هل ما ينفعش ان يكون في صداقة مبنية على التعارف الفكري وبس ؟
بمعنى هل لازم الناس تتبادل الاسماء والاعمار والعناوين علشان تقوم بينهم صداقة
طبعا انا باتكلم وباتساءل في محيط صداقات النت
هي الاسامي او الاعمار او العناوين هاتفرق في ايه
الاصرار على تبادل المعلومات الشخصية بيؤدي بالغالبية العظمى الى الكذب واعطاء اسماء واعمار وهمية
ودا نظرا لانعدام الثقة ورسوخ فكرة ان الكل بيكذب
وبناءً عليه بيكون الكذب على من هو كاذب ليس بذنب يستحق تانيب الضمير او الاحساس بالذنب
14 comments:
الصداقة من اجمل واسمى العلاقات الانسانية والاجتماعية بين الافراد.
لكن صداقة النت او التعارف عن طريق النت اذا كان مقتصر على العناوين والاشكال والاعمار فبيكون شيئ ما لوش
أي فايده او اي اهميه.
وهذه الصداقة لا يجب ان يطلق عليها صداقة من الاساس.
والتعارف الفكري من خلال النت افضل من تبادل البيانات الشخصية اللي بتكون في الغالب زي ما قولتي غير صحيحة
وطبعا لازم التعارف الفكري دا يكون في اطار معين وحدود
____________________
حلوة الفكرة احييك.
mlame7.blog spot.com
معتقدش اصلا ان فيه واحد عاوز يعمل شات لمجرد التعارف الفكرى بل اصبح البحث عن فتاه للتعارف واشباع الرغبات هو الشغل الشاغل لكل فرد لذلك يصر كل فرد على معرفة الاسم والسن والنوع من حيث ذكر او انثى اى بمعنى اخر كله عاوز بنت يتعرف عليها لكى يسرح بها ويفهمها انه بيحبها ووووالخ
mlame7
بس ياريت حد بيقنع بالتعارف الفكري فقط
نادر جدا
لكن فيه
عبده الميكانيكى
انت في كلامك اتكلمت عن الشباب
وانا اضيف ان في بنات بيكون هدفهم هو زي انت ما قلت برضوا
بس فيه ناس بتبحث عن التعارف الفكري فقط والله
وانا عن نفسي وبدون مبالغة لي صداقات بدون ان نتبادل اي معلومات
او المعلومات المتبادلة بسيطة جدا
خاصة بالدراسة او ماشابه
يعني في صداقات فكرية
هه؟؟
بما ان صوابعك مش زى بعضها
اذن الناس كلها مش زى بعضها برضه
ولا ايه؟؟
هه؟؟
تخاريف
لا مش ايه
فعلا مش كل الناس زي بعضها
بس الغالبية اسوأ من بعضها
مش كدا ولا ايه ؟
من أبسط حقوق الأصدقاء علي بعضهم انهم يعرفوا عن بعض حاجات بصرف النظر بقه عن كون صداقات النت حقيقية ولا لأ
ومش معقول تفضلي تكلمي واحد أو واحدة وانتي مش عارفة عنه أبسط المعلومات اللي ممكن تطلع كذب زي مابتقولي وده الغالب بس عقل الانسان ماينفعش يكمل صورة من غير عنين أو فم أو مناخير هتبقي صورة مش كاملة حتي لو كانت ملامح زائفة فالانسان محتاج التعلق بيها(ولا أقصد طبعا المعني الحرفي للملامح) هو موضوع يلخبط في الاختيار بين انك تعرفي حاجات كذب أو أنك ماتعرفيش حاجة خالص
تحياتي
انت عارف اللى بيكلمك ده شكله تعبيراته ايه بيرد عليك بس هو بيضحك من سذاجتك انك مصدق
اوقات بتكلم ناس وبتحس انهم صادقين وللاسف بتتصدم بعد شويه وبتقابل بعدهم ناس فتكون حذر فى تعاملك معاهم وتتعامل بسوء نيه فيضييعوا منك انا كل ده بتكلم على ناس شايفهم وشايفينك مابالك بناس اللهم اعلم بتركيبتهم
الله على الموضوعات الجامده
fanan fa2eer
من أبسط حقوق الأصدقاء علي بعضهم انهم يعرفوا عن بعض حاجات بصرف النظر بقه عن كون صداقات النت حقيقية ولا لأ
أولا :انت بنفسك قلتي حقوق الاصدقاء
طيب منين هم لسه بيتعرفوا على بعض ويبقى في حقوق
مش نعرف دماغ كل واحد شغالة ازاي الاول وبعدين نقرر ينفع نكون اصدقاء ولا لأ
ما ينفعش امنح حق لغير اصحابه
يبقى نكون الصداقة الاول بناء على التوافق الفكري والعقلي
وبعد كدا نطالب بالحقوق الفرعية
