حلوة بروتوكولات دي زي ما اكون هاتكلم عن
بروتوكولات حكماء صهيون يا جماعة
ما حدش يفكرني هارص بقى بروتوكولات لعالم التدوين وكدا
قلبكم ابيض
انا بس كل الحكاية بما اني جاهلة جدا وغير ملمة باداب التواجد في عالم التدوين
دا لاني دخلته كدا نتيجة حب التجربة
وبصراحة الجو عجبني جدا وانبهرت بالعالم ككل
لكن انا ما اعرفش ايه قواعد التعامل فيه
مش هاطول عليكم
انا بس عايزة اعرف؟
هو الواحد لما يكتب موضوع ويفتح مجال التعليقات عليه
مش طبيعي ان كل واحد يقول رايه
بكل ادب طبعا
ويا سلام بقى لو التعليقات اخدت شكل الحوار
يعني انت تعلق
وبعد يوم ولا حاجة تلاقي صاحب الموضوع رد على تعليقك براي
فانت دخلت تاني توضح وجهة نظرك
وكدا يعني
وهكذا دواليك
سؤالي هنا بقى
هل دا مش من بروتوكولات التدوين
هل لا يجوز انك تتابع الحوار او النقاش
وهل من حق صاحب الموضوع
انه يحذف تعليقك
ويقفل باب النقاش باخر تعليق هو شايفه موافق لارائه
هو طبعا كل واحد حر في مدونته
ما هو مش عاملها علشان حد يقرفه ويناكف فيه
ما علينا من كل دا
يمكن كل دا من البروتوكولات وانا ما اعرفش
ما انا جديدة في الجو دا
انا باتكلم جد
سؤالي الاهم
هل اي واحد لو دخل وعلق على موضوع
واكتشف ان تعليقه اتحذف
وحس انها رسالة من صاحب المدونة
ان العدد كومبليت
ومش محتاجين خلاص
هل هايدخل المدونة دي تاني ويعلق فيها عادي ومفيش مشاكل
على اساس ان دي حرية مطلقة لصلحب المدونة
يسيب من تعليقاتك اللي يعجبه ويحذف منهااللي ما يعجبوش
وعلى اساس انه كمان عادي يعني
بيغلق باب النقاش والموضوع مش عدم احترام لتعليقك ولا حاجة
انا باسال يعني
ولا الكرامة تاخده ويعتبر دا عدم احترام لآرائه من قبل صاحب المدونة
وبلاش يدخلها تاني وخلاص
او يدخلها عادي لو شايف انها مدونة كويسة بس بلاش يعلق فيها
ويحترم رغبة صاحب المدونة
يعني يا جماعة عرفوني ما هي اداب وبروتوكولات عالم التدوين
23 comments:
السلام عليكم ورحمة الله وبركاته
ازيك يا ماعلينا يارب تكونى بخير
برتوكولات التدوين حلوة اوى على فكرة
بصى مفيش بروتوكولات معينة بس فى اعراف
واه طبعا من الجميل ان يتحول الحوار الى نقاش بيبقى جميل اوى
اه يجوز ومن حقةى برضة يحذف تعليقك
لان دة مكانة ببساطة بصى يعنى انتى مثلا لو دخلك حد هنا بيناقشك فى ان ربنا موجود من الطبيعى ان فى حد هاتوقفى معاه النقاش انا مقصدش المقارنة انا
بقصد نفس الايدلوجويا وبس بس فى حاجة
سعات مثلا بيبقى فى حد عامل مودريشان على التعليقات زيي كدة فى مدونتى الثانية
بتاعت مصر يا اما التعليق بيغيب على ما يظهر لحد ما اخش فهمانى بتحصل كتير ...
ومفيش حد ممكن يفهمك حاجة عقلك بس هوا الى هايحط قواعد ليها..
بس هافنكر واقولك...تحياتى..
وسعيد ان القصة عجبتك
بتحصل فى احسن المدونات
وبلاش نظلم الناس
هه؟؟
.:.-=- ELGaZaLy-=-.:.
