بجد ادوني رأيكم

مش عارفة اللي هاعمله دا صح ولا غلط

انا من وقت ما كتبت البوست السابق وانا داخلة طالعة

اقرا في الاسئلة واحاول اعرف نفسي من خلالها

وبعدين قلت انا هاعتبرها تاج واجاوب عليها كتابةً

علشان اقدر في النهاية اقرأ اجاباتي يمكن اطلع منها بحاجة

وبعدين قررت انشره في المدونة

القرار كان صعب جدا لكنه ايضا كان ملح جدا

انا طول عمري باحب اشارك في جلسات مشابهه للي انا عملته دا

يعني كنت دايما اقترح على زملائي واصدقائي لما يقترحوا

ان كل واحد فينا يقول العيوب اللي شايفها في الباقيين

ان كل واحد يقول العيوب اللي هو حاسسها في نفسه

والمجموعة اما تاكد رايه او تنفيه

ولاننا اصدقاء كنا بنراعي الصراحة جدا مع بعض

لكن في مرة في دكتور حضر الموقف دا معانا

هو طبيب بشري لكن عاشق لعلم النفس وقارئ فيه ودارسه بشكل فظيع

لدرجة انه كان قادر على تحليل شخصياتنا ببراعة بعد وقت قصير جدا من معرفته بينا

المهم هو نصحني بعدم تكرار الموضوع دا

لانه متعب نفسيا جدا

ومعاه حق انا كنت بعد القعدات دي باكون مجهدة نفسيا جدا

طبيعي لاني مش تعريت قدام نفسي وبس بل قدام الناس

وان اكثر ما يؤلم انك تجد من يلتقط منك الخيط ويقولك فعلا انت فيك الصفة دي

وانت من جواك بتبقى تتمنى انهم ينفوا كلامك ويقولولك لا انت مش كدا

بس احنا بنبقى متفقين على المواجهة الصريحة

صحيح الموضوع بيتعب نفسيا جدا جدا

لكن انا كنت بعدها باحس احساس جميل

كنت باحس اني زي الكتاب المفتوح للي قدامي

وكمان انا باعتبر ان العيوب هي نقاط ضعف

فاحب اني انا اجي واضغط على نفسى واقولها

لان دا كان بيحسسني بقوة ويساعدني اني اتغلب عليها

الاعتراف الشخصي بالنواقص او العيوب اعتقد انه بيدي احساس بالقوة

زي ما بيقولوا بيدي لا بيد عمرو

طبعا اكيد كل حالة لها ملابستها وكل تركيبة ولها معاييرها

لكن انا قصدي ان الاعتراف في حد ذاته بيكون اول خطوة في طريق التخلص من العيب الموجود

ولعلي مخطئة

اتمنى تشاركوني اراءكم

حقيقي عايزة اعرف

لان في اصدقاء قالولي اني فلسفتي شاذة وغير سوية

وانا مش مستبعدة صحة رايهم

هم ادلوا برايهم بناء على اراء لي في مواضيع مختلفة

وانا عايزة اعرف رايكم في فكرتي المطروحة باعلى

هل انزل البوست ام لا ؟