قبل اي كلام باشكر جدا جدا كلمات والقادم...... اجمل لتمريرهم التاج لي

وسعيدة جدا باني اكون من الناس اللي هم فكروا يمرروا لهم التاج

وبعدين لاننا في الجو الحر الفظيع دا جيبت لكم تاج مائي يعني اهو اي

طرطشة تطري الجو شوية يللا بينا بقى نلعب بالتاج دا شوية بما انه مائي

اسم مدونتك ؟

ماعلينا

لماذا اخترته.. وماهى نيتك من وراء اختياره ؟

هو اللي اختارني

لأن انا لحظة ما عملت المدونة ما كانش في في دماغي اي اسم

وقلت لنفسي ما علينا انا مش هاقف عند الاسم يعني اصلي كنت باجرب طريقة عمل المدونة ليس إلا

صورتك فى المدونه رمزيته

انا مش حاطة صورة

هل فكرت فى اغلاق مدونتك والسبب

لا ما فكرتش

حد قل ادبه فى التعليق .. ايه رد فعلك

انا باعتبر نفسي محظوظة بالمجموعة اللي بتدخل تعلق عندي اصلا

ولو حصل وحد دخل علق تعليق مش ظريف رد فعلى هايتوقف على اسلوبه
ممكن يكون تعليقه مسئ لى لكن راعى فيه الاداب العامة من اختيار الالفاظ وكدا يعني
فهاسيبه وهارد عليه عادي زي مثلا ان حد ينتقدني بشكل هجومي
لكن لو حد استخدم اسلوب فيه خروج عن الاداب العامة هاحذف التعليق

اسوأ مدونه؟

انا مش باشوف ان في أسوأ مدونة و أحسن مدونةكل مدونة بتعبر عن صاحبها

ومش معنى ان موضوعاته مخالفة لي او لارائي هاعتبرها سيئة

هايحصل ايه للأيميل لما تموتى؟

هايموت معايا بس انا هاتحاسب وهو لا

اديتى الباسبورد لحد قبل كده؟

لا ما حصلش

اسمك

اسمي الالكتروني جميلة بوحريد

عمرك ؟

ممكن تلاقيني كل الاعمار
اصل عمري زي الاستيك بيمط ويكش

برجك ؟

الحوت

مجال دراستك ؟

المحاسبه

السفر بالنسبه لك؟

السفر متعه باحبه جدا مهما كان متعب حتى لو مش للفسحة

المود بتاعك ؟

والله هو انا مزاجية متقلبة الاحوال لكن الغالب على اني اعز الضحك جدا واكره النكد

وقت فراغك بتعملى فيه ايه ؟

دا لصديقتي المقربة جدا جدا واولاد اخواتي والقراءة والنت

الاكله المفضله؟

السمك وكل مشتقاته

الصفات اللى اخذتها من بابا ؟

الصبر والرضا و الاسراف واني ما اكرهش حد

الصفات اللى اخذتها من ماما؟

الدبلوماسية يعني الواحد يبقى سوسة و قرشانة

والحرص الشديد على الناس اللي بحبهم واني ما ازعلهمش والرضا بما قسمه الله لي

اكتر ست حاجات بكرهها ؟

الظلم

الغرور

الاستهزاء بالناس مهما كانت بساطتهم

ان اي شخص يحاول ان يفرق بيني وبين اخواتي

النكد
التجريح في الآخرين

لماذا دخلت عالم التدوين من الأساس ؟

والله انا دخلته كمعلقة في البداية منه لله اللي كان السبب
ولاني بحب الدعبسة والتجربة

في مرة وانا سهرانة وداخلة في احدى المدونات

وجدت في اعلى الصفحة اختيار انشاء مدونة
فضغطت الاختياروتابعت الخطوات

وكان ما كان وفي خلال أقل من ساعة لقيت عندي مدونة

أحلى جملة قيلت في وصف مدونتك؟

لا اذكر جملة بعينها ولكن اعتبر كل كلمة تكتب في تعليق حتى لو كان نقد

اعتبرها اهتمام واسعد بها

التعليقات .. بالنسبه لك اهميتها؟

التعليقات عندي مهمة جدا جدا جدا

لانها نافذة للتواصل و للتفاعل مع الاخرين وهو دا اهتمامي الاول
انا يمكن ناشطة كمعلقة وزائرة لمدونات الغير اكثر مني كمدونة

احلى بوست كتبتيه؟

تخيل نفسك مكانه او مكانها و قولي حاسس بايه
يمكن لانه عن الاطفال وافكارهم او علشان انا تقريبا مفتونة بصورة الطفل اللي فيه

افضل مدونه قرأتها ؟

انا باشوف ميزة في كل شيئ اقرأه لأنه بيعبر عن شخصية صاحبه او حتة منها

علشان كدا مش باعقد مفاضلة

افضل بوست قرأته ؟

نفس اجابة السؤال السابق

االشغل بالنسبه لك ؟

مورد رزق وخطوة اولى لتحقيق بعض الطموحات وشغل فراغ للبعض

الانترنت بالنسبه لك ؟

نافذة على العالم وسيلة تواصل

والتاج دا انا هاعتبره مرحلة تمهيدية للتدوينة

اللي عملت عليها استفتاء دا اذا نزلتها

وانا امرر هذا التاج لكل المضافين عندي تحت عنوان

لو طلبك مش موجود هنا روح المولات دي

فيما عدا اللي جاوبوه قبل كدا

لكن اللي ما جاوبش التاج دا قبل كدا

وصفحة مدونتي تتشرف بوجود اسم مدونته فيها

انا امرر له التاج

كلكم

ماشي

اشمعنى انا لوحدي يعني

وبعدين التاج مائي واحنا في عز الحر

يعني وقته مناسب