ايه النور دا
الغزالي مرة واحدة عندي
متشكرة جدا على توضيحك
وطبعا انا فاهمة
ان المثال لمجرد التوضيح
بس المفروض اني يا اما ارفض من البداية او طالما بدات النقاش اكمل
انا اتعودت على كدا
واكثر شيء مش باتقبله
سياسة طيب خلاص
يعني اه تناقشني ولما ما تقدرش تقنعني تقفل على
دا العرف اللي انا متعودة عليه في النقاشات
اني استمر في النقاش حتى النهاية
ونهايته اما باقتناع احد الطرفين براي الاخر
او اننا نوصل الى ان انها وجهات نظر وكل واحد يحتفظ بوجهة نظره
بس عموما انا زي ما قلت جديدة في وسطكم
وحبيت اعرف اعرافكم
وجميل جدا ان اول من يستجيب لطلبي
استاذي الغزالي
القصة جميلة جدا
وبعدين انا دايما اقرا الروايات اكثر من مرة
لاني عارفة اني هاشوف فيها زوايا جديدة انا ما شفتهاش
يعني راجعة تاني اشارك اسامة رحلته
.:.-=- ELGaZaLy-=-.:.
اسفة نسيت ارد السلام
وعليكم السلام ورحمة الله وبركاته
وعلى فكرة الموضوع بعيد جدا عن الموديرشن بتاع التعليقات
لان دا انا فاهماه كويس
صدقني الموقف كان
شكل من اشكال غلق باب الحوار
بس بدون اي مقدمات
تخاريف دكتور
صح يا دكتور بتحصل في احسن المدونات
انا مش معترضة
ومش باظلم حد
بدليل اني عرضت الموضوع عليكم
علشان افهم ايه النظام
ولما احكم على الموقف
يكون حكمي حيادي وموضوعي جدا
ما انت عارفني
انا مش بكبر المواضيع
هابقى احكيلك على الموقف
بالتفصيل وانت تحكم
انا حبيت افهم بس
لاني اعتقدت
ان المدونات
ينطبق عليها
اداب النقاش التي تنطبق في اي مكان
تصدق
تعليقاتك نظام
كلمتين وبس دي
هي صغنتتة اد كدا
بس انا بابقى فاهمة
الصفحات اللي وراها
يا دكتور
وانت بقى مش تايه عني
رغاية
ومنه لله
اللي دلني على سكة المدونات
قرف عالم التدوين بي
ربنا يسامحه بقى
وبعدين انت فينك
شكلي كدا مش هاكلمك
الا بعد الامتحانات
ديه قله ذوق
وعدم قدره علي الرد
لانه كده هو مبيملكش القدره علي اقناع الي قدامه بوجهه نظره
سيبك منه ومتدخليش مدونته تاني
محمود علي
منورني والله
انا مش عايزة اخد قرار متسرع بناء على انفعال لحظي
نابع من ثورتي وغضبي الشخصي
انا عايزة قراري يكون موضوعي وعقلاني
وزي انا ما وضحت في البوست السابق لده
اني باحب احط نفسي مكان اللي قدامي
وافكر بطريقته
علشان اقدر افهم مبرراته ايه
يمكن اعذره
وعلشان كدا قلت استعين باراء المدونين
وهم يساعدوني في تقييم الموقف
لان دا عالم جديد انا بادخله
وكل مكان او مجتمع بيكون له اساسيات في التعامل
المفروض الواحد يعرفها مبدئيا
علشان يفهم الجو صح
ويبدأ يعرف هو التفاصيل و دقائق الامور لوحده
وهاقولك حاجة هو حتى لو قليل الذوق
دا مش هايمنعني
اني ادخل اقرا موضوعاته طالما بيعرض موضوعات كويسة
لكن مش هاعلق عليها
طالما هو مش متقبل تعليقاتي للنهاية
كل واحد بيبقي شايف المدونة دي عالمه الخاص وانه بيسمح للناس تدخل تشاركه في حاجة خاصة بيه
وده مش غلط
أنا شايفة انه لو لغي بعض التعليقات ده من حقه بصرف النظر اني أكون موافقاه أو مش موافقه
