كدا تدخل جوا
انا بقى ساعتها اتنقطت
فبيسألني
قلت له هنا خالص
وانا بصراحة جملة هاتدخلي جوا دا
كانت بتضايقني لما تتقالي
فماحبش اقولها لحد
مع اني كنت باركب جوا عادي
هو السواق هايكلني يعني
خاصة ان تكون جنبي واحد فهكون واخدة جنبها اكتر
والله
انا كنت بابقى محرجة جدا
بس هاعمل ايه
عارف لما بتيجي بنت
تقولي ممكن تدخليني جوا
هي عبارة مستخدمة بارضوا عندنا
يعني انزل واركبها
تلقائي كدا
باجي انا داخلة جوا ومركباها
طالما هي اصلا
عاوزة تروح وخلاص
ومش شايفة انها اعف واطهر مني
ويا عم ابقى تعالى اركب من عندنا
وانا ابقى انزلك خالص
مصر لسه بخير
لسه في دين واحترام وادب وذوق واخلاق
هما صحيح مش بينين
بس لو قدرنا نربي اولادنا عليهم
لازم يجي يوم ويبانوا
ما علينــــــــــأ
أنا جيت اهو أول ما فضيت على طول
أنا حبيت أعلق على موضوعك داه بما أني و الحمدلله من المقتنعين بفكر فك زنقة الناس من غير أي سبب سوى أني أود أن لو كنت مكانهم حد يعمل معايا كده
فعلا و حصلت بنات كتير بيحصلها زي مانتي بتقولي و بنقوم و نحامي و كل ده
عادي جدا
بس هيا بقى القصة ... إحنا بناخد منكم ايه؟
يعني بنديكوا أماكنا و بندافع عنكم كمان و في الأخر ايه؟
يعني قلما نلاقي البنت اللي ممكن تقوم لست كبيرة مثلا موجودين بس مش كثير
و في الآخر الرجالة الجدعان بيعانوا و يقعدوا من غير حواز و تلاقي المنتهزين اللي عمرهم ما هتلاقيهم يقفوا عشان بنت تقعد مكانهم و لو كانت قريبتهم هما اللي بيتظبطوا
من فترة كدة قرأت مقال لفتاة عن مسلسل باب الحارة تنعي فيه الرجولة و قيم الشهامة و غيره و عن انها تتوق اليها و لا تجدها
أكدت نظريتي فعلا ... ان البنات عندهم قصر نظر شديد في كل شيء و هذه طبيعتهم
بمعنى قد يكون من تبحثين عنه قريب جدا منكي و ترينه كل يوم و يريدك أيضا و لكنك في النهاية تتزوجي من شخص بكرش و معدي ال 29 30 سنة بس معاه شقة و عربية
هتقوليلي مش كل البنات كده هقولك عشان مش كل البنات لاقية
هحكيلك قصة تبينلك قصدي ايه بالرجولة
صحبي أنتيمي يعني بيحب جارته بس يعني ماكانش فيه بينهم ساعتها الا شات عالنت بس ... المهم البت كان فيه واحد بيكلمها على الموبايل نمرة غلط و كده و مش عارفة مين
و في يوم عرفت انه عارف مكان شغلها
المهم خافت و كلمت صحبي داه
عمل ايه الباشا أولا
راحلها بعربية والده و ركبها تاكسي و فضل ماشي وراها بالعربية طول السكة لغاية أما وصلت البيت و بعدين قالها تسيب الشغل و تغير نمرة الموبايل ... في الآخر كلمته و قالتله انت أرجل راجل عرفته في حياتي
المهم أن هذا الشخص بالذات لو اتقدم لأي واحدة دلوقتي محدش هيقبلوا مع انه عندو 26 سنة بس البت طلعت جدعة و ضغطت على أهلها شوية بس مش عارف هتصمد لغاية امتى
و داه يرجعني للنقطة اللي انتي قولتيها عن الجيل الكبير دلوقتي
و بوظان أخلاقهم و مبادئهم اللي هما أبهاتنا أصلا بس هما عندهم مشكلة خطيرة في منظومة القيم بتاعتهم بقوا ماديين جدا و القيم الأصيللة بقت في نظرهم مثاليات و التدين تشدد و حاجات عجيبة أظن كل الشباب الملتزم بيعانوا منها
و كفاية عليكي كده
سلام
بعد السلاااام
بحكم اني اكتر واحدة بتركب مواصلات
سفر رايح جاي يوميا
قابلت انواع كتير
اللي عنده زوق ويقوم يقعدك
واللي معندوش زوق
وعادي يعني
يا بنتي كنت راكبة على كرسي
المفروض بياخد 3
والسواق راسه والف سيف يجيب رابع جمبنا
وانا راسي والف سيف مفيش رابع
مشي بالعربيه
وطلع بره البلد خالص
والاقيه وقف وجايب واحد طول بعرض يقعده جمبي
طيب بالله عليكي يتقاله ايه
قلتله لا طبعا
قاللي مش عاجبك انزلي
قلتله نزلني مكان ما ركبتني
قاللي طيب
ودخل في دور عند ..
