من طبيعتي اني اول ما عيني تلتقي باي وجه بشري الاقي نفسي بسرعة جدا بافكر
ياترى في ايه خلف هذا الوجه ايه الافكار او التساؤلات المسئولة عن الانطباعات المرسومة عليه
ويا سلام بقى لو بقى في حوار
كدا المعطيات بتزيد وتبدا انطباعاتي انا تتكون جوايا عن الشخصية دي
والانطباعات دي تبقى محتاجة اما تاكيد او نفي
لاني لا اؤمن ان الانطباعات الاولى تدوم لان احتمال حدوث خطأ وارد
ممكن جدا يكون تقييمي غلط في غلط
المهم .......اني بابدا في اثبات المطلوب بناءُ على مالدي من معطيات
والمعطيات في تزايد كل ما الحوار يتسع
وعلى عكس مسائل الرياضيات
الرياضيات دايما مطلوب اثبات حاجة محددة يعني لازم البرهان بتاعك يوصل بيك في الاخر لها
انا لا انا المسائل عندي مرنة جدا
المطلوب اثباته عندي هو انطباعي عن الشخصية
لكن انا مش فارق معايا ان المعطيات تثبت لي عكس انطباعاتي
برغم ان دا نادر الحدوث لكن انا كل اللي يهمني
اني اوصل لتحليل صحيح قدر الامكان للتركيبة اللي باتعامل معاها
لكن فئة واحدة مستحيل اقدر اتوقع ايه اللي ورا تعبيرات وجوههم
او ايه الدوافع او المبررات لتصرفاتهم
وما حدش يقولي عادي مفيش حاجة في دماغهم
لا دول احيانا بل غالبا بياتوا بتصرفات تدل على انهم مدركين لكل ما يدور حولهم
نفسي اعرف لما بنلاعبهم وبيضحكوا بيكونوا بيفكروا في ايه
او لما بيكونوا زعلانين بيكونوا بيفكروا ازاي
وليه دايما تلاقيهم يفهموا بعض
برغم انهم بيكونوا لسه ما اتقنوش الكلام
بصراحة انا باجي عند الاطفال واحس انهم عالم تاني خالص
لهم لغتهم الخاصة اللي بيتفاهموا بيها بعيدا عنا
دايما انصح اصحابي واقول....علشان نقدر نفهم الناس صح
لازم نحط نفسنا مكانهم ونحاول نعيش الموقف من وجهة نظرهم
علشان نقدر نعذرهم او نشوف الجانب اللي هم بيبصوا فيه واحنا مش شايفينه
حتى لو وجهة نظرهم غلط بس لازم نبص بعنيهم الاول علشان لما نناقشهم
نبقى فاهمين ايه مقاصدهم و ما يكونش في مجال لحدوث سوء تفاهم
الا في حالة الاطفال ......قصدي طبعا الاطفال في فترة عدم الادراك
يعني الاطفال لحد سن 4 سنوات
بصراحة بعد 4 سنوات انا بانزع عنهم صفة الاطفال وباعتبرهم مجرمي حرب
انا عن نفسي مش قادرة اتخيل نفسي مكان الطفل دا
اكيد طبعا مستحيل اتخيل نفسي مكانه في هدومه او البطانية بتاعته
احتمال كبير كل اللي يقرا يقول ايه الهبل دا
عادي
بس نفسي
كل اللي يبص في الصورة يقولي
ايه اللي جيه في دماغه
او توقع ايه ممكن يكون مخلي الطفل دا مبتسم
21 comments:
بوست جميل جداً
الاطفال عالم تاني خالص زي ما انت بتقولي كله براءة.
واي حد لما بيشوف الاطفال او يتعامل معاهم بيحس بكدا.
حتى لما نشوف صورنا واحنا صغيرين
اللي جه في دماغي لما شوفت صورة الطفل بيضحك جمله بسمعها كتير لما يكون بيبي صغير بيضحك ويقولوا:الملايكه بتلاعبه
mlame7.blogspot.com
أول ماشفت الصورة قولت ايه القمر ده؟
عارفة بيقولو انه لما بيضحك وهو نايم بتبقي الملايكة بتلاعبه
انا كنت بخاف من الاطفال اووووي
لحد ما اختي جابتلي علي
اول ما بيشوفني بيسيب الناس كلها ويقعد يبصلي ولو مشيت من قدامه بيعيط
من غير ما احط نفسي مكانه
هو بيحبني ومش بيخبي الحب ده بس خلاص
هو أنا ممكن أسأل سؤال بايخ شوية؟
هو انتي بتمضي باسم g_bouheerade
ليه؟
ويعني ايه الاسم ؟
معلش بقي علي الرخامة دي بس عاوزة أعرف
يا ستي ولا رخامة ولا حاجة
g_bouheerade
اختصار gameela_bouheerade
او جميلة بوحريد
وبامضي بيه لاني مرتبطة بالاسم دا
انا بحب الشخصية صاحبة الاسم
اللي هي جميلة بوحريد
وهي مناضلة جزائرية ارجو تكوني سمعتي عنها
mlame7
انت الاجمل والله
وفعلا التعليق دا دايما الناس بتقوله
يا بختهم الملايكة بتلاعبهم
fanan fa2eer
لا انا كنت منتظرة تفسير طبي بحت يا دوك
ماشي يا قمر الدكاترة
محمود علي
بالراحة على يا عم محمود
خلاص خلاص
ربنا يخليلكم على ويحفظه من كل سوء ان شاء الله
بس انا مصرة على موقفي
نفسي ادخل جواهم واعرف بيفكروا في ايه
ومتشكرة جدا على تشريفك عندي
واحب احييك على مدونتك لانها جميلة جدا
موضوع قيم بس انت شغال تحليل للبنى ادمين ومعطيات وبراهين انتى كان نفسك تكونى ارشميدس ولا ايه ؟ وكمان قوليلى مين اللى جابلك صورتى وانا صغير ؟؟
عبده الميكانيكى
فينك يا عم
انا قلت مش لاقي جاز وجالك جفاف
ولعلمك كل اللي نفسي فيه ادخل جوا دماغ الكابتن اللي نايم دا
وبما انها صورتك وانت صغير
قولي بقى مين كان بيزغزغك
تعرفى بقى انهم بيحسو جدااااااا
وبيفهمو بشكل معقول بس المشكلة بتبقى فى انه بيتعامل على انة لسة فى رحم الام وانة لسة مخرجش
فبيبقى سعيد جدااااااااا
بس البوست جميل اوى
وانا لو مكانها هابقى فى الطيران
بحلق فى سماء الوهم
.:.-=- ELGaZaLy-=-.:.