ومش معقول تفضلي تكلمي واحد أو واحدة وانتي مش عارفة عنه أبسط المعلومات اللي ممكن تطلع كذب زي مابتقولي وده الغالب بس عقل الانسان ماينفعش يكمل صورة من غير عنين أو فم أو مناخير هتبقي صورة مش كاملة حتي لو كانت ملامح زائفة فالانسان محتاج التعلق بيها
ثانيا : معقول جدا لاني انا دايما لما باتطرق لموضوع معين باتكلم بناء على تجارب شخصية يعني انا جربت اني بنيت صداقات دون معرفة اشياء كثيرة عمن اتحاور معهم وبالنسبة لي كانت الصورة كاملة جدا
عارفة ليه
لاني باكون داخلة عايزة اتعرف على افكار مجرد افكار كل شغفي اني اعرف الناس بتفكر ازاي وفي ايه
طبعا مش كل اصدقائي قنعوا بكدا
وفي ناس قنعوا
ومع الوقت ولما بنعرف بعض كويس بتبدا المعلومات تيجي لوحدها في الحوارات بناء على الثقة التى تم اكتسابها بعد فترة طويلة من التعامل
وبتكون لها حدود ايضا
صدقني احساس ممتع جدا
انك تحسي انك في مجرد لقاء فكري بحت حتى لو كانت الافكار دي هيافات
لكن المسالة بتكون انك بتتصفحي عقل بشري
وكذلك اللي قدامك
وفي النهاية دي وجهات نظر
عارفين
احد اصدقائي رايه يوافق رايك وقالي ان فلسفتي تعتبر غير سوية
احتمال
e7na
كلامك صح جدا
فعلا احنا بنتصدم في اللي عارفين عنهم كل حاجة
بس لما بتلاقي حد بيرضى لمبدأ الصداقة الفكرية فقط ويستمر فيها
صدقني ثقتك فيه بتكون في محلها
لانها بتكون صداقة تقريبا شبه المدونة
مش المدونات مكان كل واحد بيعبر فيه عن اللي جواه بصراحة
الصداقة اللي انا باتكلم عنها كدا بس بتتميز بالتفاعل الفوري
وانت لما بتتعامل دون ان تعطي اي معلومات عن نفسك بيكون احساسك بحرية التعبير اقوى
وبرضوا دي وجهات نظر
قابلة ان تكون صحيحة او خطأ
انتوا عاملين ترغوا في موضوع غريب
الصداقه اني اقابل انسان وابص في عنيه
يقف جنبي في شده
اساعده
احميه
اي حاجه يطلبها مني
غير كده متبقاش صداقه
تبقي تتضيع وقت
محمود علي
ربنا يعزك ويكرمك
اقولك ايه بس
الصداقة صحيح ان صديقك يقف معاك في شدتك
والصداقة برضوا انك تلاقي انسان يسمعك ويسمع همومك من غير ما يزهق او يمل منك
انسان لا يسئ فهمك
انسان ممكن من كلامك معاه
يديك نصيحة او يوجهك لحاجة كانت تايهة عن بالك
يعني مش لازم تبص في عنيه
ومش لازم يكون قدامك خبط لزق
ما احنا اصحابنا ساعات بيسافروا
وبيفضلوا اصدقاءناوبنفضل متواصلين معاهم
ودي برضوا وجهات نظر
وفي حاجة
المدونات معمولة اساسا للرغي
علشان الناس تعرف افكار بعض
احترم فعلاً وجهة نظرك مش ضروري معرفة أي تفاصيل عن الشخص الآخر المهم الفكر والعقلية والشخصية المتعامل معاها وأكيد لازم يكون فيه اتفاق بين ناس ومفيش اتفاق بين ناس تانية
بس فعلاً التعارف والصداقة شيء جميل جداً ومن أجمل الحاجات اللي بتحلي حياتنا سواء بالنت أو غير النت المهم أن التفاصيل مش مفروضة
من اول دخولى عالم النت حطيت ادامى خطوط اساسية
اولا لايهمنى اسم اللى قدامى ولا ولد ولا بنت
وصدقينى اى حد بيكدب او بيدعى حاجة مش فيه
كلها وقت ويتفضح
اولا طبعا لازم نكون حذرين علشان مش اى حد يخدعنا
انا عرفت ناس على النت من حوالى خمس سنين
وحتى الان
ناس فى منتهى الاحترام واللى بينا اكيد ثقة متبادلة
ماحدش يهمه انه يشتغل التانى ولا يعيشه فى وهم
علشان انتوا عارفين انتوا عاوزين اية من بعض
وماتقولوش مش شايفين بعض ولا نعرف بعض
تبادلنا وعرفنا كل اللى مطلوب نعرفه من افكار واراء بعض
سمعنا وفهمنا وعيشنا
من غير ماحد يشتغل حد
وفى نفس الوقت اكيد قابلت الوحش برضوه
بس ده وقتها التعامل معاه سهل
بس اهم حاجة نكون حذرين الاول فى التعامل
وبعدين هنتصرف صح اكيد
او زى الكاريكاتير كده
يبقوا الاتنين بيضحكوا على بعض وهما الخسرانين
WiLdBiRd
الله عليكي
جبتي المفيد
احنا متفقين جدا
احترامي الشديد ليكي
Post a Comment