مش دا مثل عندنا ودايما نقوله ان اي شيء مهما كان قليل طالما في تراضي والنفس مسامحة ممكن يكف من الحبايب الف
انا بقى اكتشفت ان المثل دا حقيقي جدا ويبتحقق واقعيا
انتم تسمعوا عن حاجة اسمها القوافل الطبية
زي المولد كدا للي يعرف الموالد دلوقت وزارة الصحة بتعمل المولد قصدي القوافل دي كل اسبوع كل محافظة بتعمل عندها في قراها
كشف مجاني وعلاج مجاني وتحاليل واشعات وايه العيادات بتروح لحد القرية من دول ويفرشوا في حتة تكون فاضية في البلد وبيبقى مولد
طبعا كل التخصصات متوفرة وتبص تحس ان كل البلد تعبانة ودا حقيقي
طبعا انا سخفت فين العلاقة بين كل دا والعنوان
بصوا بقى برغم تعدد التخصصات والتشخيصات والامراض
تندهش او عادي ممكن ما تندهش
تلاقي ان الصيدلية بتاعة القافلة الطبية مافيهاش غير 6 او 7 اصناف من الادوية
بس الحمد لله كله بيصرف منها
يعني اللي كاشف نفسية وعصبية واللي باطنة واللي اطفال واللي نسا وولادة والرمد والعظام
تلاقي كله بيتصرف له دواه من الـ 6 او الـ7 اصناف دول ما فيش حد بيطلع بايده فاضية
وعادي جدا تلاقي واحد كاشف عظام مصروف له قطرة ما هو دا الموجود والجودة بالموجود
يعني يطلع يلسن ويقول انا ما اخدتش علاج
والمطهر المعوي طبعا قاسم مشترك لكل المرضى ومالوا هو منه ضرر اهو يظبط الرمرمة شوية
المهم ان الكام صنف الموجودين الكل بيتراضى منها
تبقى البلد هاتعمل ايه اكتر من كدا
الخدمة الصحية والعلاج مجانا ولحد قريتك
حبة حبة نلاقي الخدمات بتوصل ديليفري لحد باب البيت ومجاني
طبعا مش هانبقى بجحين بقى ونبص للناس اللي تعبت في تنظيم القوافل دي ونقول هم استفادوا ايه
ربنا يبارك لهم كتر خيرهم انهم جمعونا في بوفيه الادوية والعلاج دا
المولد قصدي القوافل بيبقى يومين
لو اتعملوا عندكم بلاش تكسفوا البلد ابقوا روحوا وجابروا الزاد ومدوا ايديكم
واهي قطرة او شريط حبوب اكسباير مش هايضر بيبقى لسه باقي له شهر ولا حاجة
المهم المشاركة
8 comments:
المشكلة ان بيكون في ناس في الاماكن اللي القوافل بتروح فيها وغالباً بتكون في الارياف والناس اللي بيروحوا اغلبهم بيكون عندهم عدم وعي طبي وبياخدوا كل الادويه اللي بيصرفوها وبيكونوا طبعاً مروا على كل التخصصات
وبعض الادويه بيكون لها تفاعل مع بعضها وهما طبعا ما يعرفوش !!!!!!!!!!!!!!!!!
mlame7.blogspot.com
هى دى الطريقة الحديثة فى العلاج
وهو ده جزاء الناس انهم عايزين يتعاملوا معاكم بالطب الحديث ولا ايه
هه؟؟
mlame7
كلامك صح وحتى لو بعض الادوية مش متفاعلة مع بعضها
بعض الادوية بتكون فعلا خلاص باقي لها شهر وتكون اكسباير
ربنا معانا
تخاريف دكتور
ظلمناهم يا دكتور؟؟؟
معلش بقى جهل بعيد عنك
وانا كنت هاعرف منين ان هو دا الطب الحديث
بعيد عنك اخر معلوماتي عن الطب لما عمر ابن اخويا بيعمل دكتور ويقعد يقيس لي الضغط
احمدى ربنا ان فيه قوافل طبيه بتمر عليكو اخواتكو فى الصومال مش لاقين ياكلو مش يكشفوا ؟؟ ايه الطمع ده ؟؟
عبده الميكانيكى
هو انا اعترضت
حد قالك على اني جاحدة
وولاد عمي اللي في الصومال
دول اساسا متبعين حمية غذائية
مش مسالة نقص طعام
روح يا عم شوف بتاع الجاز يابك وراح فين
انت اللي عندك نقص جاز
انا مره رووحت معهد القلب الي في امبابه
شوفت الي انتي بتقوليه ده
وكمان عرفت ان في بعض الادويه بتكون الماده الفعاله الي فيها مش كبيره اوووي
بس هنعمل ايه
الغلابه كتيييييييير اوي
القوافل الطبية اللى حضرتها
ماكنتش ابدا تبع وزارة الصحة
كانت اما تبع جمعيات او جهود ذاتية
اكيد بيكون فيه حاجات كده زى مابتقولى
بس المشكلة زى ماقولتى الناس كلها بتبقى عيانة
وماحدش عاوز يرجع البيت بايده فاضية
حتى لو شريط فيتامينات
انا اخر قافلة كانت فى بلدى
وانا اللى كنت مشرفة على الادوية
لكن اللى الدوا بتاعه مش موجود ومحتاجه فعلا ده كان بيتصرف له العلاج مجانا من صيدلية قريبة كنا متعاقدين معاها
واللى حالته احسن شوية
يتصرف له العلاج بتخفسض
وده برضوه عن طريق اتفاق مع الصيدلية
اما عن الادوية الاكسابير
فدى صعبة شوية
معظم الناس القائمة على القوافل الطبية
ده عمل خيرى لهم
ومنهم حتى الدكاترة مشكورين
مش معقول جايين يموتوا الناس
زائد ان فيه فرز مبدأى للادوية دى علشان الاكسابير زى مابتقولى
وبعد كده تصنفها علشان سهولة صرفها للى محتاجها وتنفعه
بس ياستى
دى كانت وجهة نظرى فى الموضوع
:)
WiLdBiRd
اولا انا سعيدة جدا بزيارتك
واهتمامك بالتعليق
وبالنسبة لموضوع القوافل
انا قصدي على قوافل وزارة الصحة
وباتكلم من ارض الواقع مش محض افتراء والله
انا عندي معلومات وواقع قدام عيني
ماعلينا من كل دا
انا اكتر حاجة اسعدتني
القوافل اللي انتي قلت عليها
وحقيقي باحسدك انك بتشاركي في شيء جميل ورائع كدا
ربنا يجعله في ميزان حسناتك انت ومن معك ان شاء الله
Post a Comment