اولا سعيدة جدا بتشريفك
ومتشكرة جدا جدا على التعليق الجميل
واتمنى نبقى طلنا مكانها او مكانه ونطير
بما ان عمر ابن اخويا لسه ما كملش 4سنين
بس هو كان له تعليق اول ما شاف الصورة
كالاتي
ياماما ياماما
تعالي شوفي النونة دا
هاتي لي واحد زيه
هو بكام يا عمتو
وهو بيضحك ليه وهو مغمض يا عمتو
شوفي يا عمتو هو نايم كدا هو بردان
.........
..........
.........
الخ
عمر تقريبا فضل ساعة مخليني فاتحة البوست
وسايباه يتفرج على النونة وبس
هو بيسال نفس الاسئلة اللي انا باسالها
طيب هو ايه جوا دماغه مخليه يسال
ايه وجهة نظره واهتمامه
شكلي كدا عقلي هايتلحس قريب
لما الحق اقفل
قبل ماييجي ويخليني اثبت له البوست
ماتجيبى لعمر واحد زيه .. هتلاقى فى عمر افندى منه بس صينى ولو عاوزه يابانى احتمال كبير ماتلاقيش فى السوق
وانا كنت بضحك فى الصورة علشان والدتى كانت بتغنيلى نام يا ميكانيكى نام وادبحلك غيه حمام
عبده الميكانيكى
امال انا ليه حاسة انها كانت بهرشلك رجلك بمفك صليبة
وبتغني لك نام يا بلية نام وانا اجيبلك موتور تفك فيه من اليابان
ما انت كنت لسه بلية صغنتوت مش ميكانيكي اد الدنيا
وعمر يا عم لو على الياباني
نوصي له عليه في السوق السودا
علشان يفضل يضحك على طول
انما الصيني مش مضمون
سؤال بسيط ياجميلة
انتى مش كنتى زيهم؟؟
كنتى بنفكري ازاى؟؟
بلاش حقد بقي
هه؟؟
تخاريف دكتور
ما انت عارف يا دكتور
انا يدوب المعلومات بتكون في دماغي لوقتها وبس
وبعد كدا خلاص
وانا نسيت
انا اعتقد ان الاطفال بيكونا في عالم منفصلخالص لحد سن معين
وبتكون له ذاكرة خاصة بيه
واول ما بيبدأوا الادراك
خلاص
زي ما يكون بيحصلهم غسيل مخ
ومن ناحية الحقد
اه بصراحة باحقد عليهم
طبعا سمعت غن جميلة بوحريد
وميرسي علي التوضيح
fanan fa2eer
و لا ميرسي ولا حاجة
انا تحت امرك
كفاية تشريفك عندي
ومن غير كارنيهات اهو
احنا غلابة على اد حالنا
بتنوريني والله
بوست جميل والمدونه كلها جميله
لما شفت الصوره شعرت بسعاده مافيش اجمل من ضحكه الأطفال
شكله سمع نكته اطفالى حلوه
الصورة أساساً تخلي الواحد عايز يتكلم
أعتقد أن الأطفال بيتفاعلوا جداً مع المحيطين بهم بغض النظر عن حجم التفاعل وكيفيته
ولكنهم أنقياء
:)
لو أنا مكان الطفل
أعتقد أن ما يجعلني أشعر بسريرة النفس هذه منظر البحر
أو أعواد القمحة التي أن وقت قطفها وهي تتمايل كأمواج متلاحقة
klmat
ربنا يكرمك ويعزك
نفسي حد يقولي نكتة اطفالي
علشان اقدر ابتسم الابتسامة الصافية دي
BinO
فعلا الصورة دي رائعة
انا اول ما جات لي
قعدت قدامها وقت طويل جدا
وكل اللي يشوفها
يثبت قصادها
هم فعلا منتهى النقاء
واتمنى ربنا ينعم عليك برؤية البحر
و أعواد القمحة التي أن وقت قطفها وهي تتمايل كأمواج متلاحقة لتشعر
بسريرة النفس
سعيدة جدا بمروك عندي وتعليقك
بصي أنا بعشق الأطفال
لو مشيت في الشارع و شوفت نونو
لازم اقف و العب معاه
و نتعرف
حتي لو كان عنده شهر
ياربنا علي السكر
براااااااءه
بجد ما شاء الله
ربنا يحمي كل الأطفال
و النونو اللي في الصورة دا بيضحك
زي مالكل قال
:)
تحياتي و تقديري ليك يا جميل
Post a Comment