طبعا باقي الرجاله - اللي اعذريني هقول عليهم كدا مجازا-
يادي دلع البنات
هو ايه اللي مطلعهم من بيوتهم اصلا
يا سبحان الله .. ما كل واحد يحط مراته ولا بنته مكاني
وغيره كتيييييييير
في مواقف كتير بس مش هطول عليكي باة
:)
محمود علي
طبعا بخير وهاتفضل طول عمرها بخير
يا عم محمود
ودايما متفقين
اننا لو ربينا ولادنا صح
يبقى ان شاء الله نضمن
مجتمع قوي وسليم
يارب نفضل دايما كدا على بالك
منور يا عم الثائر
The Last Samurai
منور وكان الله في العون
وطبعا اللي بيفرج على الناس ربنا ان شاء الله بيوقف له اللي يساعده
لكن انت طرحت تساؤل غريب جدا
بتقولي بناخد منكم ايه
انت عاوز مقابل لشهامتك ورجولتك
اللي هي المفروض جزء لا يتجزأ
من شخصية اي رجل او اي انسان عموما
لو لها مقابل تبقى مش شهامة ولا رجولة
تبقى خدمة مدفوعة الاجر
ولعلمك بقى في بنات كتير جدا
بتعمل حركات جدعنة مع الناس الكبيرة
لكن انت بس مركز مع رصد النماذج السيئة
هذا بالاضافة لموقفك من البنات عموما
وفكرتك السائدة عنهم
ككائنات سطحية تافهة مادية
لاتحمل اي قيم او مبادئ او افكار بداخلها
الا قليلات جدا منهم
حتى لو هم كدا
المفترض ان الشاب او الرجل
طبيعي يكون شهم وعنده مخوة
وفي بنات كتير جدا
بترتبط بشباب يدوب لسه في اول الطريق
وبترفض المادة
والعريس اللوكس
في وفي
البنت اللي انت قلت عليها مش حالة نادرة
في بنات كتير جدا بتصمد وتصبر لكن الشاب هو اللي بيبقى نفسه قصير
وينسحب ويتخلى عنها
البشر فيهم الكويس وفيهم الوحش
لكن ما تقدرش تقول كل الشباب بيفكروا بطريقة واحدة
ولا كل البنات بتفكر بطريقة واحدة
مما ينفعش تعمم رأي كونته بناء على
كام تجربة او موقف حصلوا معاك او قدامك
الرأي علشان يتعمم على مجتمع باكمله
يبقى لازم يكون ناتج عن مراقبة جميع الشرائح والبقات
والمناطق والنوعيات والثقافات
وكفاية ليه بس
انت بقيت بتيجي كل فين وفين
ربنا يوفقك يا رب
بيرو
ازيك يا عبير
فينك المدة دي كلها
والله يا عبير انا كمان باركب المواصلات
يوميا سفر رايح جاي
وباتعامل مع كل النماذج
واللي انتي بتحكيه دا
حصل معايا كتير جدا جدا
علشان كدا ريحت نفسي وبطلت اركب ورا
لكن طلع لي
الناس اللي مش عاجبهم اني اخد الكرسي لوحدي
المهم سيبك
في ناس ذوق بارضوا واخر شهامة
واهم من كل دا
انك رجعت تاني
ياريت ما تغيبيش كدا تاني
عادي متقلش أيه أدتنا مصر
النهارده جيت اركب في الكرسي اللي قدام لقيت اللي قاعد جوه قالي ده خلاص
مش بقولك بقت موضه مش عارف ليه افتكرتك
بس الحمد لله كان الموقف خدت اللي وراه على طول
mazlomen
لا انا مش باقول ادتنا ايه مصر؟
Mohamed_sobhy84