بس ممكن يكون مش موافق علي اللفاظ أو الطريقة اللي اتكتب بيها التعليق
انما بخلاف كده يعني لو حد حذف تعليق عشان مخالف ليه في الرأي
هو ده بقا اللي لا يمكن أوافق عليه وتبقي دكتاتورية مالهاش لزمة
ويبقي يقفل مدونته أحسن بقا
أو يعملها من غير كومينتات أحسن
تحياتي
تقبل اراء الناس اللى بتدخل امر ضوروى ولا فعلا هيبقى عالم الانترنت انعزال عن الواقع
المشاركه
المشاركه
اجمل شىء
السلام عليكم ورحمة الله وبركاته
انا أول مرة أزور مدونتك
التصميم تحفه
انا قرئت الموضوعات كلها
بجد روووووووعه
وعن بروتوكولات التدوين
انا شايفه ان من عوامل نجح المدونات أن صحابها يتفاعل مع الزوار والعلاقة تكون متبادلة يعني ممكن يزور مدونتة ويتفاعل معاه الناس بتحب اللي يقدر افكارهم واللي يضفلهم مش بس يأخد منهم
أعرف حد من أصحابي مبيردش علي الزوار اللي بيجوله وعل الرغم من ان اصحابه كتير إلا أن بالتدريج الردود عنده قلت خااااااالص
أما عن حالة الحوار فدي أجمل حاله الردود ممكن توصلها
وعن مسح الردود يعني ممكن لو الحوار فقد ادب النقاش او لو مسحه هيكون أفضل من وجودة
سعيدة جدا بمروري عندك
:D
مممممممم
مفيش حد يقدر يحدد بروتوكولات عامه
لكن فعلا في حاجات تعارفنا عليها
يعني مثلا في اتفاق جديد على الا يكون في المدونات بذاءات مثلا
و مكن حقك كمدونة انك تحذفي اي شتيمه اوحاجه زيها من مدونتك
بس المهم لماكل واحد يحدد البروتوكلات بتاعته ما يبقاش مجحف فيها بشكل او اخر بدون ظلم للمعلقين عنده
عموما .,.كلواحد وحر في بروتوكلاته
سلااااام
fanan fa2eer
يعملها من غير كومينتات أحسن
دكتورة بصحيح
جبتي من الاخر
دا قصدي
طالما مش متقبل الآراء الاخرى والمخالفة
يبقى يلغي التعليقات
ويخلي مدونته كانها اجندة خاصة بيه هو
ممنوع ان اي حد يكتب فيها
وتبقى
Read Only
مشرط دكتور بصحيح
دايما مشرفاني يا دكتورة
بتعليقاتك الحاسمة
e7na
المشاركة اجمل حاجة فعلا هي المشاركة
والا يبقى مالوش لازمة كل اللي احنا بنعمله
مجرد مرورك عندي
له معنى كبير جدا
انت او انتم
من خلالكم
عرفت يعني ايه تدوين
احترامي الشديد لكم
بالله المستعان
اولا شرفتيني بمرورك عندي
وزادني الشرف بتعليقك
وانا سعيدة جدا اننا كلنا متفقين على اهمية التفاعل والمشاركة
وسعيدة جدا ان التصميم عجبك والموضوعات كمان
وانتي الاروع والله
يا رب تنوريني دايما
واول ما اخلص من امتحاناتي هازور مدونتك ان شاء الله
لانه يشرفني طبعا
AbdElRaHmaN Ayyash
مممممممم
عموما .,.كلواحد وحر في بروتوكلاته
فعلا معاك حق
لان في النهاية ما حدش يقدر يجبر حد على كيفية ادارة المساحة الخاصة بيه
سعيدة جدا بمرورك
وبتعليقك
الموضوعي جدا
الواقعي جدا
سلام يا اخ عبد الرحمن
واتمنى تشرفني دايما
اولا مبروك المدونه مع انها متاخره شويه سماح
بالنسبه للتعليق بصراحه لو صاحب المدونه مسح تعليقى او حتى مش رد عليه اكيد ازعل واكيد اقاطع مدونته
لانه كدة بيقولى مش تيجى عندى تانى
