ذاك هو

الحب حالة شعورية تجمع العديد من المتناقضات
تتألم برضا تتذوق العسل مراً تتنعم بعذاب
قمة الإحساس بالكرامة وقمة الإحساس بنسيانها تمتلك العالم وتتنازل عنه لمن تحب

ماذا يمكن أن تسمي
عجز منطقك عن الإدراك ...عجز لسانك عن النطق ....عجز قلبك عن أن يتحمل خفقانه

ذاك هو الحب
ولكن .... لابد و أن يكون مظلل بشرع الله

Monday, July 18, 2011

حاوريني يا طيطة






رغم إني مش عارفة أصل العبارة وحاولت أعرف ما وصلتش لحاجة 
إلا إن الصورة دي كل ما أبص لها أحس إنها بتوصف العبارة ي 
 خصوصا لما أطبقها علينا
علينا أنا مش علينا أنا والناس :)) اه أنا 


علينا أنا و نفسي أصلها بتعمل معايا كدا 
مش باعرف أقفشها وأثبتها على حال
بتلاعبني حاوريني يا طيطة 

.

.

واللي خلاني أربط بين الجملة دي والحالة دي 
موقف حصلي زماااان و أنا متشردة صغيرة

وكانت المرة الوحيدة اللي أبويا الله يرحمه زعق فيا كام زوعاقة كدا 
.
.

طبعا انا كنت متشردة في الشوارع 
وفي يوم بقى واحنا بنلف انا والعيال المتشردين اللي زيي
قابلت أبويا الله يرحمه في الشارع فوقفنى وبكل هدوء قالى روحي 
وطبعا بدون نقاش رجعت ومعايا العصابة 
قالوا لازم نلعب قلت خلاص تعالوا نمشي من شارع تانى 
وطبعا في الشارع التانى تكرر الموقف لكن مع هدوء أقل
وفي الشارع اللي بعده واللي بعده وزي ما يكون كان أبويا مع خط سير أفكارى في اليوم دا
كل ما نروح شارع يقابلنا
.
.
وفي آخر مرة مسكنى من قفايا وقالي هو انت هتلاعبيني حاوريني يا طيطة
وطبعا في تلك المرة النظرة كانت كفيلة إنها تثنيني عن أى محاولة 
للاستمرار في المحاورة والمناورة 
.
.
لكن واضح إني مع نفسي مش بذات حسم وحزم نظرة أبويا الله يرحمه
اللي رغم كل تشردي واصراري على اللعب إلا إني لميت الدور
و أخدت تعابيني وروحت 
وانتهجت سياسة القمص في البيت إلى أن حظيت 
بمحالات المصالحة والترضية من الوالد الله يرحمه 
وطبعا لا يخفي على أحد ما يصاحب تلك الترضيات من مكاسب ومغانم 
ودلوقت لا أنا عارفة اقفش نفسي من قفاها ولا أعدل عليها خط على رأى أمي 
ولا حتى عارفة أسايسها وأبلفها 
وهى اللي بتلاعبني حاوريني يا خيبة ههههههههه

.
.
.


يكونش دا جزاء مناوراتى ومحاوراتى وانا متشردة خمس سنوات
(بس والله كنت جبارة باخلع صندلي ( اللي باكون حولته لشبشب 
في إيدي وفريرة وطبعا كان بينفع في التراشقات التى كانت لا غنى عنها 
وقت الاشتباكات والخلافات

.
.

تمام زي تراشقات وانشقاقات الثورة كدا 

:)