المهم تكون افتكرتني بالخير
مش لما اتغظت من اللي جوا
والضع اكيد مختلف
لاني انا لو واحد مش واحدة
ما كنتش هاخد الكرسي لوحدي
الا لأسباب صحية مثلا
والله اعلم بظروف كل واحد
والموضوع لو موضة
يبقى انا بداتها من زمان اوي اوي
لأ مش صحي اصله كان تقثريبا خايف الجل يتبهدل
ما علينا
طيب السوال ميكونش كده المفروض انى الرجاله الكبار تكون اكثر خوفا على بنات الناس من منطلق انى عندهم الواد بنات مش العكس
فى ايه يا جدعان الى حصل معاكى العادى والى المفروض يحصل مع كل بنت ليه بقى الصح فى البلد دى بيثير العجب
عزيزتى انا واللهى مش قصدى على موقفك او موقف معين انا بتكلم على حال البلد
على فكره اختى كانت شرحه يا الكورسى الى قدام ملاكى يا شكرا انتى وهى شكلكم دفعه واحده
علي نفس النسق هاقتبسها منك
مفيش في دماغي تعليق معين
احم
انا بس حبيت اسجل اعجابي بمدونتك اصلها اول زيارة ليا هنا
يمكن اول حاجة جت علي بالي لما قريت البوست الجميل ده هو حديث الرسول - ص -الخير في وفي امتي الي يوم القيامة
الناس جواها خير كتير ..جواها كنز حقيقي ..احيانا بيغطيه بعض الغبار لكن خلينا واثقين ان تحت الغبار في كنز
تحياتي
دمتي بود
انا سعيدة بيكي لانك بتتباهي بخمارك و نقابك و ربنا يثبتك و يكثر من امثالك و يجعل عملك خالصا لوجهه
و يعينك تكوني قدوة لاخواتك
تحياتي
Mohamed_sobhy84
طيب من حقه بقى
يعني يرضيك
الجل يتبهدل؟
رئيس جمهوريه نفسى
انا في بداية البوست
قلت اني مش مستغربة والله
وقلت ان دا بيحصل كتير
وكتبت البوست
علشان اثبت ان في ناس
بتعمل الواجب والمفروض
وكلها ذوق وشهامة وان هو دا العادي
لكن موضوع الرجالة الكبار بقى
انا تفسيري انهم بيكونوا مش بيستحوا
لانه حتى بغض النظر كمان عن انه يعامل البنت كانها بنته
مش بيستحي انها تحرجه بكلمة وبيبقى محضر قصيدة في التربية والاخلاق
يبستفها بيها
والحمد لله لقيت ناس دفعتي
شرفت جمهوريتي الخاصة
حلم الحرية
واتمنى انها ما تكونش اخر زيارة
وسعيدة جدا ان
المدونة عجبتك دا شيء يسعدني ويشرفني
واكيد تحت الغبار كنوز
لازم احنا نكتشفها
جزاك الله كل خير
Sampateek
ربنا يكرمك ويعزك
انا فعلا باعتز بنقابي وخماري جدا
وسعيدة بيهم جدا جدا
وربنا يقدرنا ويثبتنا جميعا ان شاء الله
نورتيني
واسعدني تعليقك جدا جدا
ما علينا
احب من موقعى هذا احب اشترك معاكى فى الهدية دى
واقولك ان لسه فعلا الخير موجود
وتحية عطرة لكل الشباب المحترم اللى لسه موجود فى بلدنا العزيزة
وربنا يمن على الباقيين بشوية ذوق
طبعا واضح جدا جدا اني جاي متاخر ع الاخر
بس عجبتيني
لا لا بجد عجبتيني