زى لو جالك ضيف وجاب ليكى هديه وبعدين اكتشف انك رميتى هديته فى الزباله تفتكرى مش ككدة تبقى كسرتى بخاطره
مع تحياتى
اتمنى لك التوفيق
شكرا على الكلام الجميل اللى انا مش قده ده
ومتغيبيش كتير كده
احمد
هيا فعلا قلة ذوق ان حد يمسح رد حد
ومعتقدش انى ممكن ادخل عنده تانى اصلا
بس تفكير بيجى ف بال ناس كتير
ربنا يلا يحطنا فى الموقف ده
تحياتى
رفقه عمر
الله يبارك فيكي
ولا متاخرة ولا حاجة
كفاية تشريفك لى
وفعلا انا ساعتها اتكسر بخاطري جامد
بس قلت اقهم برضوا
من اصحاب الخبرة
سعيدة جدا بمرورك عندي
e7na
لا شكر لى واجب
يا احمد
اسمك نور لي صفحة التعليقات
والكلام مش كتير عليك
انت تستحقه
دعواتك لى بس اخلص الامتحانات
وانا هاقرفكم
break
بس للاسف انا اتحطيت في الموقف
ربنا ما يكتبه على حد فيكم بقى
وانا باحاول التمس العذر
الله اعلم بدماغ كل واحد
بتفكر ازاي
السلام عليكم و رحمة الله و بركاته
إزيك يا جميل
انا من رايء ان المدون يحذف رد
في حالة وحده لو تعدي الأدب
يعني ألفاظ مش كويسه
بس بعد كده
لا طبعا
الاختلاف في الرأي بيثري القضية
و يا تقنعني يا اقنعك
:))
تحياتي و حبي ليك يا جميل
فعلاً من حقنا أننا نعمل قوانين وقواعد وبروتوكولات لكل المدونات والمدونين بس لازم يكون فيه اتحاد بيننا وكل واحد يقبل النقد زي ما يقبل التحية والإشادة وبالشكل ده يبقى لينا نظام جميل نمشي عليه كلنا
NOSHA
nosha
الفكرة جميلة فعلا
لكنها صعبة التنفيذ
لاننا بنتعامل ضمن نطاق الخصوصية
وناس هربانة من الكبت والبيروقراطية
يعني اضعف الايمان كل واحد عايز يمارس حريته في مدونته بالشكل اللي يعجبه
واللي مش عاجبه ما يدخلش
مش الكل كدا طبعا
كل على طبيعته وطريقة تفكيره
لكن في النهاية
المدونة منطقة خاصة جدا
ويجب على اللي يدخلها
انه يحترم ما يفرضه صاحبها من قواعد
علشان كدا وبعد تفكير
قررت ما ازعلش لو علقت واكتشفت ان تعليقي تم حذفه
برغم ان تعليقاتي ممكن يكون وجه الاعتراض عليها ليس اخلاقيا
وانما ممكن تكون معارضة
يبقى صاحب المدونة حر
لا يريد لصوت ان يعلو على صوته
في مكانه ومنطقته
متشكرة جدا للاهتمام والتعليق
و القادم....أجمل
انا معاكي
ومع الاستاذ نوشا
بس زي ما قلت له
ما نقدرش نتغاضى عن احترام حرية المدون جوا مدونته
منطقته بقى
وكل واحد يلعب قدام بيتهم
والله
مجرد ما باشوف اسمك
باحس بطعم النعناع وريحته
وباشعر بانتعاشة
ربنا يخليكي لينا وتنعنعينا
تما قولتى اللى انا عاوزة اقوله
المدونات اولا هى تبادل افكار ومعلومات وتجارب
يعنى ماينفعش تبقى زى المنتديات كده
انا مثلا اكتب موضوع يجى حد يعلق لى عليه ان الموضوع بتاعى لذيذ وكول خالص
لا طبعا امال فين هنفتح الحوار ونتبادل افكارنا
المكان ده علشان كده
تردى وارد عليكى مرة واتنين وتلاتة من غير رغى برضوه لما الموضوع يكون يستاهل الحوار والنقاش
WiLdBiRd
مش هاقولك
غير اني سعيدة جدا بان عقلية زيك
تدخل مدونتي
وتعلق فيها
سعيدة بيكي جدا
واتمنى تشرفيني دايما بزيارتك
Post a Comment