قاعدة تقولي الشباب والامل
وموقف كويس
والدنيا لسة بخير
وقبل ماتمشي كده ترمي طوبة علينا
مين الاخ بتاع الطماطم ده
كنتي جبتي من شنطته
وقعدتيه ع الشباك
بس يلا حصل خير
ماعلينا
جد بقا وكفايه هزار
اوك؟
كل حاجة في الدنيا فيها الحلو والوحش
بس يمكن الضغط اللي على الناس خلى الوحش هو اللي يكتر ويبان
عشان كده اتخيلنا ان الاخلاق والذوق والحاجات بتاعة زمان دي اتعدمت
بس والله الناس غلبانة اوي وفيهااللي مكفيها
طبعا في ناس رزلة باي ديفلت
العادي بتاعها يعني انها تخنق في عباد الله وترزل عليهم
بس هنعمل ايه
ادي الدنيا وادينا عايشنها
المهم بس انتي ابقى خدي بالك من نفسك
يلا كفايه عليكي كده انهارده
محمد سمير
ولا اقولك خدي بالك انتي من الناس
مايقدروش عليكي
WiLdBiRd
طبعا الخير دايما موجود
جوا ناس كتير
واشارك في التحية العطرة
لكل انسان لسه محتفظ بانسانيته وشهامته وذوقه
نورتي يا وايلد
غمض عينيك
ما انا لازم اوازن الامور يا عمنا
لازم بعد الكام بق الشكر والثناء والمديح
ادخل كدا شمال فيكم شوية
علشان يعني ما تتمرعوش علينا بعد كدا
والاقيك داخل تقولي
وشهد شاهد من اهلها
مش لازم اعرفكم
وبعدين الحاج ابو طماطم دا
بقولك شلولح
يعني لو كنت تعرضت لطمطماية واحدة
اعتقد كان زماني بقيت صلصة
هو حاجة كدا زي حسن حامد
وفريد شوقي في صحتهم
طيب كويس
قلبت جد بسرعة نفدت مني
دا اللي انا باقوله دايما يا محمد
ان الحلو والوحش موجود
وباقول ان الحلو اكتر بس محتاج
اننا نقدم السبت علشان نلاقي الاحد
يعني مش كل واحد يستني الناس هي اللي تبدا معاه بالخير
وطبعا الضغوط والظروف قارفة البشر
وبتأثر عليهم بالسلب
مش هم الدول اللي انا قصدتهم
انا قصدت الجماعة اللي الديفولت بتاعهم هو التباتة والغتاتة
وغاوية ترزل على مخاليق ربنا
وماتقلقش على الناس
انا مخلية بالي منهم
وباحاول اراعي ربنا فيهم
الدنيا متفاتة يا عم
وما حدش واخد منها حاجة
دا انت حتى اول واحد
لازم تقر وتشهد اني باعز الخير وعمل الخير
ولا ايه
؟؟؟؟؟؟
و اللة الشباب المحترم كتير
بس اللى يدور
وفى حكمة بمناسبة الحياء بتاع الرجالة
برنارد شو قال _
_الرجال اكثر حياء من النساء _
سلام
و الله انك سكر
و عندك حق
في دنيا البشر هتلاقي متناقضات كتيرة جدا
بنستغرب و نستعجب
بس اهي عايشنهااااااا
،،،،،،،،،،،،،،،،،،،،،،
الموقف اللي بتقوليه دا
فعلا بيتكرر تاني
الواحد بيبأه يخاف يتكلم و الله
مش ضامن رد الفعل
و لو محدش اتبرع و حدد الموقف بسرعه
هتلاقيكي غصبن عنك بتاخدي انتي موقف
حد فهم حاجه
؟؟؟؟؟؟؟!!!!
سلااااااااااموز يا جميلة
و دعواااااااااتك في الامتحانات
:)
Post a Comment